تابع سلسلة تعرف الكليات و أقسامها المميزة و العادية

كلية_الطب_النظام_الجديد

لكل من يرغب الالتحاق بكليه الطب

- كلية بتدخلها مبتخرجش منها؟:thinking:

- كلية بتدخلها طالب بتطلع منها طالب بردو ؟:astonished:

- ده كان زمان دلوقتي نظام الكلية اتغير خالص وهنقدر نعيش حياتنا بقى:sunglasses:

:black_medium_small_square:فى البوست دا هنتكلم عن نظام مختلف لكلية الطب

نظام الـproblem based learning وهو إنك تعرف المشكلة وحلها وتحلها في نفس الوقت ، ده متطبق في كلية طب جامعة قناة السويس و طب بورسعيد وطب السويس وبعض الكليات الخاصة وموجود في كليات تانيه بس كل كلية بتطبقه من منظورها الخاص

:black_medium_small_square: في basic السنة بتتقسم لبلوكات فب الأغلب بيبقوا 6 وتقسيمتهم بتبقى مختلفة من جامعة لجامعة ممكن جامعة تدرس 3 في ترم و 3 في ترم تاني وممكن 4 و2 حسب يعني متغير

- إيه هو البلوك أو الموديول ده بقى؟

- البلوك هو مجموعة تعيلمية بتاخد فيها كل ما له علاقة بجزء معين من جسم الإنسان مثلا المعدة ،هتاخد كل ما يتعلق بالمعدة في كل المواد لحد ما تدرسها كلها وتبقى مُلم بكل أجزائها بعدين تنتقل على جزء تاني وهكذا

البلوك بقى متقسم لمجموعة من المشاكل 3 ل 5 مشكلات ، كل مشكلة بتاخد أسبوع مثلا ممكن تاخد أكتر أو أقل حساب نظام الجامعة

- إيه هيا المشكلة بقى ؟

- هقولك يا سيدى ، الكلية بتنزل مع بداية كل أسبوع مشكلة problem ، بتتناقش أنت وزمايلك في المشكلة و تتطلعوا في الاخر بمجموعة من التساؤلات عشان تفهموا طبيعة المشكلة و حلها وهو ده الهدف إن انتوا تكتشفوا وتفهموا طبيعة الجهاز أو الجزء ده بنفسكم وتقدروا تتعاملوا مع مشاكله وتشخصوها.

:black_medium_small_square: التساؤلات ديه بنسميها أهداف ، بعد كده و لمدة أسبوع بتكون المحاضرات و المعامل متعلقة بالمشكلة دي

في اخر الأسبوع بتجتمع بزمايلك و تقدموا حل للمشكلة في ضوء دراستكم طول الأسبوع

مع نهاية الترم ( المكون من 3 بلوكات غالبا ) بيكون الإمتحان

:black_medium_small_square: الإمتحان مبيكونش كل مادة لوحدها ، هتمتحن 3 امتحانات كل امتحان على بلوك لوحده

:black_medium_small_square:من مميزات النظام ان المواد بتكون مرتبطة ببعض يعني البلوك الواحد لو فيه 3 مواد مثلا فال 3 هيبقوا بيتكلموا عن نفس الجزء وده هيسهل عليك في المذاكرة ، كمان درجة النجاح في الامتحان بتتحسب بالبلوك كله مش بعدد المواد يعني لو البلوك فيه 3 مواد وأنت ذاكرت 2 بس هتنجح

《بس خد بالك وذاكر كويس عشان تعالجنا متموتناش")) 》

:black_medium_small_square:من عيوبه ان فى كليات امتحان البلوك الواحد كل سؤال بيجي على مادة ، فلو عرفت تحل السؤال هتاخد درجة المادة ، معرفتش تحله يبقي كده المادة راحت عليك غالبا

:anger_right: النظام ده بيعتمد على التعلييم الذاتى self learning ف بعض الكليات يعني مفيش كتب بتنزل فى الكلية ، انت اللى بتدور وبتشوف المصادر و المراجع المناسبة وتذاكر منها ،لكن في كليات بتنزل ليها كتب خاصة بيها عادي

《والحقيقة مش معروف هل دي نقطة إيجابية ولا سلبية؟》

:black_medium_small_square:اخيرا بالنسبة للتكليف و الامتياز فهو نفس النظام اللى اتكلمنا عنه فى بوست كلية الطب ال traditional

- طيب سمعنا عن ان هيكون فى تغيير هيحصل ونظام جديد لكل كليات الطب فى مصر ؟

- دا حقيقى ، فى قرار نزل بإن كلية الطب هتبقى 5 سنين و سنتين امتياز ( او اسمهم تدريب اكلينيكى ) ، وهتبقى بنظام الساعات المعتمدة ، وغالبا هيطبق فيها نظام الـproblem based learning اللى اتكلمنا عنه فى البوست ودا بيختلف تطبيقه من كلية للتانية وبالفعل النظام ده بدء تنفيذه من السنة الفاتت

:black_medium_small_square:فى النظام الجديد هتنزل المستشفى وتشتغل عمليا من اول سنة فى الكلية ودا برضو ف بعض الكليات ولكن ف النظام ككل الطلبة بتنزل المستشفيات بدري عن النظام القديم يعني بتمارس ال بتدرسه وده الصح:white_check_mark:

:black_medium_small_square:و هيكون فيه برنامج جديد اسمه البورد المصرى ، هيكون إلزامي على كل الاطباء إنهم يجتازوا اختبار البورد المصرى اللى هيكون موحد على كل كليات مصر ، ودا شرط اساسي لمزاولة المهنة

《عشان نتأكد بردو إنك كدكتور هتعالجنا واحنا غلابة:nerd:》

:black_medium_small_square:النظام مختلف عن نظام التدريس العادي traditional ال اتكلمنا عنه فى البوست اللى فات ( هتلاقى لينك البوست فى اول كومنت ) أكيد لاحظت ده مش كده :interrobang:

:black_medium_small_square:اخيرا النظام لسه متطبقش كامل ، وبالتالى لسه مش واضح تماما كل تفاصيله ، لكن ان شاء الله هيكون افضل لطلبة الطب

منقول

علق بكلمه متابع عشان توصلك باقي الكليات

كلية_الصيدلة

مكملين معاكم في المجال الطبي وهنكلمكم دلوقتي عن " كلية صيدلة "

لو حابب تدرس الأدوية بتكوينها وأصلها وطرق تحضيرها وكل ما له علاقة بالموضوع يبقى مكانك في صيدلة :smiley:

هيجي ناس تقولك اوعى تفتكر إنك داخل صيدلة عشان تخترع أدوية، أنتَ هتبقى بيّاع. انتَ كصيدلي بتكون فاهم الأدوية والمواد الفعالة ال فيها وإيه ال ينفع مع كل حالة، وبنشوف ناس كتير بتلجأ للصيدلي قبل الطبيب البشري.

كلية صيدلة عمومًا بيدرسوا مواد من كليات مختلفة زي كلية علوم ( زي الكيميا العضوية والكيميا غير العضوية والكيميا الفيزيائية والكيميا التحليلية ) ومواد من طب ( زي الأناتومي والفسيولوچي والهستولوچي ) وبيدرسوا مواد خاصة بكليتهم بس.

كلية صيدلة فيها قسمين، القسم الأول هوَّ general والتاني clinical.

طيّب إيه الفرق ما بين جينرال وكلينيكال ؟

- كلينكال يُعتبر قسم خاص في الكلية بيتدفعله مصاريف كل سنة.

- بالنسبة للدراسة، المواد اللي بيدرسوها جينرال في 5 سنين كلينكال بيدرسوها مضغوطة في 3 سنين بس، وآخر سنتين بيدرسوا مواد من طب.

- وبالنسبة للشغل، فالصيدلي الاكلينيكي شغله في المستشفيات، الطبيب البشري بيشخص الحالة، والصيدلي هوَّ اللي بيحدد الدوا والجرعة وبيتابع حالة المريض.

- بتدخلها بمجموع صيدلة العادي، في جامعات بيكون ليها تنسيق داخلي وفي جامعات لأ.

مواد كلية صيدلة زي أي كلية بتدرس الأساسيات في اول سنتين، يعني بتدرس كل حاجة عن الكيميا بأنواعها وبتدرس مواد ليها علاقة بإدارة الصيدلية والحسابات بتاعتها كمان.

الشغل الحقيقي أو صيدلة كما يجب أن تكون بتبدأ من سنة 3، بتبدأ تدرس الأدوية وتدرس إزاي تخلّي الدوا ده يخضع للتجارب على الضفادع أو الفران.

طب نظام الدراسة بيبقى عامل إزاي؟!

نظام الدراسة مش بيكون مثالي زي ما بنكون متخيلين داخلين نستكشف وكدا لا الموضوع أقل من توقعاتنا شوية، في جزء عملي وجزء نظري والنظري معظمه حفظ، في أجزاء كتير منه بتعتمد على الفهم بس بردو معظمه حفظ.

مَتتخيلش إنك هتدخل تستريح في صيدلة، الكلية من أكتر الكليات ال محتاجة مجهود أكتر من طب كمان. انتَ بتمتحن كتير على كل حاجة كويزات على النظري العملي وشيتات وشفوي وامتحانات بتستمر لغاية الفاينال، طول السنة امتحانات.

الفاينال هوَّ الأهم وعليه أكبر نسبة، إنما انتَ كل امتحان بتمتحنه بيكون عليه نسبة من التقدير الكلي.

صيدلة كلية عملية من الدرجة الأولى، يعني فيها معامل ولازم تلتزم بحضورها وفيها امتحانات عملي بحيث إنك تتعرف ع العينات وفيها شفوي لأن لازم الدكتور يفهم إنك فاهم وبتعرف تتكلم لإنك هتتعامل بعد كده مع مرضى وهتبقى مسئول عن كل حاجة للمريض ده لأن دي روح إنسان، مش ممكن يخرجوك تبقى مسئول عن روح إنسان غير لمّا تبقى قد المسؤلية دي.

المواد ال بتدرسها هتفيدك كأساسيات لشغلك بعد كده، لكن لوحدها مش كفاية، لازم تشتغل على نفسك وتقرا وتدوّر وتنزل صيدليات.

بعد التخرج انتَ متاح ليك شغل كتير مش بس تقف في صيدلية لا انتَ ممكن كمان تشتغل في شركة أدوية سواء كان في الرقابة على الدواء أو كمندوب مبيعات للدواء و وممكن تشتغل في مصنع أدوية أو في مستشفى، أو تتعين في الجامعة على حسب تقديرك وترتيبك .. وممكن كمان تعمل دبلومةبحيث إنك في الآخر لو كنت جينرال تقدر تشتغل شغل كلينيكال.

ال يقولك الصيدلي مجرد بياع وإن أي حد ممكن يتعلم صرف الدوا ويعرف مكانه فين يعني من غير دراسة،

اشفق عليه واعرف إن للاسف تفكيره محدود، ممكن أي حد يعرف الدوا اسمه إيه وبيعمل إيه، وممكن مع الخبرة يعرف الأدوية ال بتعالج الأمراض لكن عمره ما هيعرف إزاي الدوا بيشتغل جوا الجسم، عمره ما هيعرف يدي للمريض نصيحة وهوَّ بيديله الدواء .. وأخطر حاجة إنه عمره ما هيعرف تعارضات الأدوية مع بعضها يعني امتى مينفعش المريض ياخد دوا مع دوا تاني ! ودي كارثة، لأنها - لا قدر الله - بتؤدي لمضاعفات وممكن دوائين يتفاعلوا مع بعض جوا الجسم يبوظوا حاجات كتيرة في الجسم فـَ محدش هيعرف كل ده غير ال دارسه دراسة كاملة مش مجرد خبرة.

فصيدلة كلية ليها أهميتها ومحدش يقدر يستهين بيها لو بتحبها ومقتنع بدراستها أدخل من غير ما تسمع كلام أي حد

كلية_علاج_طبيعى

هنتكلم النهارده عن كلية معظم الناس ميعرفوش عنها حاجة، وبتوه وسط كليات علمية كتير، ده غير إن طلبة علمي علوم مبيفكروش فيها كتير عشان معندهمش داتا كافية عنها .. لكن لمّا بيجمعوا عنها شوية بيعرفوا قد إيه هىّ مجال دراسة لطيف وبينفع :smiley:

علاج طبيعى :cherry_blossom:

هنحاول نتكلم عنها شوية بشكل عام وبعدين نفصل .. وأتمنى متزهقوش عمومًا :'D

كلية العلاج الطبيعى هى من كليات المجال الطبى .. متقسمة ل ٥ سنين دراسة وسنة امتياز وبعد الامتياز سنتين تكليف.

خريجين الكلية ليهم نقابة اسمها نقابة العلاج الطبيعى .. أيوة انت مش أقل من التخصصات ال ليها نقابات في حاجة.

نرجع لموضوعنا .. الكلية دي في 3 جامعات حكومية بس هما القاهرة وبنى سويف وكفر الشيخ.

القاهرة وبني سويف بيتوزع عليهم الطلبة ال في وجه قبلي وكفر الشيخ الطلبة ال في وجه بحري

طيب كل ده كلام عادى جدًا وبشكل كبير مش مهم، المهم دلوقت أنا هعمل إيه في الكلية دي؟

وعشان تعرف هتعمل إيه في الكلية دي لازم نفهم الأول يعنى إيه علاج طبيعى، وإيه وظيفته.

ببساطة كده جسم الانسان أما بيحصل فيه مشكلة بتأثر على كفاءة الحركة بيحتاج علاج طبيعى أيا كان بقى نوع المشكلة دى من أول كسر فى دراع ولد صغير وإيده اتجبست فترة طويلة فمبقاش عارف يحركها كويس عشان قعد في الجبس فترة طويلة .. لغاية مشاكل الحركة ال بتيجى بسبب جلطات المخ.

ده غير الأضرار ال بتحصل نتيجه مشاكل الجهاز العصبى، المفاصل، العضلات، المشاكل ال بعد الجراحة، والاصابات الرياضية وكمان المشاكل ال بتحصل نتيجة إن السن بيتقدم زى خشونة الركبة والليلة دي.

أكيد أخدت بالك كلمة مشاكل اتكررت كام مرة .. أحب أفاجئك إن انتَ هتكون حلّال المشاكل دى كلها .. وظيفة المعالج الطبيعي إنه بيحاول بقدر الإمكان يرجّع الشخص ال عنده مشاكل في الحركة لحالته الطبيعية.

وعشان تقدر تعمل ده فانتَ بتدرس أول سنتين مواد أساسية زى الأناتومى ( ال هو علم التشريح ) وعلم الانسجة وكيمياء حيوية وتمارين علاجية وهكذا

تانى سنتين بتبدأ تاخد مواد أو أقسام علمية .. بتبدأ تدخل يعني في صميم المجال .. وفي صميم المواد ال بتساعدك في الشغل بعد كده .. زي قسم الباطنة والنسا وإصابات ملاعب وفيه حروق وقلب وباطنة وأعصاب وأطفال.

بس كل ده طبعًا من وجهة نظر العلاج الطبيعى والجزء الخاص بشغلك .. مش بتدرس تفاصيل كل ده زى بتاع بشرى.

وبتدرس التخصصات والاقسام كلها بس مش معنى كده إنك بتتخصص في حاجة فيهم، انت بتاخدهم عشان تتعلم وتبقي مجمع كله .. ومش بتتخصص غير لو حبيت تكمل دراسات عليا .. فساعتها بتختار قسم واحد بس تحضر فيه دراستك وماجستير ودكتوراه وكده.

وعمومًا الدراسة بتكون بالانجليزى وطبعًا الكلية كلية عملية ونظرية الاتنين مع بعض.

الدراسة ونظامها فيها ميزة، إنها عملية بشكل كبير يعني على عكس مواد طب مثلًا ساعات النظري مش بيغذيه العملي، علاج مش كده الجزء العملي والسكاشن أهم بكتيير .. وفي ميزة إن كل الشغل فعلًا بتعمله بنفسك .. السكاشن بتبدأ من السنة التانية.

ومن أول تالتة لو أخدت الموضوع في الكلية جد واجتهدت ممكن تنزل تشتغل وتدرب في مراكز علاج طبيعي أو مستشفيات وبتبقي أكتر الحالات ال بتيجي ألم الضهر وشلل الأطفال وتبدأ تاخد مرتب كمان لو حبيت.

كده الحمد لله خلصنا ال4 سنين كلية وداخلين على الإمتياز أهو وقربنا نتخرج :smiley:

كلية سهلة خالص أهى .. المهم سنة الامتياز دي عبارة عن ايه؟

الامتياز بيكون 12 شهر بتلف فيها على الرواندات حسب ما بيوزعوك .. يعني كل شهرين بتاخد راوند في قسم معين، يعنى بتاخد عظام شهرين وبعدين نسا شهرين وهكذا علي كل الاقسام .. وبتيجي في آخر شهرين بيبقي راوند بتختار هتاخد فيه إيه بنفسك على حسب أكتر قسم انت حابه يعني لو حابب مثلًا أعصاب فبتختاره.

امتيازك بتاخده حسب محافظتك أو ممكن تاخده في القاهرة وكل سنة بيبقى ليها ظروفها، والامتياز انت بتتعلم فيه وكل حاجة، بس أحسنلك تنزل تدرب عند دكتور شاطر عشان بيديك خبرة بتفرق معاك.

خلصنا 4 سنين الدراسة وسنة الامتياز .. خلاص كده ؟!

لا مش خلاص كده

فيه كمان سنتين تكليف

والفرق بين الامتياز والتكليف .. إنك في امتياز بتتعلم وبتتدرب كأنك في الكلية لسه .. بس بتتعلم بشكل عملي مش نظري .. بس في التكليف بتبقي زي دكتور حر بيشتغل بنفسه من غير ما يكون حد لسه بيعلمك ويدربك.

المهم عشان يبقي تكليفك في مكان قريب من محافظتك أو سكنك لازم تقديرك يكون مساعدك فذاكر كويس علشان غير إنك هتحتاج مذاكرتك في الشغل هتحتاجها في إن تكليفك يكون في مكان مريح بالنسبة ليك.

الموضوع بيتم عمومًا من خلال التوزيع الجغرافي وفيه استئناءات بتحصل طبعًا منها مثلًا استثاءات للبنات المتزوجة وكده.

خلصت تكليف ؟!

الحمد لله .. دلوقت انت بعد ما بتخلص التكليف والامتياز بيبقي اسمك ممارس عام

وبعد 5 سنين كمان أو بعد ما يبقى معاك ماجيستير ودكتوراه في التخصص ال انت بتختار تعمل فيه دراسات عليا، بتكون أخصائى علاج طبيعي ومن حقك تمارس شغلك في مراكز العلاج الطبيعي أو المستشفيات.

طبيعة الشغل إنه بيتحولك الحالة من دكتور بشري عظام أو أعصاب و انت بتعمل التشخيص من جديد عشان لو التشخيص غلط المريض هيضيع بعد أما نوصل للتشخيص السليم، وبتحط الخطة العلاجية للمريض.

طيب سؤال بيلح على كتير منكم .. الكلية صعبة؟

مفيش كلية سهلة وكلية صعبة مهما حد خدعك وقالك كده كله فيه الصعب والسهل .. ولو انت عاوز تثبت نفسك متحاولش تدور على السهولة أو الصعوبة دور على ال هتلاقي فيه نفسك ..

وبلاش كل تفكيرك يكون إن تنسيقك رماك في الكلية ودي ال موجودة قدامك وخلاص .. بشكل عام مجال العلاج الطبيعى يعتبر جديد ومطلوب جدًا غير إن عدد خريجينه قليل نسبيًا بسبب قلة كليات العلاج الطبيعى في مصر، غير إنه مطلوب في الدول العربية وفي أوروبا بشكل كبير.

طيب الخلاصة .. إنك بشكل عام بتطلع من الكلية دي دكتور واخصائي علاج طبيعي .. ممكن تشتغل في اي مستشفي او تفتح عيادة ليك او تشتغل في عيادة مع حد تاني، أو تشتغل في الأعمال الاستشارية في مجال العلاج الطبيعي .. أو وحدات علاج الروماتيزم .. حاجات تاني كتير.

مجال العلاج الطبيعي مش مفاصل وتغذية وأعصاب بس، في نسا وجلدية.

والتخصص الواحد جواه أفكار إبداعية كتير لأنه كمجال مُستحدَث ومُطوَر على طول.

المهم إن الشغل بعد الكلية كتير وموجود وأكتره بيبقى شغل علاج طبيعي للعظام والأطفال والأعصاب دول اكتر حاجات مطلوبة

وناخد بالنا إن جامعة كفر الشيخ وبني سويف فيهم فرصة هايلة للتعيين، لأنهم لسه ماخرجوش ولا دفعة.

نصيحة أخيرة .. لو ربنا قدرلكم الكلية دى .. فزماليلكم ال أكبر منكم بيقولولكم عندكم مادة اسمها أناتومى Anatomy

مهمة جدًا ذاكروها كويس واتأسسوا فيها صح عشان هتنفعكم بعد كده في شغلكم :slight_smile:

لية طب بيطري

-اللي مفيش حد بيعرف قيمتها كويس غير مثلًا اللي مربي قطة أو كلب أو أي حيوانات:bear::horse:، و مبيبقاش عندنا وعي ولا مدركين أهمية كلية ومجال زي ده :open_mouth:، يمكن عشان التنسيق والوضع كله حوالينا ثبّت عندنا المفهوم ده:pensive: ، أو يمكن عشان مش عندنا المعلومات الكفايه عن الكلية ديه وماشين بس مع كلمة بتجبنا وكلمة بتودينا...:dizzy_face:

-فعشان كدة اقرأوا المقال لحد الآخر وأكيد هتغيروا الفكرة دي خالص ، وهتعرفوا قد إيه الموضوع كبير وإن الكلية مجال شغلها واسع ومطلوب ، وأنها ف بلاد كتير غربية وعربية هي الكلية الأولي قبل حتي الطب البشري وده لأن الطب البيطري طب وقائي رقابي علاجي .. وهو خط الدفاع الأول عن صحة الإنسان (غير دوره طبعا ف تحسين صحة الحيوان ) لأنه بيمنع انتقال أكتر من 200 مرض مشترك من الحيوان للإنسان واللي ممكن تسبب الوفاة . :pensive:

-مبدأيا كدة الكلية عبارة عن 5 سنين .

-ندخل بقى في المواد :

بتكون زي أي كلية علمية أو طبية بيدرسوا في أول سنة تشريح وفسيولوجي وهستولوجي وكمياء حيوية وبيولوجي ووراثة وسلوك حيوان .

-والتشريح في أولي مثلًا بيكون تشريح عضم ومن أول سنة تانية بنبدأ نشرح الجسم كله organsو brain .

-سنة تانية وتالتة بنكمل المواد الأكاديمية (باقي الهستولوجي والفسيولوجي والكمياء ) و التغذية والتربية والإنتاج الحيواني ، تربية وإنتاج الأسماك:fish: ، والفارما والبكتيريا والدواجن ... الخ .

-أما بقى ياسيدي من سنة رابعة هتبدأ الشغل الجد الممتع :heart_eyes:و هو بيبقي طب شرعي وباطنة وجراحة وتوليد وإنتاج ألبان والرقابة الصحية ع اللحوم وهكذا .

-والكلية طبعًا بيكون فيها عملي كتير مش كله نظري وبعدين ابسط ياعم سنة أولي كلها بتكون في المشرحة يعني مفيش تعامل حقيقي مع الحيوان وهو حي، يعني علي الأقل هتعدي سنة أولي من غير ماتتخض أو حتى هتكون بدأت تتعود .

-نيجي لمجالات الشغل :

الشغل مش مقتصر بس علي التشخيص وشغل الدكتورالبيطري اللي عارفينه ده ، لا مجالات شغل الطبيب البيطري كتييييرة جدا حدث ولا حرج :grin: الطبيب البيطري بتاع كله من الآخر (هو طبيب بشري وأسنان وصيدلة ف شخص واحد ) شخص واحد بيشخص ويحدد ويعالج ويوصف الدوا ويوفره ويحس بكائن حي خلقه ربنا بيحس وبيتألم ولكنه لا يستطيع وصف ما يشعر به وهنا يتجلي دور طبيب الإنسانية :heart_eyes:.

-إنت ممكن تفتح صيدلية بيطرية و يكون مشروع حلو جدًا ..

أو ممكن عمومًا تشتغل في أي صيدلية بيطري .

- مش بس كده ممكن تشتغل كمان في مزارع دواجن أو سمك أو خيل أو إنتاج حلاب أو إنتاج لحوم ، فيه كمان مزارع الجيش.

- أو عيادة بيطري سواء تفتح عياده لنفسك أو تبدأ في الأول مع حد ودي بيكون فيها التشخيص والعلاج . :smiley:

وممكن لو مش حابب تتعامل مع الحيوانات الكبيرة زي الحصان والبقر وكده تفتح عيادة pets بس وتتعامل مع الققط والكلاب بس:cat::dog: .

-أو قدامك كمان الشغل في المستشفيات البيطري وممكن كمان تشتغل في معمل تحليل أو تفتح معمل تحاليل بنفسك بس لازم بعد ما بتاخد دبلومة تخصص :syringe:.

-وعندك كمان مجال الجودة و المراقبة الغذائية ودي بتكون مشرف على المستشفيات و مدن جامعية وموانيء ومطارات وأماكن سياحية والجمارك والمطاعم والمصانع .

-أو ممكن تشتغل في صناعة الادوية أو تجارتها وكده أو في شركات أدويه عمومًا أو ال (medical rip ) اللي هي دعاية للأدوية يعني وده كويس جدًا .

-أو سهل إنك تعمل أي مشروع مع أصحابك لتربية حيوانات، ده غير مديريات الزراعة والوحدات الييطرية والحاجات ديه .

-وبالنسبة للخمسة الأوائل فممكن تتعينوا في الكلية أو معهد البحوث أو تتعين في وحدات بيطرية.

-وبالنسبة للتخصصات والأقسام :

فعمومًا الكلية مبتتخصصش فيها غير لو هتعمل ماجستير و دكتوراه ، فبتاخد تخصص معين وبتحضّر فيه دراستك .

-غير كده مفيش غير جامعة بنها هيا الي بيكون فيها قسمين : يا قسم فارما يعني أدويه وكده , أو فود كونترول اللي هو جودة ومراقبة أغذية , وبتختار من أول سنة وقبل ما تدخل هتاخد أنهي قسم عشان على أساسه بتحدد المواد اللي هتدرسها .

- كده تقريبًا عرفتوا كل حاجة عن الكلية و ياريت فكرتكم تتغير عنها وتعرفوا قد إيه هي مهمة ومجال شغلها واسع ومطلوب :smiley:

-وفي الأول والآخر إنت بتنقذ روح , واللي من غير الروح ديه دايرة حياتنا مش هتكمل , فخليك فخور باللي إنت بتعمله وهتدرسه كل واحد ليه دوره الي اتخلق عشانه

كلية_علوم

السلام عليكم

النهارده هكلمكم عن الجنـدى اللى ميعرفهوش ناس كتير واللى بالإجماع من اصعب الكلـيات اللى موجودة

علشان لما تيجى متتفاجئش بس :smiley:

كليــة الدحاحيـن والناس اللى دماغهم بتلسع منهم، بس والله الدنـيا حلوة يعنى ومش سيـئة للى يحبها .. الكليه الام لكليات الطب والصيدلة.. بطل الحلقة وكل حلقة.. كلية العلوم.. :sweat_smile:

الكلية موجودة في معظم جامعات مصر ..بس تقريبا اكتر كلية هتلاقي كل جامعه فيها تخصصات واقسام مختلفه عن الجامعه التانيه يعني هتلاقي اقسام موجوده في جامعه طنطا ومش موجوده في عين شمس .. حتى تقسيمة الاقسام بتختلف من جامعه للتانيه .. وحتى السنة الي بيبدأ فيها التخصص بتختلف من جامعة للتانية وبيختلف الاقسام الي متاحه لعلمي رياضه ولعلمي علوم برده

نصيحه يعني ياريت قبل ما تدخل الكلية في اي جامعه تبقي تقرا اللايحه بتاعتها كويس والي هتلاقي فيها كل تفاصيل الدراسه والاقسام وشروط كل قسم وكل فرقة ايه المواد الي بتاخدها.. وهتلاقي اللايحه ديه او دليل الطالب يعني موجود في الموقع بتاع الكلية

نيجي بقي للجد .. الكلية اربع سنين

وبالنسبة للدراسة فيها فهيا عملية ونظرية في نفس الوقت .. وعلى حسب تخصصك وقسمك اكيد.. يعني القسم الي انت فيه عملي اكتر ولا نظري .. الكليه مش صعبه ومعقده علي اد ما هيا تقيله ومودها دسمه

ومجالات شغل الكلية مختلفه .. وبتبقي علي حسب انت في انهي قسم .. بس عموما قدامك طبعا معامل التحاليل

شركات الادوية و ال medical rip، شركات المياة والغاز ، شركات البترول ، شركات البرمجة ، المستشفيات ، مراكز البحوث الي بتبقي كلها بحث علم وبتساعدك تتطلع للنور في المجال ده

نيجي لسنة اولي هتدرس اكتر من ماده بس فيه ٣ مواد اساسيه الي هما ( رياضه – كيميا – فيزيا ) وباقي المواد بتختلف من جامعه للتانيه وحسب انت بتخصص من اول سنة ولا لا

ندخل بقي في الاقسام .. وبكرر عليك الاقسام ديه هتلاقيها في جامعه وعادي متلقيهاش في التانيه .. وفيه اقسام لازم تدخلها لو انت علمي رياضه بس او لو انت علمي علوم بس وفيه اقسام مشتركه ممكن تدخلها لو انت علوم او رياضه زي قسم جيوفيزيا . وفيه اقسام بيقي ليها تنسيق داخلي وتوزيع حسب الرغبات وحسب مجموعك في ثانويه عامه

وفيه اقسام اي حد يقدر يدخلها عادي من غير اي حاجه .. يعني بيختلف حسب القسم وحسب نظام الجامعه

فبص يا سيدي اانت عندك اقسام

زي قسم حاسب آلي : ده انت بتدرس لغات برمجه جافا و هي سوفت وير و رغم ان حاسبات و معلومات فيها سوفت وير و هارد وير بس الحق يقال ان حاسبات احسن لأن بيقي فيها تخصص اكتر وبتدي المواد التطبيقيه في الواقع وبتبقي علي اطلاع بكا جديدلكن في علوم قسم حاسب بتاخد نظري كتييييير ولغات البرمجه فيها بتبقي عتيقه ده غير ان حاسبات بتبقي دراستها اسهل

هو صحيح دماغك بتبقي اعلي في علوم حاسب لكن المشكله في المواد نفسها لكن انت لو خدت كورسات بره بتبقي اعلي من بتاع حاسبات و معلومات بكتير

وبعد الكليه ممكن تشتغل في البرمجه وفي اي شركه وتعمل سيرفر والمواقع بتاعتها .. وفيه دلوقتي بقي متوفر الشغل في موضوع الsecurity من الهاكرز .. والمجالات ديه كلها بقت كويسه الفتره الاخيره ومتوفره

وفيه قسم رياضة : ده بقي رياضه باحته بتحب الرياضه حب جنوني ادخله يا كبير لكن انت كويس فيها بس مش بتحبها يبقي انساها خالص و شغلها في مصر للاسف قليل بس تشتغل في معامل الابحاث او دكتور في الجامعه او تاخد سنتين تربيه و تبقي مدرس وفيه جامعات بيقي فيها رياضه وحاسب قسم واحد مش قسمين

وعندك قسم فلك : بتدرس مواد رياضه و مواد فلك و شغله في مصر في مرصد حلوان بس و قليل

وفيه قسم علوم فضاء : القسم دا هتدرس فية كل حاجة خاصة بالاتصالات و الأقمار الصناعية و مركبات الفضاء و الميكانيكا السماوية والهندسية .. و الحاجات دي كلها وهتعرف منه شكل و تركيب الأقمار الصناعية

وهو هو قسم فلك بالظبط ونفس الشروط عشان تدخله .. بس الفرق ده فلك و ده علوم جويه.

فرص الشغل زى المرصد - هيئة الأرصاد الجوية - البحث العلمى - المركز القومى للبحوث - مراكز مراقبة الطقس -

المراكز البحثية الفلكية - الاستطلاعات فى الجيش و المخابرات العامة.

وهتلاقي عندك قسم الفيزيا : قسم اعتبره للعباقره فقط وعاوز واحد بيعشق فيزيا بطريقه بشعه.. المهم دراسته طبعا فيزياء بس كهربيه و حراريه و حدث ولا حرج اكيد انتو عارفين و شغله بقي في معامل الابحاث او دكتور في الجامعه او تاخد سنتين تربيه و تبقي مدرس و في مصانع الاجهزه الكهربيه و شركات بقي تانيه

وفيه جامعات هتلاقي فيها قسم فيزيا وفلك مع بعض ككقسم واحد بتدخله

وبيقي برضه زي قسم فلك و كده بس بتاخد شويه فيزيا بقي مع مواد الفل وبيجمع ما بين الفلك و الفيزياء يعنى هتدرس نص مواد الفلك و نص مواد الفيزياء ..

فرص الشغل عندك كتير: زي ما قلنا قدامك ماكن زي المرصد وهيئة الطاقة النووية او الذرية - المركز القومى للبحوث - المعهد القومى للفلزات - و كمان اى مركز ليه علاقة بالفيزياء

وبعدين هتلاقي قسم كيميا حيويه الي هو افضل قسم لعلمي علوم قسم كويس جدا و ده بقي بيدرس العمليات الحيويه في جسم الانسان زي البروتين و الفيتامينات و الكربوهيدرات و الحاجات ديه و الاحماض النوويه و الانزيمات و الهرمونات و الاورام كمان شويه بسيطه كده في البيولوجي بتاع الخليه و علم الوراثه و المناعه وشغله بيقي في معامل التحاليل بس لو عاوز تفتح معمل بأسمك لازم تاخد دبلومه تحاليل طبيه و طبعا شغله موجود في شركات كتير زي الادويه وكده و هو قسم بجد رائع و سهل كمان :smiley:

قسم كيميا ميكروبيولوجي : اعتبروه تاني افضل قسم لعلمي علوم و ده بقي بيدرس الفسيولوجي بتاعت الحاجات المعديه (بكتريا وفيروسات و....) وحياتها وكل حاجه و تأثير الميكروبيولوجي على الانسان والامراض اللي بيسببها و الانزيمات و السموم الميكروبيه و الهرمونات النباتيه و شغلها بقي موجود برضه في التحاليل و شركات الادويه و شركات الكيماويات

قسم جيولوجيا : ده بقي زي مانتو عارفين ان الجيولوجيا هي علم دراسه الارض

شغله موجود في شركات البترول و شركات المياه و جهاز شئون البيئه و قطاع الاثارو ممكن يشتغل اوبيريشن (عمليات يعني ) في المكتب وده اللي بيعمل الخرايط مش الجغرافيه لأ خرايط تانيه هتعرفوها قدام شويه :smiley: و مش كده بس ده كمان بيدرس كيميا و بيشتغل بيها و شغل الكيميا بقي في معامل التحاليل و شركات الادويه و الاسمده و ..... قولناها كتير بقي نقول تاني؟

قسم حيوان : ده بدرس فيه البيولوجي بتاع الحيوان و الفيسيولوجي و تشريح و الفقاريات و اللافقاريات و علم الوراثه و الانسجه و الاجنه و المناعه و ده شغله في معامل التحاليل و شركات الادويه برضه و شركات كتير زي ما قولنا الكيميائين بيشتغلوا في كل حته

قسم نبات : القسم ده بتدرس فيه البيولوجي بتاع النبات و شويه فيسيولوجي للنبات و تصنيفاته و العوامل البيئيه اللي بتأثر فيه و التلوث و الانزيمات و الطحالب و تشريح النبات و شويه في علم الوراثه و شغله بقي في معامل الابحاث و التحاليل و شركات الادويه

قسم حشرات : بدرس بقي في القسم ده البيولوجي بتاع الحشرات و تشريح انسجه الحشرات و المورفولوجي بتاع الحشرات و تصنيفات و تقسيمات الحشرات اكيد و علم بيئه الحشرات وعلم الطفيليات والوبائيات والتحاليل الطفيليه و الفيسيولوجي بتاع الحشرات ومكافحه الافات والسيطره عليها و المناعه و الميكروبيولوجي و الباثولوجي للحشرات و علم السموم و شغله في معامل البحوث الزراعيه و معامل التحاليل و الشركات زي الادويه

قسم كيميا : و ده برضه من افضل الاقسام لعلمي رياضه و اكيد برضه ينفع للي في علمي علوم زي ما قولنا و الكيميا بقي انتو عارفنها عضويه و حراريه و كهربيه و تحليليه و حاجات كتييييييييييير هتدرسوا كيميا لحد ما تحلموا بيها و انتو نايمين :smiley: و شغل القسم ده بقي في كل شركات مصر مفيش شركه من غير كيميائي من ادويه و اسمده و مستحضرات التجميل و الشيبسي و البيبسي و كل حاجه لازم يدخل فيها كيميائي و طبعا ليه معامل تحاليل برضه يشتغل فيها

وفيه قسم كيميا وفيزيا : ده بقي قسم مخلط بين الكيميا و الفيزيا نص مواده كيميا و نصها فيزيا و شغله بقي زي اي قسم بيدرس كيميا بقي في معامل التحاليل و شركات الادويه و الاسمده و نفس الكلام اللطيف اللي حفظناه :sweat_smile: و بيشغل بقي في الفيزيا في معامل الابحاث و شركات الالكترونيات و الحاجات ديه بقي :smiley: و القسم مالهوش شروط تختار اي مادتين و تطلع تانيه و تدخله علي طول..

قسم بحار: بيدرس علوم البحار بكل تفاصيها .. وبيأهلك انك تشتغل في مجال البحوث الاساسيه والتطبيقه في مجال علوم البحاروبتدرس فيه الكوارث الطبيعيه البحريه والظواهر المختلفه وبتدرس الشواطيء المرجانيه والرسوبيات وقاع البحر وازي تدور عن مصادر للثروه المعدنيه. وعندك اكتر من مجال ومكان تشتغل فيه بعد ما تتخرج زي المحميات الطبيعيه وشركات البترول ومراكز الغوص وشركات أعالي البحارو محطات المياه والتحليه ومصانع الأدويه والمنظفات والمزارع السمكيه

وشركات تصدير المنتجات البحريه وشركات تصنيع الأسماك

والمركز القومي للبحوث وزارة شئون البيئه

والقسم هتلاقيه في جامعه بورسعيد

قسم اتصالات : القسم ده مش موجود في مصر كلها غير في جامعه القاهره المفروض المفروض انه قسم حلو جدا جدا بس للاسف البكارليوس بتاعه ناقص و بيحتاج خريج القسم انه ياخد دبلومه فيزيا اتصالات و هي مش متوفره و صعب توفيرها كمان و شغله بقي هيبقي في معامل الابحاث و دكتور جامعي او مدرس بعد سنتين تربيه

وفيه قسم جيوفيزيا : الجيوفيزيا هي تطبيق لقوانين الفيزيا علي الجيولوجيا اللي هي علوم الارض يعني و هي بقي في شغله تعتبر تنقيب اولي قبل ما احفر عشان اطلع الحاجه اللي انا عاوزها من تحت الارض ( بترول - مياه - معادن - ......... ) بشتغل شغل الجيوفيزيكس اللي هي زي الاستجابه الكهربيه او المغناطيسيه للارض و استخدم موجات السزميك و الجرافيتي و كده عشان اعرف فين المكان الغريب اللي في استجابه مختلفه عن اللي حوليه فاكيد المكان ده هو اللي فيه الحاجه الغريبه اللي انا عاوزها ( البترول و غيره ) و طبعا مطلوب في الشغل في شركات البترول و شركات المياه و تبع الاثار كمان بس البترول هو الاكثر شيوعا

وفيه قسم هتلاقيه في علوم القاهره اسمه بيوفيزياء : والبيوفيزيا هي علم قائم بذاته والقسم بيستوعب لحد 50 طالب و عندنا في علوم القاهره تم اعتماد أربع تخصصات رئيسية وهى : البيوفيزياء الجزيئية و البيوفيزياء الطبية و البيوفيزياء النظريه و البيوفيزياء البيئية..

وقدامك اماكن كتير ممكن خريج قسم بيوفيزياء يشتغل فيها زى المعهد القومى للأورام و مستشفى القصر العينى ,,

و المعهد القومى لعلوم الليزر والمركز القومى للبحوث ,, و معهد بحوث امراض العيون ,, و الوكالة الدولية للطاقة

الذرية و مركز البحوث النووية ..

وممكن كمان تشتغل اخصائى التصوير الإشعاعى و العلاج الإشعاعى فى كذا مكان زى مستشفى القوات المسلحة و

مستشفى 57357 و كايروسكان و ألفاسكان و اى مستشفى تانى و كمان ممكن تشتغل فى الطاقة النووية و الذرية.

دول كانوا التخصصات العامه او الاساسية الي ممكن تلقوها في معظم الجامعات .. فيه تخصصات تانيه بتبقي خاصه وبفلوس وبتلاقيها في جامعات قليله

عندك زي

1- قسم بيوتكنولوجي:

ده قسم جديد و مش موجود في اي جامعه حكوميه في مصر غير القاهره و ممكن تلاقيه ممكن في الجامعات الخاصه(جامعة مصر للعلوم والتكنولوجيا) بس نادر جدا القسم ده لعلمي علوم و رياضه بس بنسبه 2 : 1 يعني بياخد عدد من علمي علوم ضعف عدد الطلاب من علمي رياضه , فرص شغله موجوده في الشركات زي الادويه والشركات الصناعيه زي الالبان و المأكولات وكذلك في المستشفيات لعلاج الامراض الوراثيه وبرضه عندك استخدام تطبيقات البيوتكنولوجي في الصناعه و الزراعه و التحاليل الطبيه و في تطبيقات كتير موجوده..

زي العامل الوراثي في النبات والحيوان والانسان

طبعا القسم خاص المصاريف بتاعته 9 آلاف جنيه في السنه + 10% زياده كل سنه و لما تنسيقك يجيب علوم و عاوز تخش القسم ده و انت بتقدم بتقول للشئون و انت بتسلمهم ورق التقديم انك عاوز تخشه لأنك هتخشه من سنه اولي علي طول و بيبقي فيه انتر فيو كده بسيط

وفيه قسم علوم البترول :

ده برضه من الاقسام الجديده نوعا ما بس موجود في كذه كليه تانيه زي علوم ااسكندريه والسويس وعين شمسو كام كليه تانيه خريج القسم ده مش بيبقي مهندس بترول زي ما الناس فكره لأ بيبقي جيولوجي برضه و الفرق بينه و بين اقسام جيولوجيا العاديه الموجوده في الكليه ان قسم علوم بترول متخصص في دراسه علوم البترول بس لكن الجيولوجيا بترول و مياه و معادن و حاجات كتييييييييييييييير و كمان شركه شلمبر جير ( من اكبر شركات السيرفيس كومباني :smiley: ) الشركه المفروض انها بترعاك و بتوفرلك رحلات (بس الرحلات برضه بيطلعها اقسام جيولوجيا) و بتوفرلك فرص تدريب كتير (لأن اقسام جيولوجيا العاديه بتوفر فرص تدريب بس في تالته بس) ده توفير منهم لكن لو اي حد يقدر يجيب فرص تدريب لنفسه في اي وقت عادي و الشركه كمان بتوفر فرص شغل للاوائل

طبعا القسم خاص المصاريف بتاعته 8 آلاف جنيه في السنه او ١٦ الاف بيختلف من جامعه التانيه عموما + 10% زياده كل سنه

اخر حاجه في الليله ديه الي عارف اني طولت فيها وقرفتكم

فيه كليه اسمها علوم بنات مش موجودة غير في عين شمس

واكييد واضح انها للبنات وبس .. بس فيها حاجه كمان مختلفه عن الباقيين غير انها للبنات بس وان فيها قسم مش موجود الا في علوم بنات الي هو قسم التغذية وهو قسم مزدوج كيميا حيوي وتغذية وقسم كيميا حيوي ده اعلي من اعلي الاقسام في علوم

اخر حاجه .. زي ما انتو شوفتوا الكليه اد ايه واسعه ومتشعبه وكل قسم ليه فرص شغل واتنين وتلاته .. بكرر تاني الكلية مهيش رجل المستحيل وكلام الاحباط الي حواليها ده ملوش اي لزمة لان لا هتلاقي كليه سهله ولا هتلاقي كليه وبيططبوا عليك فيها .. كل حاجه صعبه والي عايز يوصل عمره من غير ما يطلع عينه

اتمني إنكم تستفادوا من الكلام ده حتى لوحاجة بسيطه و يساعدكم إنكم تمشوا فى أكتر طريق دراسى مناسب ليكم, سواء عندنا فى علوم أو أى كلية تانى .

كلية_التمريض

بفتكر دايما كلمه اتقالتلي في يوم من الايام

"مهنة التمريض من أرقي المهن علي وجه الأرض .. كفايه عليك وانت بتشوف ابتسامه على وش المريض لما بتتخفف عنه الالم او بتساعده وبتنقذ حياته"

"كلية تمريض" .. كلية مهضوم حقها وسط الكليات كلها .. ودايما المقارنه بينها وبين طب عمرها ما بتبقي منصفه .. مع اننا لو حسبنا الامور بشكل صح .. بعيد عن الي اتربنا عليه والي المجموع والتنسيق فرضه.. فهتلاقي ان كلية زي دية من غيرها منسواش حاجه .. ولا حتى اي دكتور هيعرف يكمل شغله

مبدأيا كده كلية تمريض موجودة في معظم المحافطات تقريبا زي (القاهرة واسكندرية وطنطا والمنصورة وعين شمس و اسيوط والمنيا وبني سويف وسوهاج والفيوم … وغيره)

ونظام الكلية بيتخلف من جامعة للتانيه يعني عندك جامعة المنصورة وكفر الشيخ واسكندرية ماشين بنظام الساعات المعتمده والي اكيد ليه مميزاته وعيوبه .. وفيه كليات تانيه ماشيه زي اي كلام من غير النظام ده

وفي التنسيق غالبا كلية تمريض بتكون فوق ال90% لطلبة علمي علوم بس اكييد .. وفي التنسيق بيبقي بعد بيطري وقبل علوم .. وغالبا بتبقي مرحلة تانيه

واكيد مش محتاجين نوضح ان الكلية للولاد و البنات .. مش الفكره الي عند نصنا انها للبنات بس D:

الكلية خمس سنين .. ٤ سنين دراسه وسنه امتياز

واغلبها بتبقي عمليه .. يعني مطلوب منك حضور كل يوم .. وبتنزل المستشفي وبتشوف حالات وبتتعامل معاها

طيب .. كلية تمريض المواد فيها بتتقسم قسمين : مواد تمريض (يعني في صميم المجال) و مواد غير تمريض (يعني المواد الي معظم الكليات الطبيه بتاخدها)

يعني فمواد تمريض في مادة اسمها أساسيات تمريض معاك كل سنة و لو شلتها بتشيل السنة كلها يا حلو حتى لو مش شايل مواد غيرها ودا من العيوب طبعا

والمواد الي مش بتاعت تمريض بتبقي تقريبا زي مواد صيدله الي هما فارما وبايو .. ومواد علاج طبيعي وطب بشري .. وفسيولوجي وتشريح وهستولوجي وميكرو.. بالبلدي كداا بنلم من كله يعني

وبتدرس طول الاربع سنين .. التخصصات والاقسام الي بتلاقيها بعد كده لما تيجي تشتغل (زي باطنة وجراحه و نساء وتوليد وطوارئ وطب شرعي واطفال وعظام ورمد)

وخامس سنة بقا بتبقي سنة الامتياز مش بتكون دراسة دي بتكون تدريب عملي في المستشفي علي كل حاجة أخدتها في الكلية وبيقي ليك مرتب 250 تحت اسم "مكافأة" ..

وممكن تستلم الامتياز علي طول بعد ما النتيجه تظهر او ممكن تأجله وساعتها لو اجلته تقدر تشتغل في اي مستشفي خاصه والمرتب فيها بيقي حلو وجدا وطلبة الامتياز بيقوا مطلوبين

وبعد الامتياز على طول هيبقي ليك تكليف او بيجيلك جواب تعيين بمعني اصح في المستشفيات الحكومي.. ودا هتاخد فيه حوالي 1200 في الشهر .. وده بيقي شغلك الاساسي بعد كده وبتتثبت في المستشفى كأخصائي تمريض وممكن تشتغل اخصائي في اي قسم مش شرط قسم معين

والكلية عموما بتتطلع منها بمؤهل عالي "بكالوريوس تمريض" والتعيين والتكليف بيجيلك كأخصائي تمريض مش ممرض .. بمعنى انك بتكون مشرف على طقم التمريض في قسم من أقسام المستشفى .. اي قسم بقى من الي كنت بتدرسهم طول الاربع سنين زي باطنة او جراحة او اطفال او اي حاجه .. فانت بتبقي مشرف علي الطقم الممرضين الي في القسم ده الي بيبقوا متخرجين من معهد او مدرسه او اكاديميه تمريض

والفرق عموما بين التمريض والطب

ان الدكتور بيشخص الحالة وبيوصف العلاج بس اخصائي التمريض بيراجع العلاج والتشخيص .. وبيقي مسؤول عن كل طقم الممرضين عشان كده لازم يبقي فاهم في كل تفصيله في شغل الممرضين عشان لو فيه غلط يقدر يلحقه ويحاسب عليه الممرض

يعني عندك مثال علي الي بنقول .. اخصائي التمريض في العمليات والتعقيم بيقي نوعين .. النوع الأول ده بيساعد الدكتور أثناء العملية ليس إلا .. والنوع التاني مسؤول عن تجهيز اوضه العمليات وتعقيمها وتعقيم الأدوات الي فيها وتجهيز المريض يعني بيتعب شوية في شغله

وزي ما قلنا ان التمريض بيدرس نفس مواد طب بس على اصغر شويه ومش بتعمق زي طب زي ما بالظبط بتوع طب بيدوسوا مواد تمريض على اصغر شويه

الكلية مستقبلها كويس جدًا لانك بتتخرج و تشتغل علي طول وتتثبت في شغل تبع الحكومه .. دا غير انك ممكن تنزل تشتغل او تتدرب وانت بتدرس عادي في اي مستشفي خاصه

طيب نيجي لبعد التخرج وبعد التكليف .. هنلاقي ناس بتقف لحد هنا وتقولك انا شغال وبقبض وفيه ناس مش هتكتفي بكدا وهتكمل

والناس الي بتكمل ديه بيقي قدامها مليون سكه والتانيه تكمل فيها

أول حاجة هيا دبلومة تمريض عسكري وبتبقي بعد الامتياز وعباره عن ٦ شهور .. وبيقي قدامك عموما الجيش او الشرطه علي حسب ما تحب .. وبعدها بتشتغل في مستشفيات الجيش او الشرطه .. والموضوع ده حلو جدا وفلوسه حلوة "حاجة فُل أهي "

وفيه غير كده كمان دبلومة تحاليل طبيه وبعدها تقدر مع نفسك تفتح معمل تحاليل

وعندك سكة الماجستير .. وبتبقي ٣ سنين .. بتدرس فيه فرع من فروع التمريض .. وبيديك فرصه انك تدرس في الكلية .. ويزودلك في مكانتك ومرتبك لو فكرت تسافر

تالت حاجة هي الزمالة : و دي دراسة بتعملها لما تخلص الكلية:

زي زماله المعهد البريطاني وديه مرتبتها بتوصل ٣ الاف واكتر وديه كويسه جدا

وفيه زمالة مكافحة العدوى بتبقي مدتها 3 سنين وبعدها بتكون استشاري مكافحة عدوى وبيكون ليك وضعك في المستشفي و مرتب كويس كمان

وعندك زمالة المعلوماتية الصحية وبتبقي سنتين و بتتخرج منها أخصائي معلوماتية صحية و بيكون مجالك في الكمبيوتر information technology جوه في المستشفي

وفيه زمالة الإرواء قلبي و دي بتتخرج منها أخصائي إرواء القلب ودا بيقي موجود في عمليات القلب المفتوح لما بيوقفوا القلب بيشغل جهاز القلب الصناعي .. ومهمته بتبقي تقيله لانه هو الي بيدي الاوامر ولازم يبقي عارف ازي يتعامل مع الجهاز كويس

وفيه زمالات تانيه زي زماله الاطفال والتخدير

اخر مجال عندك هو الدبلومة .. وديه بتبقي مكلفه شويه واقل فايده من الحاجات التانيه الي قلنا عليها .. بس عموما الدبلومات زي مكافحه العدوي infection control ويتبقي ٦ شهور او دبلومة الاداره او الجوده

وبشكل عام الكليه ديه من اكتر الكليات الي ليها مجالات شغل .. مش زي ما احنا مفكرين نهائي

يارب نكون غطنالكم كل حاجه في بالكم عن الكلية .. وربنا يكتبلكم الخير في الي جاي

كلية_سياسةواقتصاد

السياسة…. طبعا كل الناس واي حد بقى يتكلم فلسياسة واي موضوع نفتحه ونتكلم فيه لازم نجيب سيرة السياسة واول مانبدا نتخانق نرد علي بعض ونقول ايه ياعم محسسني انك متخرج من كلية سيساسة واقتصاد

ماتيجوا نشوف الكلام دة صح فعلا وان خرجين سياسة واقتصاد بيكونوا دارسين كل حاجه عن السياسة ولا دة بس مجرد كلام بيتقال ساعة الخناقة في كلامنا

"كلية سياسة واقتصاد" ممكن تدخلها من ادبي او علمي علوم او رياضه

في مصر موجوده في تلت جامعات .. القاهرة واسكندرية وبني سويف اقدمهم طبعا هي القاهرة اول دفعه اتخرجت من كليه سياسة واقتصاد جامعة القاهرة كانت سنة ٦٣

نبدأ كده الاول بجامعه القاهرة

بتختار من قبل ما تدخل الكلية شعبة من تلت شعب (عربي او انجليزي اوفرنساوي) ولو اختارت شعبه معينه فمعني كده انك هتدرس كل مواد الكليه بلغه الشعبه ديه

ولو اخترت شعبة فرنساوي بيكون ليك امكانية انك تاخد باكلوريوس مزدوج من جامعه القاهرة وجامعة بانتيون سوريون بفرنسا

وشعبة انجليزي بتعمتد على درجتك في الانجليزي في ثانويه عامه .. يعني لازم متكنش جايب اقل من ٤٢ في الانجليزي عشان تقدر تدخلها .. ده غير انك لازم تعمل امتحان قبل ما تدخل الشعبة

والكلية في سنة اولي بتبقى من غير تخصص ولا حاجه .. اما في تانيه بيكون في 3 اقسام رئيسية تختار واحد فيهم يااما سياسة او اقتصاد او احصا .. وبتختار الي انت حابه منهم يعني مش بتدخل في حاجه منهم لا عشان التقدير في اولي ولا عشان الشكل ولا اللبس ولا اي حاجه خالص .. وده بيكون تخصثك الاساسي الي بيتكتبلك في شهاده تخرجك

عشان عندك في سنة تالته بقى بيكون فيها 5 اقسام فرعية بتختار واحد منهم مع التخصص الرئيسي بتاعك وهما اداره - حاسب - سياسه - اقتصاد - احصا

يعني الي متخصص من سنة تانيه اقتصاد بياخد في سنه تالته تخصص فرعي اداره او حاسب او اقتصاد او احصا .. اي واحد فيهم .. زي ما يحب يعني

وبشكل عام فانت هتدرس 5 مواد بس في الترم وبيكونوا مواد منهية يعني لو مخنوق من مادة ولا مش حاببها هتخلصها وترتاح في نهايه الترم ومش هتاخدها تاني

في سنة اولي زي ماقولنا هتدرس مواد في كل الجوانب ومداخل لكل علم عشان تساعدك تختار التخصص في سنه تانية

وعموما الكليه بتدرس فيها مواد زي قانون ومحاسبه ودراسات جدوي وتاريخ فكر سياسي واقتصادى وبتتعمق فى مواد السياسه والاقتصاد والاحصاء والادارة

وعموما لو حابب انك تعرف المواد كلها بااتفصيل فعندك الموقع الرسمي للكليه سواء فرع القاهره او اسكندريه او بني سويف .. هتلاقي فيهم كل المواد الي كل سنه بتاخدها بالتفصيل

نيجي بقى لجامعة بني سويف واسكندرية هي نفس الكلام واسلوب الدراسه والتخصص زي القاهرة بفرق واحد بس.. انهم بيكون فيهم شعبتين بس هما عربي وانجليزي

واسكندرية بقى فهيا حاجة حلوة انها لسه فاتحه جديد .. يعني فرص التعيين اكتر وعدد الطلبه اقل وفيها اهتمام فعلا انهم يوصلوا بيها لمستوي القاهره .. بس في المقابل بيقي فيه مشاكل احيانا في هيئه التدريس عشان مفيش دكاتره كتير متخرجين من الكليه فبيجي اوقات دكاتره متخصصين في المواد الي بتتاخد من كليات تانيه زي تجاره وحقوق مثلا او دكاتره من سياسه واقتصاد في القاهره .. واوقات لما بيقي عندك مواد اختياريه .. مبيخلكوش تختار وبتنزل ماده اجباري عشان مش موجود دكاتره يقدروا يغطوا كل المواد

وبالمناسبه يعني سياسه واقتصاد اسكندريه هيا ككليه جديده .. بس اقتصاد وسياسه كانوا اقسام في كليه تجاره وليهم خرجينها ودكاترتهم وهما دول الي الكليه بتستعين بيهم دلوقتي في التدريس

بالنسبة بقى لكل قسم ودراسته ومجالات شغله وركز اوي في حكايه الشغل ديه عشان على حسب القسم الي بتدخله بتحدد بعد كده هيبقي كاريرك وطبيعه شغلك

نتكلم اول حاجه في قسم اقتصاد مثلا

اكتر قسم ليه شعبية وبيدخله طلبة كتير بالرغم انه صعبة شويه .. بس دراسته بتبقي عمليه اكتر منها نظريه وفرص شغله كتير وواسعه . واقتصاد كشعبة فيها نسبة فهم وفيها حفظ برده .. ورسومات ومنحنيات ومسائل.. مش زي اقتصاد ثانوية أكيد..

ونيجي للشغل فممكن تشتغل في البنوك والبورصة والوزارات زي وزارة التجارة او وزارة المالية والتخطيط والصناعة او ممكن شركات استثمار او شركات متعدده الجنسيه او مراكز البحوث والصحافه والاعلام ولو حظك حلو بقى يا معلم هتشتغل في شركات بترول ودة طبعا هيكون لعب الزهر معاك اوي

اما بقى قسم سياسة

فهو تاني قسم ليه شعبية .. ودراسته بتبقي نظري اكتر من العملي .. والمواد بتعته داسمه شويه .. وببتعمق اكترف نظريات وافكار سياسيه سواء القديمة اوالجديده

وسياسة كشعبة أكيد فيها حفظ كتير .. لكن فيها متسع تكتب بفهمك ورأيك، مش بتصم الكلام أكيد… وبيطلب منك في معظم الاوقات ابحاث في اغلب المواد الي بتاخدها

وبالنسبة للشغل فعندك مراكز البحوث سوا الخاصه او الي بتبقي تبع الدولة او وزاره الخارجيه طبعا والسلك الدبلوماسي زي ما هو معروف.. او السفارات او اي مؤسسه سياسيه زي البرلمان او المؤسسات التشريعيه والتنفذيه .. او عندك الاحزاب السياسيع في اداره حملات الانتخاب وكده .. او تشتغل في حاجات التثقيف والتعليم السياسي والتربيه على حقوق الانسان

ده غير شغل الاعلام والفضائيات

شوفتم طلع الكلام اللي بيتقال علي الخرجين كلام صح وانهم فعلا بيدرسوا كلام صح عن السياسة ؟

واخر قسم وهو الاحصا

وبالمناسبه يعني هو مش موجود غير في القاهره بس.. هو تقريبا اصعب قسم وعشان كده عدد الناس فيه بتبقي قليله .. بس الطف حاجه فيه ان دراسته اغلبهم عمليه والنظري بيقي بسيط .. ولو انت اتشطرت فيه نسب التعين بتبقي اكبر عشان مفيهوش ناس كتير .. وبالنسبه للشغل فميش شركه كبيره مش هتلاقي فيها قسم احصا

ومجال التدريس والسلك الاكاديمي ده موجود للتلت اقسام اكيد ..

عموما يعني مجالات الشغل كتير زي مااحنا شايفين بس لازم متستعجلش ولازم تفهم ان الشغل دة محتاج منك شوية مجهود عشان توصله .. الموضوع مش مستحيل يعني

والكليه عموما مش محتاجه كورسات في المواد .. المواد متعتبرش صعبة بدلالة إن ناس من بره الكلية ممكن يقروها ويتميزوا فيها كمان..ربس محتاجة جهد فردي، وانك تشتغل على نفسك .. ثفافة، متابعة أخبار، كورسات أونلاين قراية كتب، مقالات.. مهارات تحليل ونقد .. الكلية لوحدها مش هتديك ولا هترفعك..لازم تشتغل على نفسك.. لأن اللي بتدرسه لوحده سهل يتنسى باعتباره نظري ..زائد إنه أكيد مش كفاية لو عايز تتميز..

والكليه بشكل عام وفيها جانب شغل عملي جنب النظري الي بتدرسه.. زي الأبحاث وكده وده كتير بس ممتع وبيديك مساحة تشتغا بجهدك وتستنبط وتدور..

ونيجي بقي للتنسيق .. والي اكيد بيتغير كل سنه .. بس هو اعلي تنيسيق للكليه عموما بيبقي من ادبي وبعديها علمي علوم وبعديها علوم رياضه .. والقاهره بتاخد اعلي مجموع وبعديها اسكندريه وبعدهم بني سويف .. وممكن نحط رينج عام لتنسيق الكليه من ٩٧٪‏ ل ٩١٪‏ .. وده بالنسبه للتلت شعب بشكل عام .. مش لادبي او علمي بس

وبالنسبه للناس الي كانت عايزه تدخل سياسه واقتصاد وملحقتش مجموعها او لو حد حابب المجال بس في نفس الوقت عايز يدخل كليه تانيه .. فانت عندك الدراسات الحرة وانك تشتغل على نفسك لوحدك .. وبالذات في كليه زي سياسه واقتصاد الموضوع هيبقي سهل لان الكليه مش عمليه اوي ومش محتاجه تطبيق.. كل الموضوع إنها محتاجة جهدك وشغفك.. وكتير من اللي بيقدموا ف الخارجية مش بيكونوا خريجين من الكلية أصلا .. فبيقي عندك مثلا دبلومات في كليات سياسة واقتصاد..

او عندك ممكن تلاقي قسم اقتصاد في بعض الجامعات في كلية تجارة .. وعندك التعليم الحر مع نفسك زي الكتب وموجودة ع النت كتير، والوثائقيات، والكورسات على موقع كورسيرا مثلا، واللغات طبعا .. ده غير الstudent activists ونماذج المحاكاه الي بتبقي ماليه الكليات.. والي لو اشتركت فيها هتقدر تعوض دراسه الكليه وهيدوك خبره وعلم وممارسه

ومن الحاجات المضحكة هي ان اسم الكلية بيختلف من جامعة للتانية يعني في القاهرة هتلاقي اسمها اقتصاد وعلوم سياسية اما بقى اسكندرية وبني سويف هتلاقي اسمها الدراسات الاقتصادية والعلوم السياسة ازاي بقى الكلام دة مش عارفين لحد دلوقت؟

بس هما ككليات فالتلاته متساويين .. اكييد القاهره اعرق عشان اقدم ..واسكندريه وبني سويف يعتبروا لسه كليات ناشئه .. بس خلينا نقول انهم بيجتهدوا عشان يبقوا كويسين ويوصلوا لمستوي القاهره

وبالنسبه للتوزيع الجغرافي .. فمينفعش انك تحول او تدخل فرع للكليه غير الي متحددلك .. يعني مثلا لو انت من كفر الشيخ وتوزيعك الجغرافي جه في جامعه اسكندريه وانت عايز تدخل جامعه القاهره .. فمينفعش تحول سواء من اول سنه او حتى بعد ما تقضي سنه او اتنين في الكلية

وحكايه ان دايما شغل سياسه واقتصاد بيحتاج واسطه .. فخلينا في النقطه ديه بالذات نقول ان سواء سياسه واقتصاد او غيرها الموضوع مش هيفرق حاجه .. الواسطه ممكن تكون في كل مكان واي مجال .. واديك شفت مجال الشغل في سياسه واقتصاد مفتوح وواسع لاهو معتمد على السلك الدبلوماسي بس ولا وزاره الخارجيه .. عندك اكتر من مكان.. والي عمرهم ما هيفكروا يرفضوا واحد مثقف ومطلع ومعاه اكتر من لغه واشتغل علي نفسه جدا

عموما الشغل ده رزق .. وسعي منك .. اعمل الي عليك وربنا مبيخذلش

كلية_اعلام

اممم كلية اعلام؟! .. اه الي بيقوللها كليه البنات التانيه في مصر D:

ما علينا من جو العنصرية ده والي مش هنقدر نوصل فيه لنتيجه لصالح حد عشان الواقع ممكن يذل اي ولد يدخل في مناقشة في الموضوع ده

ممكن نقول ان كليه اعلام من اكتر الكليات الي العين عليها .. هيا من الكليات القليله الي في مصر ممكن تدخلها من ادبي او علمي رياضي او علوم .. وفي نفس الوقت تعتبر كلية من كليات القمة وشيك وبنت ناس وكل حاجه :smiley:

بس قبل ما ندخل في تفاصيل اعلام فيه معلومة ناس كتير متعرفهاش وهيا ان اعلام موجوده في تلت جامعات حكوميه في مصر

جامعة القاهرة - وجامعة جنوب الوادي - جامعة بني سويف ده غير اعلام الازهر طبعا

يعني ليها اكتر من فرع مش فرع جامعة القاهرة بس

اعلام القاهرة وبني سويف مقسومه لاعلام عربي واعلام انجليزي

واعلام جنوب الوادي فيها اعلام عربي بس

اما الاقسام والتخصص في اعلام فهو واحد سوا لو انت اعلام عربي او انجليزي .. بيبقي عندك ٣ اقسام (قسم اذاعة وتليفزيون وقسم صحافة وقسم وعلاقات عامة واعلان) والتخصص فيهم بيبدأ من سنة تانيه

وعشان تدخل قسم اذاعه وتليفزيون او صحافه لازم تعمل انترفيو عشان تتقبل بس علاقات عامه مثلا بتدخلها عادي من غير انترڤيو .. والانترڤيو عموما مبيبقاش رخم زي ما الناس كلها بتفتكر .. كفايه عندك ثقتك بنفسك وثقافتك

وبالنسبة لاعلام جنوب الوادي ففيها التلات الاقسام دول بس زيادة عليهم فيه قسم اعلام الكتروني الي بتدرس فيه وسائل الاعلام بس الي موجوده من خلال النت زي الصحف الالكترونية مثلا .. وبمناسبه اعلام جنوب الوادي فمقر الكليه نفسه موجود في قنا

من الحاجات اللطيفة جدا الي هتلاقيها في اعلام انها من الكليات القليله الي ممكن تدخلها وتخرج منها وعمرك ما تفكر انك تاخد كورس في ولا مادة .. بس ممكن على الجانب العملي او بره الكلية فهتبقي محتاج كورسات كتير في المونتاج والفوتشوب وورش في الكتابة والتسجيل عشان تتطور من نفسك .. وكل ده هتلاقيه بسهوله حوليك وموجود بس لو دورت كويس

ومدام قلنا كده فمتخليش دماغك تروح لبعيد وتفتكر ان اعلام كيوت وسهله .. وافتكر انهم خدعوك وقالوا "اعلام كلية نظرية بالدرجه الاولي" فبالله عليك الي يقولك كده اخبطه بأي حاجه في دماغه وريحنا :smiley:

طيب نتكلم بجد اعلام مش كلية معقدة ودراستها هتلاقي نصها نظري بس هتلاقي في المقابل assigments كتيرة عملي تحببك في الكلية .. وهتلاقي ان الكليه الصعوبه بتاعتها بتتدرج معاك .. يعني اولي اسهل سنه وكل شويه بتصعب لحد ما توصل لليڤيل الوحش في رابعه

اول سنة بتاخد مواد عامة شوية يعني عربي وانجليزي ونبذه عن كل قسم.. بعد كده من سنة تانية بتبدأ تاخد مواد اجباري كل الاقسام بتاخدها زي بعض ومواد تانية حسب القسم الي انت فيه .. المواد المشتركة مثلا بتبقى زي رأي عام واعلام ومجتمع والمواد التانية الي حسب القسم زي نشر صحفي اوالقاء وصوتيات اوادارة اعلان وتسويق

اعلام ماشية بنظام الساعات المعتمدة

وبيبقي عندك ست مواد كل ترم كل ماده ليها تلت ساعات في الاسبوع متقسمه علي محاضرتين طول الاسبوع او محاضرة واحدة بس زي الوضع في جنوب الوادي و بني سويف

وفي اعلام القاهره انت الي بتختار المواد الي بتاخدها كل الترم من وسط المواد المتاحة ليك ومع الدكتور الي تختاره ..

اعلام من الحاجات الممتعه فيها والي اتطورت في اخر كام سنة . وهيا "التدريب" وبالذات لو انت قسم اذاعه وتليفزيون هتلاقي بيتوفرلك استوديو متكامل وبتدرس بجد اساسيات الاخراج والتصوير والمونتاج وازي تقف قدام الكاميرا وتعمل نشرة اخباراو برنامج من الالف للياء .. وقسم صحافه بيقي تدريبهم عملي في جرنال صوت الجامعة، بيطبقوا فيها كل حاجه ليها علاقه بالصحافه يعني ازي يعملوا خبر وتقرير وازي عملية النشر في اي جرنال بتحصل .. وعلاقات عامه الي ممكن نقول عليه مظلوم شويه في حكايه التدريب بس بياخدوا بردوا تدريب علي برنامج فوتشوب

واعلام بني سويف بتوفر للطلبة فيها كمان تدريب في ماسبيرو ولطلبة علاقات عامة بيقي ليهم تدريب في شركات

غالبية الناس الي خلاص بتقرر تدخل اعلام بتحتار في حاجه تانية اكبر وهيا انها تدخل عربي ولا انجليزي .. هو الموضوع بيرجع ليك انت في المقام الاول وانت حابب تدرس بانهي طريقة .. اعلام انجليزي هتطورلك لغتك اكيد .. وفيها كمان قسم genral ممكن تجمع فيه بين انك تدرس اكتر من تخصص سوا زي صحافة وعلاقات عامة مثلا سوا .. بس في المقابل اعلام انجليزي مفيهاش تدريب ومبتتوفرش فيها الامكانيات الي بتتوفر لعربي .. واكيد بيبقي التعب اكتر في الاول لو دخلت انجليزي وانت متعود طول عمرك تدرس بالعربي

وبالنسبة للمصاريف فاعلام انجليزي بتبقي حوالي 8500 وعربي مبتعديش ال300

وعشان تدخل انجليزي لازم متبقاش جايب في الانجليزي في ثانويه عامه اقل من ٤٦ ده غير ان فيه امتحان الاول بتمتحن وبيقي عليه ٥٠ درجه .. الموضوع عموما مبيبقاش صعب وغالبا بتتقبل حتي لو انت جايب اقل من ٤٦ في ثانويه عامه

من الاشاعات المغرضة الي بتتقال عن اعلام انها كليه ملهاش مستقبل وهتتخرج مش هتلاقي شغل .. فحاول الي يقولك كده تركنه على جنب .. عشان لو انت عندك شغف وحابب المجال ده هتلاقيك من اول او تاني سنة في الكليه بتتدرب في مكان او اتنين .. ولو انت شغال علي نفسك طول الاربع سنين هتبقي عملتك سي ڤي وخبره كويسه من قبل ما تتخرج

وعموما اعلام مجال الشغل فيها مفتوح ومش مرتبط بالقسم الي انت فيه او الي بتدرسه يعني ممكن تكون في قسم علاقات عامه واعلان وبتشتغل صحفي عادي وطبيعي جدا

فيه ناس كتير ممكن يكونوا بيسألوا نفسهم من اول ما بدأوا يسمعوا الحلقه "هيا كلية اعلام ديه بطلع منها اشتغل ايه بالظبط؟" .. فالسؤال ده ليه اجابات كتير منها صحفي ، مخرج ، مصور، مُعد ، مونتير

يعني قدامك جرايد وشبكات الكترونية اوتليفزيون وراديو

وممكن كمان تجمع بين الجزء النظري والعملي زي إنك تشتغل في بحوث الرأي العام مثلاً للي بتدرس اتجاهات الرأي العام لقضية معينة، او قدامك سكة الأفلام التعليمية والوثائقية

او ممكن تاخد مجال الاعلانات والماركتينج او تشتغل في جزء العلاقات العامة او قسم إدارة الأزمات لاي شركة كبيرة

من اكتر الاسئلة الي اتسئلت عن اعلام وهو التنسيق بتعها : فمبدأيا اعلام القاهرة بيتبقي اعلي حاجه في التنسيق وبعيها بني سويف وبعدها جنوب الوادي.. والتنسيق اكيد مش ثابت كل سنة بس ممكن نحطله range معين فعندك اعلام القاهرة من ادبي بتبقي حوالي ٩٦٪ وجنوب الوادي 93.3%

واعلام بني سويف من ادبي بتبقي ٩٣.٩٪‏

وعملي علوم 93.4%

وعلمي رياضة 88.5%

خلينا نقول الخلاصة: ان اعلام كليه مش معقدة سوا في موادها او في دراستها يعني بتقدر بسهوله قبل الفاينال والميدتيرم تلم نفسك وتجمع المواد وتخش تجيب امتياز .. وفي نفس الوقت كلية ممتعة وبتستفاد منها بالذات في جزء العملي .. ولو انت عندك شغف وحابب مجال الاعلام و اي تخصص فيه .. فالكليه ديه هتحمد ربنا كل يوم انك دخلتها .. وحتي لو دخلتها عشان تنسيقك حدفك فيها فمش هتندم كتير لانها مش هترهققك اوي وفي النص ممكن تحبها .. ولو محصلش وحبتها في تقدر جنب دراستك فيها تتطور نفسك في المجال الي بتحبه

في النهاية أكتر حابو بتميز إعلام مش إنها كلية سهل تتخرج منها بتقدير، ولا إن مجال شغلها واسع وتقدر تنجح فيه لو نميت مهاراتك ، الأهم من كل ده إن الإعلام أمانة ومسئولية عشان هو من المجالات القليلة جداً للي بتأثر على عقل الإنسان ومشاعره وسلوكه وبتأثر علينا كلنا بدرجات مختلفة فلازم تتعامل معاه على إنه رسالة وأمانة قبل ما تبصله إنه مجرد شغلانة كويسة بتديك فلوس ومركز اجتماعي لان في النهاية كل ده فاني ومش هيعيش غير العلم النافع والأثر الطيب للي بتسيبه وراك ...

اقعدوا مع نفسكوا وهاتوا ورقه وقلم وشوفوا ميولكوا وقدراتكم وشوفوا الكلية ديه هتقدملك ايه وهيا ديه الي هتلاقي نفسك فيها فعلا واتخيلوا نفسكوا بعد خمس او عشر سنين من دلوقتي عايزين تكونوا فين .. وهتلاقي ربنا بيهديهك للي فيه خير ليك

٦

كلية_ألسن

طبعا كلنا عارفين الكليه اللي كانوا بيقوللها كلية اللغات والترجمة..

الكليه اللي موجودة فى جامعتين عين شمس والمنيا

لكن فتحت فى كذا جامعة تانية

وبتقبل من علمي علوم او رياضة اوادبي ...

الكلية الي من غيرها مكنش هيبقي عندنا مترجمين بالكم ده في لغاات كتير ...

ايوة بالظبط هيا "كليه ألسن"

الكليه دي هدفها الاساسي هو الترجمة يعني مش زي اداب .. مش مجرد بتدرس لغة بتعمق وخلاص .. يعني الجزء العملي فيها اكتر ومناهجها متطورة اكتر و متماشية مع متطلبات السوق في مجال اللغة .. هتعجبك جدا يعني ..

الكلية اربع سنين

اقسامها ايه بقي..

بص يا سيدي ..عندك..

اول قسم قسم عربي وده بيتقسم لجزئين

جزء للعرب اللي اصلا بيتكلموا عربي

وجزء للأجانب اللي لسه بيتعلموا عربي وبيدرسوا ازاي يتقنوا اللغه ومتبقاش مكسره عندهم

تاني قسم وهو انجليزي ..غني عن التعريف بس يلا مش مشكله.. ده هتدرس فيه اكيد انجليزي .. اه سبحان الله يعني مش محتاجة اهو ..

بعد كده قسم فرنساوي .. نفس الكلام يا باشا مفيش جديد

وعندك بعد كده قسم ايطالي والماني واسباني

وفيه قسم اللغات السُلافية .. ال ايه؟ استني انا هفهمك ده عباره عن شعبتين

شعبة الروسي و الشعبة التشيكية

تامن قسم قسم الصيني

وفيه كمان قسم اللغات الأفريقية ودي برضه بتتقسم لحاجتين:

اللغة السواحيلية ولغة الهوسا

وفيه قسم اللغات السامية اللي هي العبرية

وقسم اللغات الشرقية الإسلامية الي هو فارسي وتركي

واخر قسمين قسم الياباني .

وقسم الكوري .

والاقسام ديه كلها هتلاقيها في السن عين شمس .. بس السن المنيا مش هتلاقي فيها غير انجليزي والماني وايطالي واسباني وفرنساوي وصيني

والاقسام دي كلها في منها الصعب والسهل ..والي اكيد ان الصعب عند حد سهل عند غيره .. فالموضوع نسبي جدا .. وبيختلف من قدرات شخص للتاني .. فما علينا من حكاية سهل وصعب ديه وخلينا نقول ان الاغلب والمتفق عليه ان قسم الكورى واليابانى هما الاحسن كمنهج تعليمي وكنظام ومبيخلوش حد مصري يدخل في نظام القسمين دول.. وهما بردو اعلى اقسام من ناحيه التنسيق الداخلي..

وبعدهم هتلاقي قسم انجليزي وروسي ودول اقسام حلوة برده .. وصيني هتلاقي معاك في الجامعه طلبه صينين فهتمارس اللغه معاهم وتحس كأنك في الصين .. فديه ميزه حلوة في القسم ده وتتضاف لصالحه.. وممكن يعني قسم انجليزي هو الي تلاقي مثلا الطلبة بتعوه بيتعبوا فيه شويه

وعشان متهوش في حكايه التنسيق الداخلي ديه .. فالتنسيق الداخلي هو التنسيق الي الكلية بتحدده لكل قسم

بمعني انك بعد ما خلاص تنسيقك في ثانوي بيدخلك السن .. بعدها علي طول اول ما بتدخل ..

الكلية بتبقي عامله تنسيق تاني داخلي عشان على اساسه تحدد الناس الي هيدخلوا كل قسم .. فانت بتكتب رغباتك وانت عايزه تدخل قسم ايه

والكلية بتختار القسم الي يناسب مجموعك

طيب نيجي بقي للتنسيق الداخلي بالتفصيل .. وايه الشروط عشان تتقبل في اي قسم ..

وخلينا نتفق ان الشروط الي هنقولها ديه بتتغير من سنة للتانية يعني ممكن تزيد او تقل درجه..

وعموما وقبل اواول ما تقدم في الكلية هتلاقي الكلية بتعلن عن شروط كل قسم

فنبدأ بقسم فرنساوي وبيقبل اللي واخدين الفرنساوي كلغة أولى من غير اي حد أدنى في دراجاتهم في مواد اللغات في ثانوي، وبرضه بيقبل اللي واخدينه كلغة تانيه وكانوا في مدارس لغات بشرط انه يكون معاهم شهادة بتثبت انهم كانوا بيدرسوه من ابتدائي

اما قسم ايطالي فبيقبل اللي واخدينه كلغة تانية من غير اي حد أدنى، وبرضه بيقبل اللي واخدين الفرنساوي كلغة تانية بس علي الاقل يكونوا مش جايبين فيه اقل من 40 درجة

الاسباني يا سيدي بقي بيقبل اللي واخدينه كلغة تانية من غير حد أدنى واللي واخدين الفرنساوي كلغة تانية بس ميكونوش جايبن اقل من ٣٩ فيه

وقسم الالماني بياخد اللي درسوه كلغة تانية بس يكونوا جايبين علي الاقل فيه 39 .. اوالي درسوه كلغه اولي .. ولو كان فيه ناس كتير متقدمين للقسم ده فبيفضلوا طبعا الي واخدينه كلغه اولي وبعدين الي جاييبين اعلي درجات فيه كلغه تانيه في ثانوي

وقسم اللغات السلافية .. فالشعبة الروسية بتقبل بس الي كانوا واخدين الانجليزي لغة اولى وجايبين فيه على الاقل ٤٦ .. بس في المقابل شعبة لغة تشيكية فميهاش الشرط ده

نيجي لقسم اللغات السامية (الي هو العبري يعني) وقسم اللغات الشرقية الإسلامية شعبة التركي ودول شرط فيهم ان الي يدخلهم يكون دارس انجليزي كلغة اولى ومش جايب فيها اقل من ٤٢.٥.. بس الشرط ده مثلا مش هتلاقي موجود في شعبة الفارسي الي في قسم لغات شرقية

وقسم عربي هتلاقيه لطيف جدا وملوش اي شروط عشان تدخله

اما قسم الكوري بقي فبيقبل اللي درسوا انجليزي كلغة أولى وجايبين على الاقل 49 فيها

وقسم الياباني بيقبل برده اللي واخدين الانجليزي كلغة أولى وجايبين علي الاقل 49,5 ، وممكن يقبل برضه اللي جايبين 49 فى الإنجليزي عادي بس ده بيقي علي حسب مجموعك الكلي برده

وقسم الصيني بيقبل برده اللي دارسين انجليزي كلغة أولى ومش جايبين اقل من ٤٦.٥

وعندك قسم انجليزي الي لازم تكون جايب 47 علي الاقل فى الانجليزي بتاع ثانوية عامة كلغة أولى

وملحوظه مهمه بالنسبه لقسم انجليزي وصيني .. فالتنسيق الداخلي بتاعهم السنه ديه ممكن يزيد كام درجه .. لانه بقاله كام سنه بيعلي عن السنة الي قبلها .. وعموما برده زي ما قلنا ان الدرجات والشروط بتتغير من سنة للتانية .. فانت تابع كويس وانت بتقدم .. وروح اسأل في الكلية او اتصل بيهم وهيقولولك علي كل التفاصيل

وعموما مش معني ان قسم بياخد اعلي من التاني .. فمعني كده انه احسن او اوحش .. هو الموضوع بيبقي على حسب درجه استيعاب القسم ومحتاجين فيه عدد اد ايه

وطبعا بعد الرغي ده زمانك بتسأل طب ايه هو المجموع تنسيق السن اصلا؟ فبص هو بالنسبة لعلمي علوم وادبي بيبقى حوالي ٩٤٪‏ وعلمي رياضة حوالي ٩١.٧٪‏

الكلام ده اكيد بيتغير من سنه للتانيه ومن دفعه لدفعه بس ده كان متوسط السنين الي فاتوا

خلاص كده دخلنا الكلية واستقرانا فيها .. تعالوا نتكلم بقي الدنيا ماشية ازي فيها

فاولا انت بتختار لغتتين للدراسة .. لغه اساسية ولغه فرعية و معاهم العربي كلغة تالتة اساسية بتاخدها طبيعي ايا كان اللغتين التانين الي هتختارهم وانت بكتب الرغبات من اول ما تدخل

اللغة الاولي الي هيا الاساسية الي بتختارها.. بتدرسها بعمق و الهدف انك تتخرج وانت متققنها تماما وتأهلك للهدف الرئيسي من الكلية وهو انك تكون مترجم محترف فيها..

وبتدرس مبادأها الاساسية كلغة ..و بتدرس الترجمة بكل انواعها (سياسي، اقتصادي، تجاري.. الي اخره) وبتدرس ادب ونصوص واي حاجه ليها علاقة باللغة وثقافة اللغة والبلد اللي بتتكلمها

وبتاخد فيها مواد زي قصة وحضارة ودراما واستماع ومحادثه وماده قواعد.. ونصوص وترجمه لعربي وترجمه من عربي

اللغة التانية الفرعية فبتاخد نفس المواد بتاعت اللغه الاولي بس بكمية اقل فيها وفترة اقل.. يعني بتاخد محاضره واحده فيها في الاسبوع غالبا وبتاخد فيهم شويه vocabulary و grammar

واللغة العربية بتدرس كل سنة فيها منهج مختلف يعني بتدرس ادب ومقال ونصوص ونحو وهكذا يعني ..

والاهم بالنسبالكم من كل ده هيا مجالات الشغل

فعندك ما شاء الله المجال مفتوح وعندك اكتر من حاجة .. الي اولهم طبعا وعلي رأسهم وهو مترجم في اللغة الي انت متنقنها .. سواء ترجمة فورية او تحريرية في مكاتب الترجمه ..

واكييد قدامك شركات السياحة ومجال انك تكون مرشد سياحي سواء تبع شركه او غيره ..

وعندك المدراس عموما والمدراس الانترناشونال بالذات .. وشركات الكول سنتر ..

واي شركه عموما سواء حكوميه او خاصه وايا كان مجالها ايه ..فعمر ما حاجه فيهم هتقول لأ.. لواحد معاه لغة ومتقنها كويس جدا ..

الشغل كتير عموما .. والسن من الكليات الي مفيهاش بطالة .. بس الي يتخرج منها يبقي ذكي ويسعى ويدور .. وميضيعش سنين الكلية كده وخلاص .. لأ يتقن كويس اوي الي بيدرسه ويبقي فاهم اللغه الي بيدرسها وممارسها ويشتغل علي نفسه وياخد كورسات ويطور من نفسه .. ويتفرج علي افلام كتير ومسلسلات باللغه الي بيدرسها .. ويتكلم مع ناس من اهل البلد ديه.. يعني من الاخر ميبقاش معتمد بس علي الكلية وعلي الكلام الي بيدرسه .. وميبقاش بيدرس المواد عشان يدخل يجيب تقدير او يعدي .. وبعدها يبقي كده خلص من المنهج الي كان بيدرسه .. فلو ديه نيتك من الاول فاسمع مني وبلاش تحاول تدخل الكليه عشان هتضيع نفسك ..

وبلاش الله يكرمكم .. فكره انهي قسم احسن من التاني في الشغل والدراسة لان كله تعب .. والشغل ده رزق واجتهاد منك .. بس عموما عشان تستريح فانجليزي والماني فرصهم اكتر شويه للشغل ..

وعبري كويس للولاد عشان ممكن يشتغلوا بيه في الجيش بس شغلها مش كتير اوي للبنات

اخر حاجه ممكن اقولها.. الكلية دراستها ممتعة جداً للي بيحب اللغات ودايس فيها .. والكلية مش صعبة وادبية تماما بس مش كلها حفظ بتعتمد كمان علي الفهم والحضور الكتير عشان اعمال السنة .. يعني مش معتمده علي الصم وبس ..

ولو مش بتحب المجال الادبي و الثقافي فهي مش بتاعتك و متقلقش هيا ملهاش اي علاقة بالرياضة مثلا اوالمواد العلمية

فمن الاخر لو انت صاحب خيال وحابب تتعرف علي ثقافة جديدة بشكل متعمق فصدقني السن هي مكانك..

ربنا يوفقكو ويكتبلوكوا الخير في كل الي جاي في حياتكم

١٤

كلية_الهندسة

مبدأيا كدة ايه الي يخليك اساسا تخش هندسة ؟؟

لو انت بتحب الرياضة والفيزيا :grin:فحط هندسة كرغبة اولى، خصوصا لو بتحب التفكير وازاي تحل المشكلة او المسألة الفلانية .. لأن الكلية بتعتمد بشكل كبير على التفكير.. والشغل طبعا .. وللأسف المذاكرة… المذاكرة الكتير كمان...ودا مطلوب طبعا في أي كلية.

*نظام الدراسة:

5 سنين دراسية.. أول سنة إعدادي و 4 سنين تخصص.

في اعدادي .. هتاخد تقريبا نفس مواد ثانوي .. لكن بكمية وتوسع اكبر.. المواد الي هم رياضة و فيزيا وميكانيكا ودي مواد أساسية بتاخدها في الترمين معاهم كمان الرسم هتتعلم الرسم الهندسي ازاي بس بتتدرب علي الرسم وازاي تستخدم المسطرة بتحس في الأول انها صعبة دا بس لانك اول مرة ترسم لكن مع التدريب إن شاء الله بتكون سهلة، وهنزود عليهم كميا بس مش هتاخدها بالتفصيل اوي .. وكمان مادة واحدة برمجة وهتبقى اول مرة تتعرف على لغه جديدة زي السي++…. ،هتاخد إنتاج وهي مادة نظري، بتنزل فيها ورش وبتتعرف علي ماكينات اول مرة تشوفها :grinning:

بتحدد رغباتك في آخر سنة إعدادي.. وتقديرك في إعدادي بيأثر على دخولك القسم، والتنسيق بيبقى على حسب القسم عليه طلب قد ايه.. مش انه قسم صعب فتنسيقه عالي ... لا متقلقلش :smiley:

وبعد كده التخصص بيبدأ من تاني سنة، ولو فيه تفرعات جوا القسم نفسه بتكون من تالت سنة (مثال.. طالب في إعدادي دخل قسم كهرباء سنة أولى، واتخصص اتصالات في سنة تانية).

وفي آخر سنة (رابعة) بيبقى فيه مشروع تخرج، بيشترك فيه مجموعة من الطلبة تحت إشراف الدكاترة.

وفي جامعات بيكون التخصص في القسم في سنة اولى (مثال أولي كهربا باور) زي هندسة المنصورة.

*أقسام كلية هندسة بتختلف من جامعة للتانية

لكن فيه 4 أقسام مشتركين تقريبا بين كل الجامعات، وهما:

عمارة- مدني- ميكانيكا- كهرباء.

قسم مدني :

الهندسة المدنية قسم شهير من اوائل اقسام الهندسة، أقسامه:

هندسة طرق وكبارى، انشاءات وتشييد، خرسانة ،هندسة صحية، هندسة الرى المساحه، هندسة المواد.

المواد الاساسية الرسم الهندسى، ماده اسمها Structure ، ومن كل قسم بتدرس مادة ..لكن المواد الاساسية اللى هتكمل فى كل السنين تقريبا المادتين دول.

المهندس المدنى هو اللى بيقوم بتصميم وتنفيذ المنشآت، المهندس المدنى يقدر يشتغل حر او فى مكتب انشاءات او التوظيف فى شركات المقاولات.

قسم عمارة :

قسم بيربط بين الهندسة والفن :blush:

عمل المهندس المعمارى عملية ابداعيه ازاى تطوع كل القدرات الهندسية اللى عندك عشان تطلع نتيجة جميلة، هو مكمل لعمل المهندس المدنى، كمان بيهتموا بترميم المبانى التراثية.

قسم كهربا :

بيعتمد على الفيزياء يعنى عشان تدخل كهربا لازم تكون متميز وبتحب الفيزياء والرياضيات لانهم اساس الدراسة فى القسم.

اقسام الهندسة الكهربية :

1-الاتصالات .

2-التحكم.

3-القدرة.

4-حاسبات.

قسم ميكانيكيا :

يعتبر من أجمل الأقسام في هندسة الا انه من الأقسام اللي محتاجه جهد وجدية في العمل ومذكرة كتير أكتر من الأقسام التانيه.

ميكانيكا فيها فروع: باور، إنتاج، سيارات، ميكاترونكس.

(ميكاترونكس يعتبر قسم خاص، والميكاترونيكس بيربط بين عده علوم وتخصصات فى فرع واحد وهى الميكانيكا والكهربا والالكترونيات البرمجة وهندسة التحكم والتصميم)

-بعض الجامعات بتبقى الفروع دي أقسام منفصلة، يعني التخصص على طول بيبقي حاسبات، من غير كهرباء زي القاهرة مثلا.

-فيه أقسام تانية مش موجودة في كل الجامعات زي:

تعدين وبترول وكيمياء وأجهزة طبية وطيران وفضاء وغزل ونسيج.

بعد اعدادي بتعرف كل التفاصيل عن الأقسام.

*كلية هندسة كلية ممتعة جدا للى دماغه فيها، الكلية مش صعبة ومش سهلة.. الكلية محتاجة مجهود عالي، لو مش داخلها عن رغبة قوية منك هتتعب فيها جامد.

أكيد سمعتوا كتير عن (هندسة دي بتتاخد في سبع سنين، هندسة يعني تشيل وتعيد...) وكلام من ده كتير، وده لإن فعلا الكلية مجالاتها كتير وشغلها كتير فبتحتاج صبر، ودراسة بمزاج.

وفي نفس الوقت، سهل تجيب فيها تقدير، وسهل تخلصها في خمس سنين بالظبط، وتتخرج منها سليم :smiley: لكن الرغبة والإرداة ليهم عامل كبير في كده.

كلية_حاسبات_ومعلومات

سلام عليكم …

طبعا هندسه بتتحتل المركز الاول من حيث الاهداف فى علمى رياضه واللى مبيحصلهاش بيزعل وبيكتئب وبيفقد جزء كبير من روحه

طيب لو قولنالك ان لسه هندسه فى ايدك حتى لو جايب 90.2% على حسب 2016

_ ازاى يعنى ؟!!

_ يعنى فى هندسة حاسبات ومعلومات وتبقى مهندس كومبيوتر اد الدنيا ويقولوا المهندس راح ... المهندس جه :smiley:

_ طبعا حاسبات ومعلومات بتكون امتع للناس الى ليها ميول فى تصميم برامج وبرمجه

وعاوزه تعرف كل تفاصيل المواقع مثلا زى الفيس بوك ويوتيوب ومواقع ... وغيره

اه بمناسبة الفيس بوك مفكرتش بيتعمل ازاي .. ولا ايه طبيعة شغل المواقع بتاعة التواصل الاجتماعي او التصفح عامة بيتعمل ازاي .. مجاش في بالك مرة مين الي بيعمل الأبليكشنز بتاعة الموبايلات دي ولا بيعملوها ازاي اساسا …

اهو الكلية الي بتطلع الناس دي هيا كلية (حاسبات ومعلومات) ..

كلية بتخدم المجتمع بشكل كبير وبتسهل حياتنا جدا بشكل يومي.. واحيانا بتوصلها للرفاهية كمان .

طيب نيجي بقى لطبيعة الكلية و دراستها، الكلية اولا اربع سنين و بتديك المبادئ الأساسية في لغات البرمجة وتبدأ تتعرف على الAlgorthim والي هيا المفهوم او المصطلح الي بيعبر عن طريقة الحل واسمها بيرجع نسبة لعالم الرياضية الخوارزمي،

الكلية اهميتها كبيرة جدا و بتعتمد على التكنولجيا بشكل كبير جدا وبالذات فلعصر الي احنا فيه..

انت لو دخلت على جوجل وكتبت افضل شغلانات فلعالم دايما هتلاقي المبرمج مكتسح متعرفش عشان هما كدة فعلا ولا عشان هم الي بيعملو المواقع دي :'D

المهم خلينا نتفق ان الكلية دي بتعتمد فيها على نفسك بشكل كامل وانت الي بتبدأ تعلم نفسك وتطور من نفسك ..

الجامعة بس هتحطك على الطريق لكن لو اعتمدت عليها مش هتوصل لحاجة ولا هتتميز فلازم تشتغل على نفسك كتير وتاخد كورسات

والمجال دة في كورسات مجانية كتير لأنه واسع وممكن تتعلم لغات جديدة وتتقنها زي الjava و الp.h.p و غيره.

نبدأ نتكلم عن اقسام الكلية

اولا فى اقسام بتكون موجوده فى كل الجامعات الموجوده فيها الكليه فى مصر زى مثلا

أ - اول حاجه قسم Computer Sciences الي معروف ب CS :

القسم ده من اجمل الاقسام اللي في كلية حاسبات و معلومات ...

و ده لأنك هتاخد فيه معظم لغات البرمجة الموجودة في الكمبيوتر يعني مثلاً زي ( السي و السي بلس و السي بلس بلس و الاسيمبلي و السي شارب وغيره ... ) ..

القسم ده علم الرياضة فيه مهم جدا .. فلو انت شاطر فيه خشوا من غير تردد واعمل حسابك هتكود كتير ..

المواد بتاعته بتختلف من جامعة لجامعة , لكن عموماً المواد باختصار بتعلمك ازاي تترجم لغات البرامج و ازاي تدرس البنية التحتية للبرمجيات , لانك ح تبقى مصمم برمجيات ..

كذلك بتاخد مقتطفات عن برمجة الشبكات ومواقع الانترنت ...

لكن دراستك في القسم ده بتنصب على برمجة اكتر ...

وطبعاً لقبك في مصر بيبقى مبرمج او مطور و رسمياً اسمك اخصائي برمجة , في بره مصر : مهندس برمجيات ...

المستقبل في القسم ده مشرق جداً , و بره المجال ده بيبقى له اهتمام اكبر و مجالات شغله اكتر بكتير من مصر

..

ب -تاني قسم هو نظم المعلومات Information Systems Department = IS :

قسم نظم المعلومات من اجمل اقسام الكلية فعلاً ...

طبعاً نظم المعلومات بتدرس برمجة و شوية من شبكات الانترنت و الاتصالات و شوية من مواد التسويق وادارة الاعمال ...

طبعاً البرمجة هنا باقصد بيها برمجة قواعد البيانات S.Q.L ...

الا انه برضه بتاخد شوية لغات من البرمجة مش كلها ..

بس دراسته بتتنصب على قواعد البيانات ...

المواد باختصار بتتكلم عن التجارة الالكترونية , وبرمجة قواعد البيانات و هندسة المعلومات , و كمان بتتكلم عن نظم المعلومات الادارية و الجغرافية , و تطوير العمل المكتبي …

بالبلدي يعني ازاي تتعلم تصمم برامج لادارة الشركات و البنوك ... و ازاي تخزن بيانات الشركة كلها على برنامج واحد او على موقع انترنت واحد …

لقبك جوه مصر بيبقي : اخصائي نظم او مطور او مبرمج برضه ,

بره مصر بقي: مهندس معلومات , او مهندس معلوماتية ...

المستقبل هنا في القسم ده لا تعليق , كل الخريجين من القسم ده بيشتغلوا في البنوك و في الشركات الكبيرة , بل ان بعض كليات الحاسبات بتهتم بالقسم ده اكتر من غيره, لان الشغل هنا بيبقى احسن كمان ...ومعظم بيانات العملا في اي شركة .. القسم ده هو الي بينظمها.

وشغله كله بيانات يعني حاجة كدة زي السجل المدني و اعوذ بالله ايه التشبيه السيء ده ما علينا نخش في اخر قسم :'D

ت - تالت وهو قسم تكنولوجيا المعلومات Information Technology Department = IT:

و باختصار , هنا بتتعلم ازاي تبرمج شبكات الانترنت و تعرف ايه هو الانترنت اساساً و ليه اتعمل و مين اللي عمله ... و تتعلم برضه ازاي تبرمج مواقع الانترنت الكبيرة و حتاخد لغات برمجة خاصة بالمجال ده زي الفي بي سكريبت و الروبي و البايثون و الجافا طبعاً

دراسته بجد ممتعة جداً , و القسم لا غنى عنه في اي شركة كبيرة ....

المواد باختصار بتتعلم فيها ازاي تبرمج الشبكات , وازاي تبرمج مواقع الانترنت الكبيرة , و فيها مواد اتصالات برده...

وبيقي اسمك مبرمج او مطور , وبره مصر : بيبقي اسمك مهندس شبكات

القسم ده طبعاً موجود في اغلبية كليات الحاسبات و المعلومات , مش كلها …

اقسام بقى موجوده فى بعض الكليات زى

1-قسم نظم الحاسبات

2-قسم الحسابات العلمية

3-قسم العلوم الأساسية

4-قسم نظم المعلومات الحيوية_ ودى ممكن من علمى علوم _

5-قسم نظم المعلومات الجغرافية

6-قسم هندسة البرمجيات

7-قسم بحوث العمليات ودعم اتخاذ القرار

8_قسم الوسائط المتعددة

وهننزلكم كدا شوية معلومات بسيطه عنهم فى التعليقات تحت

وقبل ما تمشي ففي شوية نصايح ونقط مهمة :smiley:

1 -اعتمد على نفسك مش على الجامعة

2- شركة مايكروسوفت بتعمل كل سنة مسابقة على مستوى كليات الحاسبات اللي في الجمهورية كلها , المسابقة دي عبارة عن انهم بيختاروا افضل مشروع تخرج و اسمها Imagine Cup ..

الفايز فيها بيضمن شغله في الشركة نفسها ..

3 - وفي مسابقة عالمية اسمها ACM لو كسبت وطلعت من اول تلت مراكز في المسابقة مع فريقك.. فانت وفريقك هتتخطفوا من شركة جوجل لأنهم بيحبوا الناس المتميزة وغالبا هم الي بيكسبو المسابقة دي

4 - الدراسة في اي كلية حاسبات بتبقي بالاانجليزي ما عدا مواد الانسانيات ( الي هيا حقوق الانسان وكده) .

5- ممكن طالب الحاسبات ممكن ياخد كورسات هاردوير , بس طبعاً مش بقوة مهندس الحاسبات ..

6- فقط عليك في الكلية دي انك تتميزو تتفوق ... تكتر من كورساتك و تشد في مذاكرتك و تحضر على قد ما تقدر .. وبإذن الله مش ح تلاقي حاجة صعبة

…

يلا وربنا يوفقكوا جميعا وتبقوا مبرمجين قد الدنيا

كلية_هندسة_البترول

ازيكم يا شباب خلاص الثانويه خلصت بكل مغامرتها سواء الحلوه أو الوحشه و دلوقتى هتبدا مرحلة جديد في حياتكم مرحلة اختيار وتحديد الطريق اللي هتكملوا فيه بقية حياتكم

النهاردة هنتكلم عن كلية هندسة بترول و التعدين

الكلية موجوده فى السويس ، و موجوده فى القاهرة كقسم من أقسام كلية الهندسة وبتاخد من مجموع بيتراوح ما بين 403 و 406

بالنسبة لاقسام الكلية فى السويس عبارة عن 5 اقسام

1 - قسم حفر ده مرتبط بحفر آبار البترول وبعدين استخراج البترول نفسه و بيشتغل فى شركات البترول اللى هيا اما بتكون شركات " مالكة " ودى الشركات المالكة للآبار او بيشتغل فى شركات " خدمات "و دى هى اللى المسؤولة عن الحفر و استخراج البترول

2 - قسم تكرير هو المسؤول عن البترول بعد استخراجه ، يعنى مسئول انه ياخد البترول يعمله معالجة أولية بعد استخراجه علطول ومعالجة الغاز الطبيعى

وبعدين يوديه لشركات تحول البترول الخام ده لمنتجات زى السولار بقى والبنزين وكدا

القسم برضو بيشتغل فى مجال البيتروكيماويات ، و هو المجال اللى بيخص صناعة المنتجات من مشتقات البترول ، و المنتجات دى زى المنظفات الصناعية و الاسمدة و الملابس و المواسير وموجود ليها شركات كتير فى مصر

ومهندس التكرير ممكن يشتغل فى شركة تكرير بترول او شركة غاز او شركة بتروكيميا ،، ولأنه بيدرس عمليات وكيميا برضو فبيكون متاح ليه يشتغل فى شركات الأدوية ممكن او الأسمدة كمان

3 - قسم جيولوجيا وده بيهتم بتحديد اماكن وجود البترول وأماكن الآبار اللى ممكن نلاقى فيها بترول وخصائص البترول الموجود ده

ومجال شغلهم فى شركات حفر الآبار

4 - قسم فلزات وده دراسته كلها مهتمة بالمعادن والسبائك والعمليات اللى بتتم عليهم ومهندس فلزات ممكن يشتغل فى شركات التكرير و يكون مسئول عن فحص الأنابيب والشغل الخاص بيها

او بيشتغل فى شركات الحديد والصلب او اى شئ ليه علاقة بالمعادن والمجال ده واسع وفيه شركات كتير

5 - قسم مناجم بيختص باستخراج المعادن من المناجم زى مناجم الذهب اللى بنسمع عنها زى منجم السكرى مثلا ،

6 - هندسة استكشاف و ده قسم مميز بيدرس مواد مشتركة من كذا قسم ، يعنى حاجات من حفر على جيولوجيا وهكذا

وده قسم بفلوس .. بحوالى 5000 ف الترم ، ومجال شغله زى خريجى قسم حفر

* دخول أى قسم من الاقسام الخمسة بيكون برغبات وتنسيق برضو ،، يعنى بيتم ترتيب الاقسام على حسب سوق العمل

وحاليا حفر بياخد من اعلى تقدير يعنى من امتياز واحيانا شوية من جيد جدا

وبعدين تكرير وبعدين فلزات وبعدين جيولوجيا وبعدين مناجم و ده مبنى على التقدير اللى بتجيبه ف اول سنة كلية "" اللى هى اعدادى ""

بالنسبة للبنات مش مسموح ليهم انهم يدخلوا قسم جيولوجيا او مناجم ، و بيدخلوا حفر او تكرير لو جابوا تقديرهم ، او بيدخلوا فلزات لو تقديرهم اققل

بالنسبة للفرق بين القاهرة و السويس :

علشان تدخل بترول القاهرة لازم تدخل هندسة القاهرة عموما ، وبعد اعدادى بتختار قسم بترول

فى قسم بترول تقدر تختار شعبة من الشعب التلاتة اللى هى ( حفر أو فلزات أو مناجم )

و كمان القاهرة مفهاش قسم تكرير و بتروكيماويات لكن فيها قسم كيميا ، و ده مش موجود فى السويس و تقدر من خلاله تشتغل فى مجالات كتير جدا سواء فى شركات البترول او البتروكيماويات و مصانع الادوية و منتجات الاغذية وغيره

بالنسبة لاختلاف الدكاترة و مواد الدراسة فمفيش اختلاف كبير ، ناس هتقولك ان السويس دكاترتها احسن وناس هتقولك القاهرة احسن ، وهتسمع ان فيه شركات بتاخد خريجين القاهرة بس وشركات بتاخد خريجين السويس بس ، لكن فى الاخر متقدرش تحدد ايه الاحسن بالظبط لان فيه تنوع كبير من الدكاتره فى كل الكليات و فرص الشغل بتختلف من شخص للتانى

بالنسبة لسكن الطلبة بيبقي السكن في الأغلب وحش لأنك مقيد في وقت مذكرتك و في كل حاجه و ممكن ميكونش في خصوصية ليك فأحيانا السكن الخارجي بيكون افضل و الأكل بيبقى كميات قليلة و مش كويس اغلب الوقت

و دلوقتي اكيد طلاب المعادلة مش هننساكم في نوعين من الطلبة اللي واخدين الثانوية من بره مصر و دول نظامهم بيبقى شبه اللي واخدين ثانوية مصريه عادي

بس هم يختلفوا في التنسيق و نتيجه التنسيق و اسامي الطلاب بتنزل متأخر اوي بعد الميد ترم فأنت مفروض تحضر عادي و تختار السكاشن اللي عايز تاخدها و لما اسمك ينزل قدم ورقك

النوع الثاني من الطلبه اللي هما طلبه صنايع أو معهد و علشان يدخلوا هندسه لازم تجيب 70 % لو صنايع 3 سنين و تجيب 50% لو صنايع 5 سنين أو معهد فوق متوسط و بتقدم في مسابقة تبع اللجنة المركزية لهندسه القاهرة و بتمتحن في فيزياء و ميكانيكا و رياضة عامة وخاصة

اخيرا لازم قبل ما تقرر الكليه اللي انت عايزه تشوف هي من اهتماماتك شايف نفسك فيه و لا لا ويبقي قرارك بناء على رغبتك انت و بس :wink::wink:

لو قررت انك هتدخل هندسة بترول فخليك عارف انك هتوجه مشاكل كتير و منها أن فرصه الشغل صعبه شويه بس الشغل مش مضمون في أي كليه بس انت لازم تجتهد :muscle::muscle: و لازم لما تقرر الكلية تكون بتستحمل الغربة و السفر و هتتعب كتير لحد ما توصل

ربنا يوفقكم و اختاروا اللي تحبوه، ويارب نكون ساعدناكم

كلية_فنون_تطبيقية

هنتكلم عن كلية متاكل حقها وسط الكليات التانية بالرغم من ان الكلية اقسامها كتيرة ومهمة في حياتنا ..

اممم ايوة بالظبط هي كلية فنون تطبيقية ..

خليني بس قبل ماتكلم عنها بالتفصيل أكد تاني ان احنا هنتكلم عن فنون تطبيقية وخلي بالك ان فنون تطبيقية غير فنون جميلة علشان في ناس بتتلخبط بينهم ..

خلينا متفقين ان كلية فنون تطبيقية وفنون جميلة من اهم الكليات اللي في مصر اللي بتهتم بالفن بشكل عام… وفنون تطبيقه بتطلع في الاخر مهندسين ومصممين

نروح بقي للفرق بينهم : كلية فنون جميلة ممكن اي طالب ثانوية عامة يخشها سواء لو كان طالب علمي (علوم - رياضة) او لو حتي طالب ادبي … اما فنون تطبيقية هي لعلمي بس ( علوم ورياضة) يعني مينفعش حد كان ادبي يخش فنون تطبيقية

خلاص بقي امتحنا ونجحنا ودخلنا الكلية .. تعالي نتكلم عليها شوية …مبدئيا الكليه ديه في ٤ جامعات في مصر وهما (حلون - دمياط - بنها - بني سويف)

عدد الاقسام الي في الكلية بتختلف من جامعة لتانية زي مثلا فنون تطبيقيه بنها فيها ٨ اقسام .. بس خلينا نركز علي جامعة حلوان عشان هيا الي فيها معظم الاقسام ..بيبقي فيها 14 قسم ..

خليني بس قبل اما اقولك ال ١٤ قسم اوضحلك ان انت ممكن تحول لأي كليه فنوون تانيه لو عاوز تدخل فيها قسم مش موجود في كليتك

الكلية ياسيدي 5 سنين اول سنة اعدادي ودي هتاخد فيها مواد تأسيسية بتتاخد في اي كلية في سنة اعدادي زي فيزيا كميا هندسة ورسم هندسي وغيره .. دة غير شويه مواد فنيه بتاعت كليتك اصلا زي متاحف، اسس تصميم ،خطوط ،منظور حر، فوتوغرافيا…

و التخصص بيكون من سنة تانية علي حسب تقديرك في سنة اولي

جيب بقي ورقة وقلم واكتب معايا ال 14 قسم عشان منتلخبطش :smiley:

اول قسم هيعجبك اوي لو انت ليك في التصوير والجو ده وهو قسم الفوتوغرافيا والسينما والتلفزيون .. وبتطلع منه مصور كويس جدا

وعندك قسم الاعلانات والجرافيك "القسم الرايق" بمعني اصح .. بيفهمك شغل الاعلانات والدعايه .. وازي بتصمم الاعلان وتبتكر فيه وبيفهك شغل الانيميشين كمان

وعارف انت الناس الي بتبقي مشغوله دايما بتريب العفش في البيت وديكوره وازي تنظمه.. دول كلهم بتلاقيهم في قسم التصميم الداخلي للأثاث

اما بقي النوع الي طول ما هو قاعد في البيت بيفكر في شكل العفش وقطع الاثاث واكسسوارات البيت ويفضل كل شويه يغير في نظام الاوضه .. فدول بتوع قسم الاثاث والانشاءات الحديدية والمعدنية .. وبيتعلموا فيه ازي تصمم قطع الاثاث

وبيخليك تعرف تتعامل مع الحديد والمعادن عموما وتطلع منهم اكسسوارات البيت

ولو انت من الناس اللي بتهتم اوي بالموضة وبتحب الافكار الجديدة في الاستايلات فمكانك هيكون في قسم الملابس الجاهزة.. القسم بيخليك تبتكر وتبدع في تصاميم اللبس يعني بمعني اصح هتتخرج من القسم دة وانت مهندس ومصمم متخصص في الفاشون والازياء والموضه

وفيه قسم طباعة المنسوجات والصبغه والتجهيز والقسم دة بيحطوا فيها تصمايم لكل المنسوجات والونها وصبغتها وبيأهل الطلبة انهم يشتغلوا بعد اما يتخرجوا في مجال الصبغه والطباعه بتوسع وبشكل فني وعلمي

القسم اللي بعد كدة قامت عليه بيوت علي مدى اجيال كتييرة .غالبا هتلاقي في اي بيت مصر مفارش معمولة بالتريكو وطبعا للي عاملتها الست الوالدة ولو هي شاطرة شوية ممكن تعمل لبس كمان بالتريكو :smiley:

وهو قسم الغزل والنسيج والتريكو .. والي ليه علاقه باي خيوط يتعمل منها القماش .. وبيوصل الطلبه فيه لأعلي مستوي انهم يصمموا منسوجات ويبتكروا في مجال النسيج والتريكو

نروح بقي لقسم النحت والتشكيل المعماري والترميم وفي القسم دة بيدرسوا مدارس النحت والمراحل التاريخية .. وبيقي فيه نحت فني زي النصب التذكاريه وكده .. ونحت صناعي زي جسم العربيه واي قوالب بينتجوا منها كميات كبيره .. وفيه كمان تظبطيات الوجهات الخارجيه والسقف الداخلي للمباني .. ده غير الترميم الي واضح من اسمه طبعا بيحصل فيه ايه

وعلى فكره القسم ده من اكتر الاقسام المهمه في الكليه ومجالات شغله كتيره اوي ومطلوبه

وقسم تصميم صناعي .. الي بيحطوا فيع تصميم لكل حاجه بنستخدمها في حياتنا فيه وبينفذوها.. من اول ااعربية لحد الغساله والشكوش

وعمرك سألت نفسك الدهب والمجوهرات والنجف والاباليك والحاجات ديه كلها مين بيصمم شكلها .. كل ده الي بيعملوه قسم حلي ومعادن

وفيه قسم مفيش زيه في ولا جامعه تانيه وهو الطباعه والنشر .. وفيه اقسام تانيه كمان زي الزخرفة والزجاج والخزف

ونيجي بقي لطبيعة الدراسه في الكلية

الدراسه طبيعتها جزء عملي وجزء نظري.. العملي بتشتغل فيه بنفسك وممكن تسهر في الكليه ل ١١ بليل عشان تخلص المشروع وتطبق بالايام عشان المشاريع ف انت لو بتحب الكليه هيكون الموضوع بالنسبالك جميل لانك هتتعب بس التعب ده هيكون متعه

اما المواد النظري فاهيا مهمه عشان من خلالها هتقدر تشتغل كويس في العملي و هتعرفك اساس القسم .. يعني ببساطة المواد النظري مهمة لانك من خلالها هتقدر تشتغل في العملي كويس..

الكليه ساعات بتحتاج كورسات بس مش كتير يعني

ولو انت تقديرك في اعدادي مدخلكش القسم اللي نفسك فيه ممكن بعد ما تتخرج تاخد كورس في القسم ده وتشتغل فيه بعد كده عادي

وبالنسبة للنقابة المهندسين .. فقسم غزل ونسيج وطباعة منسوجات هما بس الي بيدخلوا في نقابة المهندسين .. بس في كلا الحالتين انت بتتخرج من الكليه مهندس ومصمم مش وجودك في النقابه هو الي هيخليك مهندس

والكليه عموما ليها نقابه خاصه بيها اسمها نقابة مصممي الفنون التطبيقيه

ومن الاسئلة المهمه الي اتسألت لينا .. هيا فنون جميلة ولا فنون تطبيقية احسن لعلمي رياضة .. هو السؤال ده بالتحديد لما اتسأل كان كل واحد في فنون تطبيقه او جميله بيقول علي كليته هيا الاحسن .. بس خلينا نتكلم بالمنطق شويه .. قسم عماره في فنون جميله مش بيضيع سنه اعدادي زي فنون تطبيقه يعني بيقضي الخمس سنين في التخصص بتاعه .. فده بيخلي ناس كتير تفضله وبيخلي كمان بتوع عماره مطلوبين اكتر من هندسه عماره او فنون تطبيقيه .. ده غير ان قسم عماره في فنون جميله بيدخل في نقابه المهندسين عكس فنون تطبيقه الي فيها قسمين بس الي بيدخلوا في نقابه المهندسين

وعموما يعني الموضوع متوقف علي رغبتك انت وحبك لشكل الدراسه في كل كليه .. كل كليه فيها الحلو وفيها الوحش بس لو انت عايز عماره بتعمق اكتر فهتلاقيه في فنون جميله عشان فنون تطبيقه مفيهاش قسم منفصل لوحده اسمه عماره

طبعا اكيد بعد الرغي ده كله كلكوا بتسألوا انهي قسم له فرصة شغل بعد التخرج … مبدأيا كده خلينا متفقين ان الكليه ديه من اكتر الكليات الي مطلوبه في السوق

وزي ماتفقنا ان كل قسم له طبيعة مختلفة عن القسم التاني فبالتالي فرص الشغل مختلفة علي حسب التخصص بتاعك .. بس الاكيد ان فرص الشغل متوفره اوي في الشركات والمصانع..

يعني مثلا قسم الاعلان قدامه شركات ومكاتب الاعلان والدعايا ومستقبله حلو جدا .. والي بيبدع في القسم والمجال ده بيوصل وبيقي ليه اسم كبير

او ممكن تشتغل في مصنع لو انت في قسم طباعه

او تفتح مكتب ديكور ليك وفلوسه ومستقبله كويسين اوي برده

او ممكن تشتغل في اي شركة ازياء او تبدأ مع نفسك وتفتح شركه او مكتب تصميم ازياء ليك.. لو انت في قسم فاشون

الاكيد يعني ان مفيش قسم ملوش شغل .. وبيتقال لكل الي في فنون تطبيقه انتو محظوظين لانك بتتطلع من كل قسم بتلاقي اكتر من مجال واكتر من شغل متوفر ليك .. وكل مجال فلوسه كويسه وحلوة .. انت بس اعمل اللي عليك واشتغل علي نفسك ودور واسعى وربنا هيكرمك :slight_smile: ….

كلية_فنون_جميلة

سلام عليكم

الطلبة الفنانين بتوعنا اللى بيسألوا عن فنون جميلة

اه وياريت تنسى كلام الأفلام عن الكلية ..ده لمصلحتك :smiley:

اه بفهمك الليلة من الأول علشان لو دخلت متتفاجئش .

مبدأيا كده الكلية دى موجودة في 5 جامعات بس في مصر كلها وهما جامعة حلون ، جامعة اسكندرية، جامعة المنصورة ، جامعة المنيا ، جامعة الأقصر ..فل ؟!

نيجى بقى للأقسام ,, ودول اكتر من قسم فعندك يا سيدي

عمارة

وديكور

ونحت ، وتصوير و جرافيك

ونحت ، وتصوير و جرافيك دول اللي بنقول عليهم مجازا كدة قسم فنون

نيجي بقى لعلمي وادبي واللخبطة اللطيفة دية

قسم عمارة بيدخله علمي رياضة بس..

وديكور موجود لعلمي رياضة وعلوم، مش بتفرق

"وبالمناسبة يعني ديكور ممكن تدخله لو كنت أدبى بس ده متاح في جامعة اسكندرية بس"

وبتتخصص فيهم من اول سنة خالص على حسب مجموع الثانوية العامة

أما نحت وتصوير وجرافيك (الي اتفقنا اننا بنقول عليهم قسم فنون) فبتدخلهم من أى حاجة علمى أو أدبى

وملحوظه لازم نقولها هنا وهي ان فنون جميلة مش زي معظم الكليات بتدخلها وبعدين في تالت او تاني سنة تقرر هتخصص في انهي قسم فيعا

لا انت من بعد ثانوية عامة واول ما تدخلها بتخصص يا اما في عمارة او ديكور او فنون

الدراسه عموما في الكلية عملية جدا ..و بيبقى عندك3 او اربع مواد نظرى بالكتير فى الترم بس بيبقوا سهلين ومفهومين .. وغالبا مش بتحتاج كورسات كتير في الكلية .. لكن فيه كورسات معظم الطلبة بيحبو ياخدوها فى الأجازة علشان يطوروا نفسهم مش اكتر

ندخل في تفاصيل الاقسام بقي؟

نبدأ بعمارة ؟ حلوة عمارة

عمارة من فنون جميلة تعتبرهيا هياها عمارة من هندسة لكن فيه فروق بسيطة

يعنى لو لاقدر الله كنت عاوز هندسة عمارة وملحقتش هندسة ؟ ده يعتبر البديل ليك .. تدخل فنون جميلة

الميزة التانية في عمارة فنون جميلة انك بتدرس من الجانب الفنى أكتر من بتاع هندسة

واللطيف اكتر انك بتخصص في عماره من اول سنه في الكليه يعني مش زي هندسه بيقي عندك فيها سنه اعدادي بتضيعها من غير تخصص

ومع كل ده ليك الحق انك تكون عضو في نقابة المهندسين وبتتساوى شهادتك بشهادة الي في هندسة .. والفرق انه بيتذكر انك خريج كلية الفنون الجميلة ليس أكثر

وطبعا في الشغل انت وشطارتك وهو وشطارته

نيجي لتفاصيل تاني قسم؟ والي كتير بيسألو عليه وهو قسم ديكور.. وده لوحده بيتقسم لقسمين جواه وبتتخصص في واحد منهم من سنه تالته علي حسب الي تحبه فيهم ..

وعندك اول تخصص اسمه تصميم داخلى أو INTERIOR DESIGN

والتانى اسمه الفنون التعبيرية

ونبدأ ب الINTERIOR DESIGN

وده انت بتصمم فيه كل حاجة، من أول التصميمات الداخلية للشقق لغاية تصميمات واجهات البنايات وتوزيعات الاضاءة والحيز وأماكن توصيلات الكهربا على أسس علمية

وده حضرتك أما بتدخله بتتخرج معاك بكالريوس عمارة داخلية قسم ديكور (اسم ليه هيبة كدة برده :smiley: )

طيب بالنسبة للفنون التعبيرية؟

ده بقى تصميم ديكورات الأفلام والمسارح

يعنى أما بيبقى مطلوب فيلم بيتعمل في مرحلة زمنية معينة مثلا أو بيئة معينة فانت بتشوف هتظبط اللوكيشن بتاعهم ازاى بحيث يتناسب مع الفترة دى أو البيئة دى وكذلك لبس الممثلين وهكذا

.. وصلت ؟!

قولتولي وصلت

طيب نيجي لسؤال وجودي ومهم: وهو ايه الفرق بين ديكور اللى في فنون جميلة ، وديكور اللى في فنون تطبيقية ؟!

بص باختصار تعتبر فنون جميلة المخ وتطبيقية العضلات

يعني بتاع فنون جميلة يعمل التصميم وبتاع فنون تطبيقية هو اللى بينفذه وبيطلعه للحياة وكدهون

وبالمناسبة بتوع قسم ديكورفنون جميلة أخيرا وبعد طول انتظار بقى ليهم نقابة مستقلة دلوقت الي هيا "نقابة هندسة الديكور"

واخيرا ونيجي لتالت قسم واللى هنرغي فيه شوية حلوين وهو قسم فنون، القسم الوحيد اللى بتدخله سواء كنت علمى أو أدبى

والي بالمناسبه اي حد بيتخرج منه بتوع فنون بيبقا تبع نقابة الفنانين التشكيليين .. طبعا ما هما مش أقل من بتوع ديكور ولا عمارة الي كل واحد فيهم وليه نقابته

المهم ان قسم فنون بيتقسم ل 3 أقسام جوة .. جرافيك وتصوير ونحت

انت اول سنة لو دخلت فنون بتبقي سنة عامه وبتدرس فيها التلت حاجات ، ومن تاني سنة بتبدأ تخصص في واحد من التلاته زي ما انت عايز.. وفيه سنين الكلية بتمشي التخصص فيها على حسب تقديرك في سنة اولى .. يعني عندك جرافيك بياخد اعلي التقديرات بعديها تصوير وبعديه نحت وكده .. بس في الغالب حتى لو جالك قسم مش على مزاجك بتقدر تحول منها عادي

نبدأ كده باول حاجه في فنون وهو قسم بجرافيك وده بيتقسم جواه لحاجتين

تصميم مطبوع

ورسوم متحركة

التصميم ده اللى بتعمله فيه انك بتصمم سبحان الله :smiley: شفت ازي؟

شغل تصميم بوسترات مواقع الانترنت والمجلات وكدهون يعني

أما بالنسبة للرسوم المتحركة

فأيوة هو اللى جه فى بالك ده كارتونات ديزنى

أنت فعلا بتتعلم فيه ازاى تعمل كارتونات وتجسم الشخصيات الكرتونيه وتحركها وكدة

طيب دول بيشتغلو فين غير ديزنى؟

دول يا سيدي بيشتغلو فى استوديوهات ومكاتب الجرافيك وشركات صناعة الكارتون التانية الي زي بتاعت ديزني

طيب كدة احنا خلصنا كلامنا الجرافيك .. ندخل على التصوير؟

وبالمناسبة قسم تصوير مش معناه تصوير بالكاميرا نهائي خالص

لا التصوير ده عندك منه نوعين:

يا اما تصوير زيت وده بتشتغل فيه أعمال زي أعمال فان جوخ ورسم وتجسيم بالزيت ورسم الطبيعه وكدة .. باختصار يعني القسم ده للي بيعشقوا حاجه اسمها رسم وده مكانهم

النوع التانى من التصوير واسمه تصوير الجدارى .. ايه ده يعني ايه؟!

التصوير الجدارى ده عارف الازاز ؟ بنجيبه ونفشفشه ونشتغل بيه زخارف شبه الزخارف الاسلامية وكدة

هييح وصلنا اخيرا لآخر قسم عندنا وهو قسم النحت

وده بتدرس فيه ازاى تشتغل نحت بارز وتشكيل فراغى

وبيتقسم عموما جواه لشعب كتير زي (خزف - و نحت عام- و نحت ميداني- و الميدالية)

والي هتلاقيهم دايسين فى الليلة دى أكتر بتوع فنون تطبيقية

نيجى لأهم حاجة دلوقت

الا وهيا اختبار القدرات والليلة الحلوة دى كلها

فبص يا فندم ..

اولاا بالنسبة لمواعيد الاختبارات فدية الوزارة بتعلن عنها وغالبا بتكون بعد ما بتخلصوا امتحانات ثانوية عامة بشوية

والمواعيد دية هتعرفها بسهولة لما تقدم وتسجل في الاختبارات فهتعرف ميعاد امتحانك امتى وفين

وعلشان تقدم على الاختبار بقى

فبتدخل على موقع التنسيق بتاع الوزارة وتكتب بيناتك المطلوبة وبعدها الموقع بيطلعلك ورقة هتروح تتطبعها

وتروح بيها على الكلية في الميعاد الي حددوده ليك في الورقة ديه

وتمتحن

خلاص قدمنا؟ نروح الاختبار بقى؟

لا يا حلو لسه

انت محتاج قبل الاختبار تاخد كورسات تأهيلية علشان تقدر تعدى الامتحانات

وغالبا كليات الفنون فى الجامعات بتاعتها بتوفرها برسوم معينة

ااو ممكن كمان تاخد الكورسات دية في اي مكان تاني بره .. بس الافضل انك تاخدها في الكليه عشان بيبقوا مفهمينك بالظبط ايه الي هيجي في الامتحان وبيدوك اسئلة زي الي هتجيلك وكده..

طيب أخر حاجة معلش زهقتكو.. وهيا الامتحان عبارة عن ايه ؟

شوفت هشغششك كمان أهو

بس الي هقولهولك ده نظام الامتحان تبع جامعة حلوان.. بس فى الاغلب كل الجامعات بتبقى مشابهة ليه.. بفرق حاجات بسيطة فاتأكد بردو من دفعات أكبر لو عرفت .. او وانت بتاخد الكورس في الكليه او بره هيرسوكوا الامتحان بيقي عامل ازي بالظبط

فاول حاجة عندك امتحان عمارة

بيجيلك فيه سؤالين

السؤال الأول انك ترسم منشأة معينة بمنظور هندسى

والسؤال التانى بيكون سؤال نظرى بيسألك فيه عن ثقافتك المعمارية وبتتكلم عن أماكن معمارية هو طالبها وكدة وده من غير رسم

طيب وامتحان فنون؟

وده بيكون 3 أسئلة

الأول تمثال او شكل وانت بترسمه بالتظليل وده سهل مش صعب زى ما انت متخيل

وتانى سؤال بيبقى تصميم لكارت بمسااحة معينة ,,أيوة حاجة شبه التصميم الابتكارى بتاع 3 اعدادى ده

والسؤال التالت بيكون ثقافة فنية .. يعني سؤال نظرى زى بتاع عمارة لكن ده بيكون عن المتاحف والمدارس الفنية وكدة وغالبا بتاخد مذكره فيها الكلام النظري ده كله

وبس يا سيدي

نصيحة عموما حاول متضيعش فرصه اختبار القدرات ديه من ايدك .. حتى لو مش حابب الكليه .. فانت مش هتبقي ضامن مجموعك.. والاختبار بيقي قبل النتيجه والتنسيق فالحق نفسك واعمله ومش هتخسر اي حاجه بس لو معملتوش ولقدر الله مجبتش مجموع يدخلك الكليه الي انت عايزاه عمرك ما هتقدر تدخل فنون جميله من غير ما تكون عامل الاختبار وناجح فيه حتى لو جايب تنسيق الكليه

واخر حاجة خالص

لان اكتر من حد سألنا على انه لازم يكون بيعرف يرسم عشان يدخل فنون جميله وان ايه عموما القدرات الي لازم تبقي موجوده فيك عشان تدخل الكليه ..؟

فبصوا عموما مفيش قسم لازم يكون بيعرف يرسم كويس غير قسم تصوير

وعموما برده فكرة الرسم الحلو دي بتيجي بعدين بالاجتهاد وبالخبره وانك تشتغل كتير على نفسك .. والدكاتره نفسهم من اختبار القدرات بيكون عندهم رؤية وحس وهتلاقيهم بيقبلوا الي عنده بذرة موهبة او ممكن يجي منه بعد كده فمتقلقش .. بس اهم حاجه لازم تبقي عندك هي الاستعداد لانك تشتغل عملي في مشاريع كتييير ورا بعض من غير ماتحس بزهق .. وخليك واثق انك لو عندك موهبة او شبه موهبه فكلية فنون جميله ارض خصبة هتزودلك الموهبة دية وتنميها ..

وبس يا سيدي ديه كل حاجه تقريبا ^^

بالتوفيق يا فنانيننا .. ومستنيين ابداعاتكم

كلية_تجارة

كلية التجارة ..فى رواية أخرى كلية الشعب :grinning:

الكلية اللى معظمنا بيكون رافضها فى البداية ، بس أول ما بيتزنق بتكون أول بديل حقيقى بيفكر فيه وبنكتشف انها مش بالسوء اللى احنا متخيلينه ده

والعظيم جدا ان فيه ناس بتختارها وبتفضلها عن كليات كتير تانيه .. وبتختار تكمل في المجال ده بنفسها

مبدأيا كدة كلية التجارة ممكن نوصفها بانها ميدان عام ..اشمعنى ؟!

علشان بتدخلها من علمى علوم ورياضة وأدبى

مش كدة وبس علشان كمان دى من الكليات اللى فيها انتظام و انتساب

طيب ايه الفرق بين انتظام وانتساب موجه ؟

انتظام مجموعها بيكون أعلى من مجموع انتساب

بيكون ليك حضور سكاشن لكن انتساب لا اغلب الجامعات لو مش كلها ليها حضور سواء محاضرات او سكاشن …

وكمان مصروفات انتظام أقل من مصروفات انتساب ..

انتظام مميزة فى فكرة انك ممكن تدخل انجليزي لكن فى انتساب لا ممكن اغلب الجامعات لا لكن تجارة اسيوط عادي انجلش انتساب واسأل في الجامعة اللي هتقدم فيها + ان المصاريف ممكن تكون اكتر من انتظام شويتين :"D

وكمان بعض الأقسام اللى هنتكلم عنها كمان شوية زى اكتوارى مينفعش تدخلها من انتساب

بس كده مش أكتر غير كده فالباقى نفس المواد ونفس كل حاجة في الاتنين

وغالبا تجارة بتبقي مرحله اولي وتانيه بالنسبه لانتظام..

لكن فى المرحلة التالتة .. مبتبقاش موجوده غير لانتساب موجه بس

لغات الدراسة فى الكلية دى 3 لغات عربى وانجليزى وفرنساوى

عربى موجودة فى كل كليات تجارة وكذلك انجليزى لكن فرنساوى موجودة بس فى جامعة عين شمس وجامعة اسكندرية .

طيب لو أنا عاوز أدخل انجليزى فيه شروط لده ؟

آه فى شروط ..

أول حاجة ان يكون جايلك فى التنسيق تجارة انتظام ..

تانى حاجة تكون جايب فى الانجليزى مش أقل من 40 من 50 ودى بتتغير من سنة لسنة على حسب متوسط درجات الطلبة عموما ..

تالت حاجة اسمها المجموع الاعتبارى .. يعنى ايه المجموع الاعتبارى ده ؟!

يعنى مجموعك فى الثانوية العامة متضاف عليه درجتك فى الانجليزى وده موجود في اغلب الجامعات لكن في جامعات قليلة بيكون حاطط حد معين لدرجة الانجلش مثلا 48 من 50 لو العدد مكتملش بينزل بيها لجد ما العدد يكتمل

مثلا تجارة انجلش فى جامعة معينة واخدة مجموع اعتبارى 400 وانت جايب 360 مجموع كلى فى الثانوية وجايب 45 فى الانجليزى فمجموعك الاعتبارى كدة 405 فانت تقدر تدخل تجارة انجليزى .. وده بردو بيختلف من سنة لسنة ومن جامعة لجامعة وأحيانا مبيتاخدش بالمجموع الاعتباري وكله بيتقبل.. كل سنة وليها ظروفها بس دى الحالة العامة يعني .

وبالنسبة لفرنساوى فهى هى نفس الشروط بس المجموع الاعتبارى وقتها هيتجمع عليه درجة الفرنساوى بدل درجة الانجليزى وزى ما قولنا تجارة فرنساوى فى جامعة عين شمس وجامعة اسكندرية بس والدراسة بتكون نفس مواد تجارة انجليش لكن مصاريفها بتزيد عن تجاره انجليزي شويه

طيب ..ايه الفرق بين تجارة عربى وتجارة انجليزى ؟

من ناحية المواد فانت بتدرس نفس المواد لكن بتاع عربى بيدرسها اكييد بالعربى وبتاع انجليش بيدرسها بالانجليزي

كمان فى معظم الجامعات بيكون فيه فرق فى الكتب يعنى تجارة عربى غالبا الدكتور هو اللى بيعمل الكتاب لكن تجارة انجليزى الكتب بتبقى متاخدة من مراجع أجنبية مش الدكتور هو اللى بيحط الكتاب يعني

بعض الآراء بتقول ان تجارة انجليش أفضل من ناحية فرص الشغل وهكذا وفى آراء تانية بتقول ان الاتنين سيان فى حالة ان خريج تجارة عربى أخد كورسات اقتصاد او محاسبة بالانجليزي وهكذا

عموما المعيار النهائي اللى بيفرق فعلا مدى فهمك للمادة العلمية وأى حاجة تانية ممكن تتدارك مع الوقت

كدة احنا خلصنا تشعبات اللغات ندخل على الدراسة والأقسام

الكلية 4 سنين بعدها بتتخرج بدرجة البكالريوس

وبتبدأ تدرس في الكلية

المحاسبة وفروعها، إدارة الأعمال وفروعها، التأمين وفروعه، الاقتصاد وفروعه، الإحصا، الرياضة، القانون دى المواد اللى فى الغالب كلكم بتدرسوها قبل التخصص

طيب سؤال اتسأل لينا هو أنا لازم أكون شاطر فى الرياضة ؟ والرياضة هناك شبه رياضة ثانوى كدة ؟

اولا فلأ مش ضرورى تكون شاطر فى الرياضة

ثانيا فيه مواد بتكون فيها الرياضة شبه ثانوى وفيه مواد بتكون مختلفة.. يعنى بتاخد رياضة بحتة زى اللى أخدتها قبل كدة .. وبيقي فيه رياضة أعمال.. خاصة بالمواد التجارية يعني ودى الي انت هتاخدها أول مرة فى الكلية ومبتبقاش شبه رياضة ثانوي

طيب ايه التخصصات اللى موجودة ؟ وبتخصص من امتى ؟

فبالنسبة للأقسام والتخصصات

الأقسام الشائعة اللى بتيجى فى بالنا أول ما بنسمع سيرة كلية التجارة هى وبلا شك

المحاسبة وادارة الأعمال

وهما متوفرين فى كل الجامعات .. بتدخل الكلية تقعد 3 سنين وبعدين تختار فى السنة الأخيرة هتكمل محاسبة ولا ادارة أعمال وفية بعض الجامعات بيكون التخصص من سنة 3 زى جامعة اسكندرية مثلا

بالنسبة للمحاسبة

المحاسبة عموما الدراسة فيها تراكمية.. فبتحتاج فيها تكون فاهم كويس مواد المحاسبة فى السنين كلها .. وبتتخرج دارس كل أنواع المحاسبة وشويه مواد من اقتصاد اللى بتأهلك تكون محاسب شاطر قادر تعمل أى حسابات وتظبط الميزانية

وحاليا فيه شهادة اسمها شهادة CMA ودى اختصار لCertified Management Accountant

معناها بالعربى شهادة المحاسب الإدارى المعتمد

الشهادة دى بتديك القدرة انك تدرس البيانات الي متوفره عندك ومن خلال البيانات دى تاخد قرارت ادارية .. والشهادع ديه بتفرق فى مستواك فى الشغل جدا وبتوفرلك فرص شغل فى أماكن أحسن

اما بقي لو كملت ادارة أعمال.. فانت هتركز على دراسة الموارد البشرية ودراسة الجدوى ومشروعات صغيرة وتسويق

وعدد الطلبة فى القسم ده بيكون أقل من محاسبة بس يعتبر العدد فيه كبير نسبيا بردو وبالنسبة للجامعات اللى بتتخصص ادارة من سنة تالتة فبيتخصصو فى سنة رابعة جوة ادارة تانى تسويق أو موارد بشرية أو أى قسم تانى فيها وهكذا

دى الأقسام المعروفة لمعظمنا بشكل كبير .. لكن

فيه كام قسم كدة معظمنا ميسمعش عنهم وبيوفروا بديل حقيقى لطلبة كتير عندهم اهتمامات مختلفة عن المجالات التقلييدية لتجارة

هنبدأ بقسم الإقتصاد والتجارة الخارجية

ده هنلاقيه فى جامعة حلوان بس والتخصصات الرئيسية اللى بتدرسها فى القسم ده هى

الافتصاد ،الاقتصاد الأولى ، التجارة الخارجية .. وده يعتبر بديل كويس جدا للى ملحقش اقتصاد وعلوم سياسية وكان عاوز يتخصص اقتصاد لان القسم ده أصلا كان معمول قبل تأسيس كلية الاقتصاد والعلوم السياسية فى جامعة القاهرة .. ولما اتفتح سياسه واقتصاد في اسكندريه الكلية قامت علي المعيدين والدكاتره الي من القسم ده في تجاره

التخصص التانى هو

تخصص إدارة الأعمال ونظم المعلومات اللى بنختصره فى BIS واللى هى اختصار ل

Business Information System

وهنا انت بتدخل على القسم ده على طول وبتقضى ال4 سنين فيه وهو بمصاريف

الدراسة فيه بتتقسم علي ال4 سنين

أول سنتين بتدرس فيهم مواد تجارية ومواد عامة زى مهارات الاتصال وكدة .

تاني سنتين واللى بيميزوه بشكل كبير بتدرس فيهم شبكات ، برمجة ، نظم

واللى بيدرسلك غالبا بيكون دكاترة من هندسة وحاسبات

القسم عموما مش موجود غير في جامعة حلوان وجامعة طنطا وبيعتبر من الأقسام المستحدثة .

آخر قسم هنتكلم عنه ومش كتير يسمع عنه هو قسم اكتوارى

ايه اكتوارى دى ؟ كلمنى عربى كدة وبلاش تنطيط

حاضر .. هبسطهالك

اكتوارى ده علم بنسميه علم تخمين المخاطر Actuarial science

أهلا وسهلا ؟ بعمل فيه ايه يعنى

بص يا سيدى ده عبارة عن انك بتستخدم الطرق الحسابية والاحصائية علشان تقدر المخاطر فى قطاعات التأمين والصناعات المالية .. بمعنى تانى الاكتواريين دول بيشوفو ايه هى احتمالية التغيرات والأحداث اللى هتحصل علشان يقللو الخساير .. وبيدبروا وبيحطوا حلول فى حالة حصل أى تغير سلبى علشان الدنيا متبوظش وكدة

طيب بالنسبة للقسم ؟

بص يا فندم ..مبدئيا هو مش موجود غير فى جامعة القاهرة والجامعة الأمريكية

بتدخله بعد ما بتقضى سنة أولى فى الكلية سواء كنت تجارة عربى أو انجليزى (ده فى حالة انك فى جامعة القاهرة يعنى) مش الجامعة الأمريكية

طيب ايه المواد الرئيسية اللى بتدرسها ؟

بتدرس فيه مجموعة من مواد الرياضة والاحصا والتأمين .

وده كده يعتبر المختصر المفيد فى موضوع الأقسام

طيب آخر حاجة مجالات الشغل عموما ايه ؟

خرجين قسم محاسبة بيشتغلوعموما فى المحاسبة الادارية ، ومحاسبة التكاليف ، وفى البنوك وفى مصالح الضرايب المختلفة

وخرجين ادارة أعمال بيشتغلو فى ادارة الموارد البشرية يعنى بيبقو مسئولين عن الموظفين فى الشركات أو أى مؤسسة عموما وبيتابعو معاهم شغلهم وكفاءتهم وبيقيموهم وبيوفرولهم التدريبات اللازمة

وممكن يشتغلوا كمان في التسويق والشركات المالية والبنوك والبورصات والهيئات العامة

وخرجين اقتصاد وتجارة خارجية فبيكونوا اخصائيين اقتصاديين واخصائين في التصدير والاستيراد

وشركات التأمين وهكذا

عموما مفيش مكان شغل مبنحتاجش فيه لخريجين كلية التجارة بأنواعهم

وملاحظة أخيرة يا شباب سكك الشغل متاحة بشكل كبير ومش مقتصرة بس على مجال البنوك والمجالات المعروفه في تجارة

بس اهم حاجه انك تتطور من نفسك وخليك دايما متابع وشوف ايه هينميك وتاخده .. يعنى انت مثلا ممكن تشتغل فى الصحافة الاقتصادية لو مهتم بالصحافة أو مراكز الدراسات الاقتصادية .. ده غير انك ممكن تشتغل فى التدريب المتخصص بمعني انك تدي للناس زي كورسات فى مادة من المواد اللى درستها أو نوع محاسبة أو انك تشتغل في تدريب على تنمية المهارات عموما .. ده غير طبعا مجال الماركتينج أو التسويق وقد ايه هو مجال واسع ومطلوب بشكل كبير..

الطرق كتيرة بس محتاجة اللى يعافر ويتعب وميستسلمش وميفكرش بس فى اتجاهات الشغل التقليدية وبس

واللى عاوزة أأكد عليه ان الكلية دى من أكتر الكليات اللى ممكن تشتغل فيها على نفسك بعيدا عن الجامعة اللى انت فيها

الكورسات الأونلاين المجانية والي مش مجانية متاحة فيها بشكل كبير وهتسهلك انك تتعلم صح

ونصيحة كدة اخيره حاول تظبط الانجليزى بتاعك لأنه هيفيدك كتير سواء هتاخد كورسات أونلاين فبتبقى بالانجليزي أو لو هتستخدم مراجع أو لو مقدم على شغل فهتحتاج انجليزي كويس معاك

وبيبقى فيه كل سنة تدريبات الكلية بتوفرها للطلبة اللى تقديراتهم عالية فى البنوك حاول تاخدها لأنها هتفيدك جدا بعدين

وافتكروا دايما كلٌ ميسر لما خُلق له :"))

كليه تجاره شعبه اللغة الانجليزية

-اولا الكلية هي فرع تابع اداريا لكلية التجارة فهي شعبة يختص فيها التدريس باللغة الانجليزية ...

تختلف شعبة اللغة الانجليزية من حيث :-

1- الكتب الدراسية حيث انها يتم استيرادها من امريكا - كندا - بريطانيا ولا يتم تأليفها في الكليه الا فى حالات قليله جدا

2- اماكن التدريس والاعداد : حيث تكون الاماكن المخصصة للتدريس افضل واكثر تجهيزا من نظيرتها في كلية التجارة وبالنسبة للاعداد فيكون العدد في شعبة اللغة الانجليزية اقل بكثير من كلية التجارة عامة كما ان للكلية مصاريف خاصة بتختلف من جامعة للتانية حوالي 6000 - 9000 جنيه سنويا او اكتر بعيدا عن الكتب وبتزيد كل سنة عن اللي قبلها

في جامعات بتاخدها مجموع اعتباري اغلب الجامعات وده عبارة عن المجموع الكلي + درجة الانجليزي

النقطة التانية -أقسامها

يوجد في الكلية 6 اقسام او تخصصات لكن بتختلف بردو من جامعة للتانية

1- المحاسبة : وهو القسم الاكثر عددا

2- ادارة الاعمال : وهو ثاني لاقسام من حيث العدد

القسمين دول موجودين في جميع الجامعات

3- الاحصاء والتأمين

4- الاقتصاد

5- التجارة الخارجية

6- سياسة

وده بيختلف من جامعة للتانية

الاقسام الاساسيه هى المحاسبه و اداره الاعمال .. و هى موجوده فى اى كليه

ثالثا-نظام الدراسة

مدة الكلية 4 سنوات

يدرس جميع التخصصات في السنتين الاولى والثانية ويتم التخصص في بعض الجامعات من السنة الثالثة وبعض الجامعات في السنة الرابعة وفي اقسام من السنة التانية بس دي في جامعات معينة فقط زي قسم سياسة جامعة اسيوط

كل عام يقسم الى ترمين دراسيين ولا توجد مواد تستمر اكثر من ترم واحد في دراستها حتي لو في مادتين في الترمين بنفس الاسم بيكون المنهج من جوّة متغير

تقسم درجات المواد على 3 اشياء تختلف من جامعة للتانية ،، بس موجود في اغلب الجامعات

1- اعمال السنة

2- امتحان الميد ترم

3- امتحان نهاية الترم

لا تخلو شركة من الاحتياج الى خريجي كلية التجارة

فبعض البنوك والشركات المختصة محاسبيا و شركات خدمة العملاء وغيرها التي تقوم بالكاامل على خريجي الكلية

نجد ان جميع المنشئات تحتاج لخريجي الكلية سواء كانت مستشفيات او شركات خاصة او مصانع

فخريج الكلية يكون على علم واسع سواء محاسبيا او في الجوانب الادارية من (مبيعات - خدمة عملاء - تسويق -موارد بشرية - استثمار وغيرها من التخصصات المختلفة )

محاسبة :

خريج قسم المحاسبة يتمتع بفرص واسعة من العمل داخل وخارج مصر

فالبنوك وشركات المحاسبة والضرائب هم اكبر الاماكن احتياجا لخريجي القسم ولكن لزيادة قيمة الخريج في سوق العمل يحتاج الى شهادات لتثقل من معلوماته مثل شهادات : CMA , CIA , CFA , CPA

وجميعهم شهادات معتمدة دوليا يعترف بها فيجميع بلاد العالم

ولا يقتصر عمل المحاسب في الاماكن السابق ذكرها فقط ولكن لا يخلو مكان من الاحتياج لخريج كلية التجارة بشكل عام وخاصة خريج قسم المحاسبة

فالمستشفيات .. شركات الادوية .. الشركات الخاصة ... وجميع الشركات لا بد من وجد قسم خاص للحسابات بداخلها

يتمتع خريج قسم ادارة الاعمال بمعرفة واسعة في مجالات متعددة (التسويق - الموارد البشرية - خدمة العملاء - الادارة وغيرهم ) يعمل خريج القسم ايضا في البنوك وشركات المحاسبة وجميع الشركات السابقة ولكن في ادارة واقسام مختلفة تناسب طبيعة تخصصه ..

يحتاج ايضا خريج القسم لشهادات ودراسات اخرى ليثقل من قدراته مثل شهادة MBA في تخصص معين او الماجستير والدكتورا في التخصص المطلوب

كما ان الدراسة بالقسم قد تساعد الخريج منه بان يبدا مشروعا خاصا به ويقوم بدراساته الخاصة من خلال ما درسه في مرحلته الجامعية.

٦ تعليقات

كلية_زراعة

شباب الكليات والتنسيق العظيم .. ازيكوا ^^

نظرا ان مصر دولة زراعية بالدرجة الاولي .. ونظره برده اننا ماشين فيها بالحب وعلى حسب كلام الناس والي بيقولوه وبس

ففيه كليات كتير بتضيع في وسط الشكليات دية .. وبيتبصلها على حسب المجموع وبس .. ومبيتعملش حساب اذا كان الكلية والمجال ده مهم وبينفع الناس ولا لا

وكلية زراعة على رأس الكليات دية

مع ان الي بيدخل الكليه دي وبيعرف اللى بيتدرس فيها نظرته بتتغير عنها وبيعرف اد ايه هى مفيدة ومهمة

مبدأيا كده الكليه ٤ سنين … وممكن تدخلها من علمي بس .. وموجوده ف كتير من جامعات مصر في :

· زي القاهرة

· وعين شمس

· والزقازيق

· واسيوط وغيرهم.

وهي بتاخد من التلت مراحل عادي وواقات بتاخد لحد مجموع 80% وفيه سنين كتيرة بتبقي اقل كمان

ممكن لحد 75% مثلاً

ودي حاجة بتختلف من سنه للتانيه طبعاً

نيجي للاقسام بقي..

ومش معني ان دي كليه زراعة ان انت هتبقي بتزرع بس يعني! لأ خالص يعني

الكلية دي فيها 21 قسم … اه والله

يعني 21 تخصص تقدر تختار منهم ..

بس الاقسام ديه بتختلف اكييد من جامعة للتانيه … واكييد جامعات كتيره مش هتلاقي فيها كل الاقسام ديه .. بس الي هنقول عليهم دول معظم الاقسام الي مككن تلاقيها في زراعة

عندك بقى اقسام زي

1. قسم الإنتاج الحيوانى والسمكي.

2. وقسم إنتاج الدواجن.

3. وقسم الغابات وأشجار خشبية.

4. وقسم أمراض النبات.

5. وقسم علوم الأراض.

6. وقسم المحاصيل والفواكة والخُضَر.

7. وقسم البساتين.

8. وقسم النبات الزراعى.

9. وقسم الزهور ونباتات الزينة وتنسيق الحدائق.

10. وقسم الاقتصاد وإدارة الاعمال الزراعية.

11. وقسم الاقتصاد المنزلي.

12. وقسم علوم الأغذية وتقنية الألبان.

13. وقسم علم الحشرات التطبيقي.

14. وقسم المجتمع الريفى.

15. وقسم الإرشاد الزراعى.

16. وقسم المايكرو بيولوجيا الزراعية.

17. وقسم علوم الأراضي والمياه.

18. وقسم الكيمياء الحيوية الزراعية.

19. وقسم كيمياء وتقنية مبيدات الآفات.

20. وقسم الوراثة.

21. ومعهد الدراسات العليا والبحوث للزراعة والمناطق القاحلة.. وزي ما قولنا الاقسام بتختلف من جامعه للتانيه بس مش اوي يعني ده العام

والاقسام ديه كلها ممكن تدخلها لو كنت علمي علوم

اما علمي رياضه فبيقي قدامهم قسم هندسة زراعية .. وده هتدرس فيه طريقة تصميم شبكات الري الحديثة سواء بالرش أو بالتنقيط للمزارع .. بس بتوسُّع طبعا..

القسم ده شغله يختلف شويه عن باقي اقسام الكلية لانك هتبقي مهندس ومطلوب في كل المزارع الكبيره .. وهتبقي المسئول مع فريق الصيانه وتصميم شبكات الري والابار .. وصيانه كل المعدات الزراعيه والتعديل عليها .. وبتتعاقد على المعدات الزراعيه والجرارات..

وانت ممكن تدخل أى قسم من الي اتكلمنا عليهم

بس دلوقتى فيه نظام اسمه المجالات .. بمعنى انك عشان تدخل قسم .. لازم تدرس كمان المواد الى تبع مجال القسم الي انت هتدخله.

مثلا : مجال وقايه النبات بيتكون من 3 اقسام او بمعنى اصح هتلاقي فيه تلت اقسام الي مرتبطين بمجال وقايه النبات وهما (قسم حشرات - وقسم مبيدات - وقسم امراض نبات )

يعني لو دخلت مثلا قسم حشرات .. يبقي لازم تدرس كورسات من القسمين التانيين الي هما مبيدات وامراض النبات.. وده بيفيد جدا فى الشغل علي فكره..

وعموما التخصص بيبدأ من سنة تالتة، يعني بتتخصص تالتة ورابعة.

فى سنة أولى وتانية بتاخد مواد بتوضح كل اقسام ومجالات الكليه عشان تقدر تحدد بعدها تدخل انهي قسم.

وطبعا فيه أقسام على حسب التقدير العام واقسام على حسب تقدير مواد معينة .. وعشان كده لو عايز قسم أو مجال معين لازم تشد حيلك فى المواد اللى القسم ده محتاجها عشان تتقبل، غير إن كل قسم بيكون محدد عدد طلبة معين عشان يدخلوه

نيجي لنظام الدراسه بقي..

سنة أولى : بتاخد فى الترم 7 مواد

أغلب مواد سنة أولى بتبقي أحياء و كيميا وفيزيا ووراثة يعني مثلا زى مواد (كميا عضويه - وعلم حشرات - وعلم حيوان - وعلم النبات - وكميا تحليله )

وفيه كمان مواد أدبيه وإحصائية ( زي اقتصاد زراعى - و مجتمع ريفى )

وهيكون عندك خلفية ان شاء الله عن المواد ديه من ثانوية عامة.

سنة تانية : بتاخد مواد جديدة عليك

وبتكون اكتر مجالاتها نباتى و صناعى

زى مواد ( علم الألبان و نباتات الزينة و أساسيات الفاكهة و علم تصنيع الاغذية وأساسيات الخضر وكده )

وبعد سنة تانية بتحدد تخصصك بعد ما تكون أخدت فكرة عن كل قسم.

والدراسة في الكلية.. المفروض المفروض إنها كلية عملية،

بس للأسف الواقع غير كده.. فممكن نقول إن التلت بيبقى عملى فعلا والتلتين نظرى .. وبرده فيه مواد كلها عملى ومفيهاش نظرى.

بس عامة العملى في الكلية ممتع جدا فى كل الاقسام، وجزء العملي ده بيعتمد برضو على ميزانية الكلية .. فمثلا فيه جامعات بتجيب أدوات وفيه جامعات لا.

طبعا هتقولي العملي بيبقي عباره عن ايه ؟

بص يا سيدي هو بيختلف زي ما قولنا من جامعه لغيرها وحسب المستوي يعني.. بس كله بيبقي في معامل مخصصه .. وحسب القسم بتاعك بيبقي شكل العملي

يعني مثلا قسم وقايه النبات .. العملي بتاعه.. بيقي في ٥ معامل تقريبا

عندك معمل مبيدات

ومعمل مكافحة الحيوية وإنتاج التطفلات

ومعمل النمياتودا والاكاروس

رمعمل الدراسات البيئية

ومعمل الفسيولوجي

وهكذا بقي..

وملحوظة صغيره عن جامعة القاهره .. عشان هيا محتلفه شوية عن باقي الكليات .. يعني ماشيه بنظام الساعات المعتمده .. وفيها انجليزي ودولي وعربي وكده

طيب احنا متفقين من الاول انك اكيد مش هتتطلع من الكلية تشتغل فلاح والهبل ده .. بس طيب انت هتشتغل ايه؟

بص خريج زراعة ممكن يشتغل

في شركات استيراد وتصدير

وممكن في شركات كيماويات

وحجر صحى في المزارع

وشركات الاغذية والألبان ومزارع فاكهه

ومجالات وفرص الشغل بتفرق من قسم للتاني .. بس بحاجات بسيطه يعنى بنسبه 10% القسم بتاعك بيفرق فى الشغل

فمثلا فيها اماكن ومجالات شغل بتحتاج للشباب أكتر وبيبقى صعب على البنات، زي شغل الشركات والمصانع والمزراع وبتحتاج شغل بليل.

لكن البنات غالبا بتبقى مطلوبة اكتر في الشغل الإداري والمعامل.

وأهم حاجه عشان تلاقى فرص شغل كويسة وتعرف تحدد قسمك .. حاول تروح للدكاترة اللى هتعرفهم فى الكلية وهما هيعرفوكم على مجالات الشغل والقسم اللى هتختاره.. وهيعرفوا الشركات إنكم موجدين .. لإن فيه شغل كتير بيبقى عايز خريجين زراعة بس صعب يوصلولهم.، وحاول يكون ليك علاقة مع الي اتخرجوا عشان يساعدوك.

ودور على شغل او علي تدريب علي جوجل من أول سنة كلية وقدم فيه

وهتتقبل وهتكون الشركات دى عايزاك بعد ما تتخرج وكل التدريبات هتتحط فى السي ڤي بتاعتك في الاخر

اخر حاجه خالص .. التقدير سهل في الكلية، والكلية جميلة وممتعة للي يحطها في دماغه .. وممكن تشتغل فيها من وانت لسه في الكلية.

فحاول تستفيد بكل حاجة بتتعلمها عشان هتفيدك بعدين.

ربنا يوفقكو في الي جاي

كلية_تربية

سلاموا عليكوا

عارفين الكلية اللي ناويين نتكلم عنها النهارده ممكن نسميها ايه .. ممكن نقول عليها كلية التعويض عن تحقيق الاحلام

ايه الكلام الكبير دة.. تعالوا نتكلم ابسط من كدة عشان نفهم الموضوع .

كلامنا النهاردة عن كلية تربية .. تمام كدة.. ليه بقي بنقول انها كلية التعويض عن احلامنا ؟

مثلا لو حد عاوز يدخل هندسة لانه بيحب الرياضة والشغل مع الارقام والحسابات بس للاسف مجموعه مجبش الكلية فهو ممكن يدخل كلية تربية قسم عام رياضة .

ولو حد كان علمي علوم و لسوء الحظ مدخلش الكلية اللي نفسه فيها فهو هيدخل تربية بيولوجي او كميا وهيتعامل بردو مع المعادلات والحاجات اللي متعود عليها .

ودة طبعاً غير اللي نفسه يبقي مدرس اد الدنيا وبيحب مجال التدريس فاكيد دة مكانك الطبيعي.

مبدأيا الكلية اربع سنين .. وممكن تدخلها من علمي او ادبي .. وبالنسبة للتنسيق فتربية من ادبي بتبقي رابع كلية ليك بعد سياسة واقتصاد واعلام والحاجات ديه .. وبتبقي بعد كليات الطب والعلوم لو كنت يعني علمي علوم ولو كنت علمي رياضه فهي بتكون بعد هندسة وعلوم .. وعموما كليه تربية تعتبر اول كلية بعد كليات المجموعة الطبيه والهندسية

واللطيف ان فيه ناس كتيير بيحولوا من كلية السن لتربية .. لو ملحقوش او معرفوش يدخلوا الاقسام اللي هما عاوزنها .. يعني لو ملحقتش السن انجليزي او فرنساوي .. عشان شروطهم مكنتش ماشيه مع مجموعك في مواد اللغات .. فممكن تدخل تربية عام انجليزي او فرنساوي

تعالوا نتكلم بشكل اوضح عن الكلية ونفهم كل حاجه عنها

كلية تربية بشكل عام بتتكون من 3 اقسام رئيسية الي هما

تربية عام

وتربية اساسي

وتربية طفولة

و دة بالنسبة للبنات

لكن للولاد فهمي قسمين بس الي هما تربية عام وتربية اساسي

والتخصص في اي حاجه منهم بيبدا من سنة اولي

والفرق بين عام واساسي انك لما تتخرج ان شاء الله لو كنت تربية عام فانت هتشتغل مدرس اعدادي وثانوي لكن لو كنت تربية اساسي فانت هتكون مدرس ابتدائي اواعدادي

نتكلم عن تربية عام شويه

زي ماقولنا انك بتشتغل مدرس اعدادي وثانوي

والقسم دة اعلي قسم في الكلية من ناحية المجموع .. بمعني انه بياخد الي جايبين اعلى مجموع في ثانوية عامة

والقسم بيتكون من كذا قسم حسب طبعا انت عاوز تتخصص في ايه وبيقي فيه اقسام ليها تنسيق داخلي او شروط بمعنى اصح عشان تقدر تدخلها

والاقسام عموما بتبقي زي قسم لغة عربية .. قسم انجليزي .. وقسم رياضة .. و فرنساوي .. وقسم فلسفة .. وقسم جغرفيا .. وقسم الماني .. وقسم علم نفس .. قسم بيولوجي .. قسم كميا .. قسم فيزيا .. وقسم تاريخ وعيش بئي .

وانت بتختار انت حابب تكون مدرس ايه او هتدخل في انهي قسم فيهم .. خلي بالك ان دول كلهم ليهم تنسيق داخلي يعني على حسب مجموعك في المادة بتاعتها .. يعني مثلا لو عاوز تدخل قسم لغة عربية لازم تكون جايب درجة حلوة في العربي بتاع ثانوية عامة وهكذا .

بس في ملحوظة مهمة لو انت كنت علمي علوم فانت قدامك بس اقسام احياء وكميا وفيزيا .. لو كنت علمي رياضة فانت قدامك بس قسم رياضة بس

اما بئي لو كنت ادبي فعيش بئي في اي قسم من بتوع ادبي

وملحوظة كمان ان قسم بيولوجي وفيزيا وكميا بيكون بمصاريف ممكن تلاقيها مثلا في شوية جامعات حوالي 3 الاف جنيه في السنة زي جامعه عين شمس مثلا

وعلى فكره انت بتختار قسم من اللي قلنا عليهم دول بردو من سنة اولى

نيجي لقسم اساسي ودة القسم اللي بعد قسم عام على طول من ناحية مجموعك في الثانوي برده

وبتتطلع منه عشان تبقي مدرس ابتدائي وبعد ماتترقي بتبقي مدرس اعدادي

اقسام اساسي بتبقي زي لغة عربية بردو ورياضة و مواد اجتماعية وعلوم

وخلي بالك بردو وانت بتختار القسم اللي انت عاوزه من مجموعك في المادة الخاصة بيه

وهنا هتلاقي نفس الملحوظة .. لو كنت علمي علوم فانت ممكن تدخل تربية اساسي علوم .. ولو كنت علمي رياضة فانت ليك قسم رياضة وهكذا

من نحية الشغل العملي فييقي في المدارس .. و بيكون من سنة 3 و4 وبيبقي ليك يوم في الاسبوع محدد ليك .. ومتحدد ليك مدرسة وفصل .. وتعيش بقي مع الواقع والطلبة

وخلي بالك انك في سنة تالته بتنزل مدارس اعدادي ورابعه بتنزل مدارس ثانوي

## نتكلم بئي عن القسم البنانيت .. فبصي بئي لو انتي بتحبي الاطفال و بتحبي اللعب والاعمال اليدوية والشغل دة .. انصحك ياحلوة تدخلي قسم طفولة ..هتستمتعي اوي لان شغلك هيكون مع لاطفال. وهتشتغلي بايدك شغل كتير زي انك تعملي اعمال ابتكارية ويدوية زي العرايس مثلا ولوح و قص ولصق وبتتعلمي ازي تتعاملي مع لاطفال وايه هي طرق التدريس الكويسة ليهم

مواد القسم دة بتكون دراسة كاملة عن الطفل واي حاجه بتخصه في المرحلة دي

مثلا فيه ماده اسمها قصص الطفل .. وبتدرس فيها ازاي تقدر توصل معلومة للطفل من القصة دي .. وكلام نظري عن الفرق بين القصة والمسرحية وغيرها من انواع الادب

وعندك التربية الاخلاقية

ودي طبعا اهم مادة لازم تدَرسها (المدرس هو الي بيدرسها يا اشرقت للطفل فبتكون بالفتحه XD) للطفل لانها هي اللي بتعرفه بالاخلاق والقيم اللي بيمشي عليها بقية حياته

ومواد زي الموسيقي

وطبعا بتدرِس فيها موسيقي هادفة مش موسيقي مهرجات وبتتعامل فيها مع الالات بانواعها .. عشان تعلم في الاخر الطفل ازي يستخدم الايقاع في التعليم

والعملي في القسم ده بيكون في سنة تالتة ورابعه بتنزلوا برده مدارس وتتعاملوا مع الاطفال .. وبيكون يوم في الاسبوع وبيقي فيه اعمال يدوية زي ماقولنا .. والحاجات الي اشتغلتي فيها بايدك قبل كده

القسم عموما ممتع للي حابه والي حابب يبني ويأسس طفل .. واكيد محتاج حضور في الكليه وشغل وصبر

فيه حاجه لطيفه هتلاقيها في تربية .. وهيا ان فيه ناس بتتخرج بشهاده ليسانس وفيه ناس بتتخرج بشهادة بكالريوس

بمعني ان الي بيتخرج من الاقسام الادبي في الكلية وبيكون دارس مواد نظرية فبيبقي معاه ليسانس.. والي بيقي داخل قسم علمي والمواد بتاعته نظري شويه .. فالشهادة بتاعته بتبقي بكلريوس العلوم والتربية.

اخر حاجه حابه اقولها

ان الكلية فعلا مهمة لان مهنة المدرس دي اهم مهنة في اي مجتع واعي .. عشان في الاخر هو اللي بيطلع الي بيدخلوا طب وهندسة وتجارة .. فلو كان المدرس دة مش دارس ومتأسس صح عمره ما هيعرف يوصل المعلومة للطلبة ولا هيقدر يأسس جيال صح

بالنسبة بقى يا استاذنا للشغل.. فهو متوفر جدا بس لازم تتعب في الاول .. لكن هترتاح بعدين

وممكن تشتغل مدرس في مدرسة خاصة مثلا .. وعندك الدروس الخصوصيه .. او لو مش حابب لا ده ولا ده

فمككن تاخد كورسات وتطور من نفسك وتشتغل في مدارس لغات اوانترناشونال .. وديه فلوسها بتبقي كويسه برده

ده غير انك ممكن تسافر بره

ولو كنت في قسم من اقسام للغات فممكن تشتغل في الترجمة او اي مجال عموما بعيد عن التدريس

وقسم كيما بيقي قدامهم الشغل في المعامل وكده

ولو كنت قسم فيزيا ففرصة شغله حلوه لان عدده ديما قليل لانه ملوش تنسيق داخلي ..

وعموما يعني .. انت ممكن من اول سنة او اتنين تنزل تشتغل او تتدرب كمساعد لاي مدرس عشان تاخد خبره كويسه

الكلية فعلا سهلة وكويسة وهتحقق احلام ناس كتير ان شاء الله وابسط ياسيدي تقريبا مش هتحتاج تاخد كورسات في الكلية فهتكون مرتح ان شاء الله بنتمنا لكم كل الحظ اللذيذ والحياه الحلوة

كلية_تربية_نوعية

اهلا اهلا.. بوست النهارده ليه تاريخ عظيم مع كل واحد فينا.. طبعا كلنا لينا ذكريات مع حصة الرسم بتاعه المدرسه وقد ايه الواحد كان مبدع.. مبدع جدا :sweat_smile: ولا حصة الموسيقي اللي بتقلب لموسيقي من اللي هي :sweat_smile: ولا حصة الإقتصاد المنزلى ولا ولا.. كانت ايام والله.. المهم احنا دلوقت هنعرفك لو حابب تبقى مسئول عن الحصص دى تعمل ايه وتدخل كليه ايه ؟ عرفتوا الكلية ؟

اييووه بالظبط.. تربيه نوعية تمام :relieved:..

بصوا هي كلية كولكشن كده فيها كذا قسم وهتلاقي نفسك فيها ان شاء الله وعشان نبقي صُرحا مع بعض هي كليه معتمدة ع الشغل العملي و المشاريع بالإضافة للنظري طبعا. و التخصص بيكون من اول سنه ليك فيها..

الكلية في اغلب الجامعات بتتقسم 6 اقسام..وهم

تربية الفنية

موسيقي

تكنولوجيا التعليم التربوى

الإعلام التربوى

الإقتصاد المنزلى

و العلوم التربوية والنفسية

وبعض اقسامها بيحتاج امتحان قدرات قبل دخوله زي فنون وموسيقى.. والامتحان ده بيبقي ف شهر 7..

نتكلم عن قسم قسم بقي.

اول حاجة تربية موسيقية:

وده بيحتاج امتحان قدرات زي ما قولنا.. حاجة بسيطه بس بيعرفوا منها اذا كنت بتعرف تميز الالات عن بعضها والنغمات نفسها..

وبتبقى عبارة عن تعليم موسيقى وعزف على الات حسب ما الدكتور بيحدد وبتختار آلة واحدة تتخصص عليها بجانب إنك بتدرس بقية الآلات التانيه.

هتخلص وتشتغل مدرس موسيقي مثلا او اشتغل علي نفسك وخد كورسات او تدريبات مثلا حسب الاله اللي بتعزف عليها.. كل ده هتلاقيه في الأوبرا..

القسم التانى التربية الفنية:

- وده ببيحتاج دخول امتحان قدرات بردو..بالمناسبة مش شرط تكون بتعرف ترسم لإن القسم مش معتمد على كده بس.. واللي مبيرسمش هينبهر بنفسه خلال الاربع سنين وهيطلع شغل حلو ، وامتحان القدرات بيبقى رسم قريب من امتحانات ثانوي.

- قسم فنون بقى فمحتاج حد حابب المجال جدا لانه مجهد جدا واكتر قسم عملي في الكليه ده غير انه محتاج ابداع علشان تطلع شغل حلو وجديد وده مش هيحصل الا اذا كنت حابب المجال

ده غير الحضور اليومي ..و اوقات الشغل بيطول في الكليه وممكن الطلبه تتأخر و ترجع بليل.. ماشي يا بنات ؟ بنقولكو اهو :sweat_smile:

والدراسة في القسم معتمده على الاعمال الفنيه باشكالها المختلفه.. ومواد سنه اولي وسنة تالته زي بعض ومواد تانيه ورابعه زي بعض.

ازاي ؟ هقولك..

مثلا اولي و تالته المواد العملي بتبقى

نحت وده شغل بالطين وتشكيله

طباعه وليها انواع زي بصمة

رسم و ده رسم لوحات بالرصاص او الوان

تصميم و ده شغل زخارف بالالوان

و في سنة تانيه ورابعه فيه مواد زي

خزف ده شغل طين بس مجسم و تشكيله و تعمل فازات وكده

معادن وده شغل بشرائح نحاس او اي معدن لعمل اكسسوار او اي حاجه

تصوير وده رسم لوحات زيت او عمل لوحات بخامات من البيئه

خشب وده اعمال فنيه ومنتجات باستخدام الخشب زي استخدام قشرة الخشب وعمل اركيت وغيره

ده مثال لبعض المواد عشان تبقو فاهمين ومعانا علي الخط..

وفيه ماده كده مستمره معاك طول السنين ما عدا سنه رابعه هي ماده اشغال فنيه ودي عمل منتج من اي خامة ممكن ورق او بلاستيك او زجاج او حبال حسب ما بينطلب المشروع وبيتقدم للدكتور

في الاغلب بيبقى عدد المشاريع كتيره كل سنه وقليل جدا اما الدكتور يرجع المشروع للطالب .. القسم مُكلف عشان الخامات وعمل المشاريع دي .. بس لطيف وحلو وعاوز حد حابه بجد .. وهتشتغل مدرس تربيه فنيه او تبقي معيد فالكلية وكدة

ملحوظة صغننة : قسم الفنون تابع لقسم تربية فنية علشان متتغلبطوش بس :slight_smile:

تالت قسم هو قسم اقتصاد منزلى :

وده بتدرس فيه مواد عن التغذية والأكل والملابس والتفصيل والتطريز وتصميم الملابس ، كمان بتدرس كيماء وفيزياء ورياضة ومواد إدارة.

وبتشتغل مدرس اقتصاد منزلى أو أخصائي تغذيه أو مصمم ملابس .. وممكن شركات لو كان فيه تركيز على مواد الإدارة.

دلوقتى عندنا فضائية عندنا فضائية.. ايوه هو قسم إعلام :

والقسم ده فيه شعبتين : صحافة ومسرح

فى سنة أولى وتانية بتدرس مواد خاصه بالإعلام والمسرح وفى سنه تالته بتختار إما:

- صحافة فتتخصص فى دراسة الصحافة.

- او مسرح وده بتدرس الإخراج والإضاءة والتأليف والنقد والتحليل والتصوير.

مجال شغلهم ايه؟

-الصحافه ممكن تشتغل فى الإعلام زى ما تحب.

-المسرح بردو كذلك إلى جانب إن المسرح ممكن تكمل وتختار حاجه زى الإخراج وتدرسها وتشتغل بيها..

نيجي للحاجة اللي احنا عايشين ف عصرها.. وهو قسم التكنولوجيا:

القسم ده فيه شعبتين شعبة عامة وشعبه حاسب

بتدرس في أولى وتانية كل المواد المتخصصة بالكمبيوتر زى البرمجه والمصغرات الفيلمية وتكنولوجيا التعليم واستخدامها فى التدريس.

وفى تالته بتختار إما:

-شعبه عامة: ودي بعد ما بتتخرج بتشتغل أخصائية غرفة الكمبيوتر فى المدرسة مثلاً وفيها بتدرس اجهزة العرض وخلافه.

-شعبة حاسب: ودى بتبقى مدرس حاسب وبتدرس كل المواد المتخصصة بالكمبيوتر و التكنولوجيا.

وممكن لو مش عايز تشتغل مدرس ممكن مثلا تشتغل فى شركات وغيره.

اخر حاجة بقي العلوم التربوية والنفسية : وركز معايا وفتح مخك عشان الجزئية دي ملعبكة شويه..

هو عباره عن مجموعتين:

المجموعة الأولي بيسموها المقررات التربوية النوعية التخصصية زي:

تاريخ التربية الفنية ونظرياتها

مبادئ تدريس التربية الفنية

طرق تدريس التربية الفنية

طرق تدريس التربية الموسيقية

علم نفس التربية الفنية

علم نفس التربية الموسيقية

فنون أطفال وبالغين وفنون الفئات الخاصة.

والمجموعة التانية بيسموها مجموعة المقررات التربوية العامة زي :

مدخل العلوم التربوية

مدخل إلي العلوم النفسية

المناهج وطرق التدريس

علم نفس النمو وعلم نفس التعليم

تاريخ التربية ونظام التعليم بمصر

تكنولوجيا التعليم

القياس والتقويم

الأصول الفلسفية للتربية والأصول الاجتماعية للتربية

التربية المقارنة والتربية الصحية

الإرشاد النفسية والتربية الميدانية.

نقطه مهمه هنا..

قبل ما تقرر هتدخل ايه من دول شوف الجامعه اللى هتدخلها الاول فيها القسم ده ولا لا لان الاقسام دي مش متوفرة فى كل الجامعات ..هى موجودة فى جامعة عين شمس ، و4 أقسام موجودين فى جامعة القاهرة وهما *الموسيقي والفنيه والعلوم التربوية والنفسية و الإعلام *.. ف ركز قبل ما تكتب الجامعه واعرف القسم اللي عايزه فيها ولا لا

سنه ثالثة و رابعة بينزلوا تربية عملي ف المدارس أيا كان القسم ايه ..حتى اعلام ..آه حتى اعلام

كمان فيه مشروع بيتسلم ف اخر سنه اعتقد ف معظم الاقسام اسمه مشروع تخرج بيكون فردي او جماعي.

غير ان كل الاقسام ف الكليه اربع سنين

أما بالنسبة لمجال العمل فهي بتخرج معلمين ف مدارس

أو ممكن شغل خاص

دروس تعليم و كورسات

أو عمل منتجات و يتعاقد مع محل عشان يبيع

أو يعرض منتجات ع النت و يدخل ف أي اوبن داي مثلا..

والشغل هيبقى أكبر .. كل ما كان ابداعك أكبر :slight_smile:

كلية تربية رياضية

الكلية مدة الدراسة فيها 4 سنين و الكلية بتهتم بتخريج مدرسين و مدربين تربية رياضية سواء في المدارس أو النوادي .. بيتخصص الطالب في لعبة واحدة بس في سنة تالتة بعد ما يكون درس كل الالعاب في سنة أولي و سنة تانية .

علشان تقدم لكلية تربية رياضية و تتقبل فيها هيكون لازم انك تعدي و تنجح في اختبارات الكلية اللي بتتكون من اختبارات القوام اللي هي الطول و الوزن و اللياقة البدنية . و اختبارات المهارة و دي بتكون اختبارات في اللعبة اللي انت بتحبها او بتلعبها

و كمان اختبار الهيئة و دا عبارة عن انترفيو مع دكتور من الجامعة تتكلم فيه عن نفسك

و اخر حاجة الاختبار الطبي و دا بيكون عبارة عن فحص كااامل للجسم...

في كلية تربية رياضية في أكتر من قسم منهم :

قسم التدريب : طبعا واضح من اسم القسم ان الطالب بيدرس فيه علم التدريب و طريقة تدريب الفرق و المنتخبات . و كمان بندرس فيه علوم الحركة و علوم النفس و البايو ميكانك زائد المواد العملية و هي الالعاب الرياضية زي كرة القدم و غيرها.

تاني قسم هو قسم التدريس : قسم التدريس بقاا بيعتمد علي الدروس النظرية بندرس فيه كيفية تدريس مجموعة طلبة في المدارس و المعسكرات التدريبية زائد المواد العملية في القسم دا .

تالت قسم و هو قسم الادارة : و في القسم دا بيدرس الطالب ازاي يدير المؤسسات الرياضية بمختلف انواعها

كلية تربية رياضية موجودة في 14محافظة من محافظات مصر و هم : أسيوط - بني سويف - بنها - حلوان بنين - حلوان بنات - كفر الشيخ - المنصورة - طنطا - اسكندرية بنين - اسكندرية بنات- بورسعيد - السادات - المنيا - جنوب الوادي - سوهاج - اسوان .

أما عن مجالات الشغل بعد التخرج من الكلية :

ف انت ممكن تتوظف في مدرسة حكومية كمدرس تربية رياضية او مدرب في نادي

او اخصائي تأهيل حركي و اصابات ملاعب و دي بتكون حاجة زي دكتور العلاج الطبيعي كدا كمان ممكن تدخل اي كلية عسكرية و بتدرس مدة معينة مش طويلة و بعد كدا تكون ظابط تخصص و كمان ممكن تكون اداري في اي نادي رياضي

*الكليه جميله ومستقبلها كويس جداً و مش مقتصر علي مدرسين الالعاب بس ومجموعها مش كبير مش لازم تستني التخرج عشان تشتغل ممكن ببساطه وانت في سنه اولي تاخد دورات وتشتغل بيها في مجالك وبمقابل مادي كويس جداً يكاد يكون مغري وانصح اي حد يخشها ميفوتش محاضره عشان النجاح فيها يكاد يكون متوقف علي الحضور بس

بالتوفيق ليكم و ايامكم اللى جايه حلوة ان شاء الله :heart:

لو شايف ان البوست مفيد متنساش تعمل منشن و شير لاى حد عايز يدخل كلية تربية رياضية :wink::heart:

١٤ تعليقًا

كلية_آداب

اخيرا جه الوقت علشان نكلمكواعن كلية آداب العريقه والمميزه زيكم ..

هي من كُتر ما فيها من أقسام وتخصصات ممكن تسميها كلية "تحقيق الطموحات".. بتجمع بين حاجات كتير عندك مثلا لغات زي ألسن، وبين مواد تانية ادبية زي تاريخ وجغرافيا .. والفن زي الدراما المسرح وغيرهم كتير باختلاف الجامعات ..

وغالباً بيكون تنسيقها مش عالي، عشان كده بترضي طلبة كتير وبيحبوا دراستها..

* قبل ما نكمل كلامنا عن الكلية ، نحب ننبهكم ان الكلام فى البوست كتير جدا وبالتفصيل عن كل حاجة فى اداب ، لو مبتحبش القراية تقدر تسمع الحلقة اللى موجوده فى اول كومنت وموجود فيها نفس الكلام ، أو ممكن تكمل قراية البوست العادى *

كلية آداب للعلمي بشعبتيه، و للأدبي طبعا..

تنسيق السنة اللي فاتت كانت أعلى كلية هياداب عين شمس واخدت من 84.1 % والحد الأدنى كان في انتساب كفر الشيخ ب66.4 %

طبعاً ده هيختلف السنادي .. بس دي حاجة متخوفش خالص متقلقوش ربنا مبيخذلش حد ولا بيضيع مجهود حد..

ده غير إن التحويل بين الجامعات في المحافظات ممكن تعمل تقليل اغتراب ، و ممكن تقضي أول سنة آداب جامعة بعيدة وتاني سنة تحول جامعة قريبة ليك.. مفيش اي مشكله يعني بس تيجي علي نفسك وتجيب تقدير..

الكلية ٤ سنين، من أول سنة بتحدد قسمك اللي عايز تتخصص فيه.. بعد التقديم على طول وهشرحلك بيكون ازاي، بس الأول نتكلم عن الأقسام المتاحة..

- عندك أقسام لغات زي:

آداب عربي، انجليزي، فرنساوي، الماني، اسباني، ايطالي، صيني، ياباني ..

ولغات شرقية زي:

فارسي، عبري، تركي، أردو

كمان عندك أقسام زي:

علم نفس، علم اجتماع، فلسفة، تاريخ، جغرافيا، اعلام، آثار، ارشاد، دراما ونقد مسرحي ، مكتبات ومعلومات .

بتختلف الأقسام من جامعة لجامعة، بس دي غالباً كل الأقسام المتاحة في اغلب جامعات مصر الحكوميه.

بعد تنسيق الجامعات ما يظهر وتترشح لكلية آداب وتقدم، بيكون عليك انك تكتب ٣ رغبات للأقسام اللي نفسك تدخلها حسب أولوياتك. مثلاً تكتب أول رغبة آداب انجليزي، لو مجاتلكش تكون تاني رغبة فرنساوي، التالتة علم نفس وهكذا، حسب التنسيق الداخلي للكلية وحسب رغبتك.

قبل كتابة الرغبات بينزل في الكلية شروط دخول كل قسم، بمعني مثلاً ييعملوا حد أدني لكل قسم بالنسبة لدرجات ثانوية عامة اللي هو مثلاً انجليزي بيعملوا شرط القبول ان درجتك في انجليزي ثانوية تكون أعلى من 48.. وفيه أقسام تانية بتعتمد على مجموع درجات اللغات زي اعلام مثلاً، وفيه أقسام بتعتمد على المجموع الكلي في ثانوية .. وأقسام بتعتمد على المجموع الكلي بالاضافة لمجموع مادة معينه في ثانوي .. الشروط بتختلف من قسم لقسم ومن سنة لسنة طبعا .. وبعد التقديم إن شاء الله هتقدر تعرف ايه الاقسام اللي تناسبك وتختار منها.

طيب نتكلم عن الدراسه ذات نفسها

عندك في أقسام اللغات..

بتدرس لغة، ومواد أدبية، وتاريخ، ومواد فرعية.

- نتكلم عن المواد الفرعية: بتكون لغة جانبية من اللغات الاوروبية، لاتيني او فرنساوي او الماني بالاختيار.. وعربي.. وحقوق انسان. بعض المواد بيكمل معاك للآخر ومواد بتفضل معاك لحد سنة تانية بس زي اللغة الاوروبية.

- التاريخ: على حسنب لغتك بتدرس تاريخ اللغة وتاريخ الدولة بتاعتها، وحضارتها. مبيكونش جزء كبير، ومش في كل سنين الدراسة.

- المواد الأدبية: أدب، دراما، ورواية اللي هي مسرحية مثلاً.. مفاهيم الأدب وتاريخ الأدب.. بعض المواد دي بتفضل معاك برضو لحد الآخر. وليهم حبايبهم.

- اللغة: بتدرس فيها اللغة في حد ذاتها من حيث: الصوتيات (الفوناتكس)، واللغويات، والترجمة، والحاجات اللي تعلّي مستوى اللغة كلغة متعارف عليها زي المقال مثلاً..

دي كل المواد الدراسية تقريباً، أول سنة بتدرس فيها الاساسيات اللي قولنا عليها دي كلها، بعد كده في مواد بتستمر معاك ومواد بتنتهي في سنة أولى أو تانية أو غيرها..

الدراسة في أقسام تانية زي علم نفس وفلسفة وتاريخ وجغرافيا وكل الاقسام الباقية بيكون فيهم برضو مواد فرعية زي لغة بالاضافة لمواد عامة بيدرسوها عن القسم ومواد متخصصة في القسم نفسه..

- من الحاجات الحلوة في الدراسة في الكلية دي انها مبتقفش على الحفظ والصم زي ما معروف عنها، بالعكس، الدراسة فيها بتكون زي معلومات عامة انت حابب تعرفها عن القسم اللي حبيت تدخله، وبيتطلب منك أبحاث ونشاطات تزوّد من ثقافتك ومعلوماتك.. ودرجاتك طبعا..

الدراسة مش صعبة ولا سهلة هي علي حسب القسم، بس عموما هي ممتعة جداً لو انت حابب المجال وده هيهوّن عليك اوي..

- نظام دراسة الأقسام صعب نشرحها كلها لأنها بتختلف من جامعة للتاني بس ممكن تدخل علي موقع الجامعه اللي انت حابب تدخلها وتشوف تفاصيل القسم اللي عايزه.

نيجي بقي الكلام اللي مستنيينه.. مستقبلك وشغلك هطلع من الجامعه اقعد فالبيت؟..

ان شاء الله لأ بص معانا بقي..

نبدأ بقسم الانجليزي..

يعتبر قسم اللغة الانجليزية من الأقسام ذات الأهمية الكبيره و ذلك لارتباطه الوثيق بمتطلبات العصر وااااااا.. ايه شغل الراديو ده :joy:

بص بقي لو انت ناوي تدخله تعرف انه لازم يكون عن حُب! اصل انت هتدرس تاريخ اللغه نفسها ف انت فعلا لو داخله وانت حابه وشاطر فيه تقدر تضمن مستقبل باهر

ولو دخلت وحبيته بعدين مش مشكله تقدر تضمن برضه ان شاء الله لو اجتهدت علي نفسك حبتين ..

تاني حاجة عندك علي حسب تنسيق السنه اللي فاتت لازم تكون جايب اعلي من 48 فى الانجليزي والاولوية بالاعلي ف المجموع الكلي..

اخر حاجة هي ان الكورسات هيبقي ملكش غيرها مع الدراسه اه اومال.. تشوفلك كام كورس حلوين يساعدوك عشان تبقي لِبلِب كده ف الانجليزي زي الاجانب واحسن وبكده هتلاقي فرص شغل اضمن والمجال ليك واسع ويا سلام لو بره مصر بقي وتنطلق.. ابقي ابعتلنا جوابات بقي ها ؟

طيب نيجي للشغل خريج اداب انجليزى ممكن يشتغل مترجم.. تدريس لو ليك فيها ده غير ان مترجم دي ليها كذه حاجة اصلا.. ممكن مترجم ف مؤسسات صحفيه واعلاميه ودي مفيش اكتر منها ف مصر.. الشركات اللي تعاملها مع اجانب هتحتاجك..

السفر لبلد اجنبيه هيبقي سهل عشان معاك اللغه وتقدر تلاقي منحه كويسه ان شاء الله لو دورت كويس ..

الدراسه في قسم انجليزي لغويه وادبيه... يعني ايه؟

اللغوية يعني الاهتمام بالقواعد و صوتيات

الأدبية بيهتم بكل جوانب الأدب من شعر و قصة و دراما و أدب عالمي مقارن و أدب أمريكي .. شوفت ؟ اهو عشان كده بقولك ادخله احسن عن حُب..

نيجي لباقي أقسام اللغات ودي ليها أكتر من مجال:

- تقدر بعد التخرج تشتغل مدرس في أي مادة فيهم حسب قسمك لو عايز تدرِّس..

- التعيين في أغلب الأحيان بيحتاج دبلومة تربوي بعد الكلية لو حكومي، لكن لو خاص مش شرط.

- ممكن تتشغل في الترجمة، أو الترجمة الصحفية، أو الارشاد بعد دبلومة.

- تقدر تحترف تدريس اللغات للخريجين في مراكز الكورسات وده شغل كويس جداً..

قسم علم النفس:

- تقدر تختار مجال شغلك كلينيكال وتشتغل في مستشفيات ومراكز.. سيبك اننا حاليا محتاجين ناس متخصصه علم نفس عشان تعالج الدكاتره النفسيين نفسهم مش الشعب لأ..

المهم تقدر تكمل دراستك في تخصص انت حابه بره مصر، وممكن تبدأ تقرأ وتسأل فين من اول سنة كلية، عشان علم النفس عموماً تخصصاته وشغله بره أكتر وأحسن ومتقدر كتير عن مصر، وساعتها تقدر تكون معالج نفسي هناك برضو بس مجالك أكتر تخصصاً عن هنا. لأنك هتتخصص في مجال واحد من علم النفس.

- تقدر تكمل دراسة زي طِب وتشتغل على نفسك وتجتهد وتعمل برّه مصر أو جواها master في counseling psychology، وتكون محلل واستشاري نفسي..

مجالات علم النفس محتاجة صبر عشان توصل، ومحتاجة إنك تجتهد من أول سنة في الكلية ومتكتفيس بدراستك في الكلية، تحاول تقرأ معلومات عامة وتزوّد من معرفتك بالمجال ده..

- قسم زي آثار بيشتغل في الارشاد وشغل سياحة يعني..

- قسم جغرافيا بقي بص...اكتر قسم في اداب بيقي فيه عملي شويه .. الدراسة فيه بتبقي علي مجموعات من المواد اللي بتخدم تخصص علم الجغرافيا زي مجموعة الجغرافيا الطبيعية ومجموعة الجغرافيا البشرية و المواد البيئية و مجموعة المواد التطبيقية والخرايط والمساحة .

ومجالات الشغل كويسه.. عندك بقي..

ادارت التخطيط في المحافظات

شركات التعدين والمقاولات العامة

هيئات الموارد المائية والبيئية

مصلحة الارصاد الجوية

هيئات النقل والمواصلات

الجهاز المركزي للتعبئة العامة والاحصا

والتدريس طبعا..

حلو الكلام ؟ عميق جدا

وبالنسبه لقسم اعلام ف هو مش محتاج شرح حاجة كده غني عن التعريف.. هو في آداب ف نقدر نقول كويس وخصوصا اداب عين شمس اكتر من حلوان وفي كلام انه هيبقي قسم لوحده زي اعلام قاهره كده.. بتتخصص ف تالت سنه صحافه او اذاعه وتلفزيون او علاقات عامه.. مفيش فرق كبير بيين قسم اعلام واعلام القاهره وبيحاولوا يحسنوا مستواه.. ويقدر خريجه ياخد كورسات ويجتهد ويشتغل في الصحافة والاعلام عموماً..

ممكن خريج أي قسم يشتغل في أي مجال بعد الكلية حتى لو بره القسم والتخصص الي درس فيه، لكن دراسته مثلاً لو لغة، هتفيده في الشغل وفرص السفراكتر بكتير جداً من لما يكون درس في قسم تاني

وحط قدامك دايما انك لو مشتغلتش على نفسك كويس في سنين الكلية واخدت كورسات وتطورت من نفسك في مجالك.. هتندم كتير بعد ما تتخرج وتلقي نفسك مطلعتش غير بشويه كلام نظري

باقي أقسام الكلية كتيرة، وكذلك مجالات شغلها احنا حصرنا بس المجالات المنتشرة والمعروفة ما بيننا، لكن اللي يدوّر هيلاقي أكتر من كده .. ده غيرالثقافة العامة اللي هتفيدك في حياتك من الكلية ودراستها.

اخر كلامي ليك يا دفعه 2018 المميزه.. اختار مستقبلك وحاول توزن بين دراستك وشغلك وتطوعك بحيث يكون نفس المجال والتخصص عشان تنجح في حياتك اللي بتبتدي دلوقتي..

ربنا يوفقكو ويحققلكو امانيكو ويكتبلكوا الخير

منشن وشير لصحابك اللى داخلين اداب :wink::sunglasses:

ايامكوا الي جايه كلها حلوة ان شاء الله

٢٠

كلية_آثار

نجيبة متولى الخولى طلعت الأولى على الثانوية العامة وجابت 101% بس :smiley:

وبعدين قررت تدخل كلية آثار .. لكن ليه ؟!

اصلها مكنتش تعرف حاجه عن الكليات

وكانت داخلاها لمجرد ان مجموعها جايبها وخلاص .

لكن احنا دلوقت مش هنبقي زي نجيبة وهنعرف شوية عن الكلية علشان لما تيجى تدخلها تكون عارف انت داخلها ليه :slight_smile:

كلية آثار من الكليات اللى بتقدر تدخلها من علمى علوم ورياضة وأدبى لكن كل شعبة بيكون ليها حد أدنى مختلف

الكلية موجودة في 3 جامعات بس في مصر

جامعة القاهرة ، جامعة الفيوم ، جامعة جنوب الوادى في قنا

الكلية بتتكون من 4 أقسام

أول قسم هو قسم الآثار المصرية.

تانى قسم الآثار الاسلامية.

ثالث قسم ترميم الآثار.

رابع قسم هو قسم يونانى .

كل قسم في دول ليه شروط مختلفة عشان تدخله وهنتكلم عنها دلوقتي

اول قسم الي هوقسم الآثار الاسلامية وده قسم لطيف جدا وقنوع ومالوش شروط غير ان مجموعك يكون جايب الكلية وبالتالى جاتلك فى التنسيق وكدة خلصت خلاص .

بالنسبة لقسم الآثار المصرية فغير ان تنسيقك يكون جايب الكلية ، كمان بيكون مطلوب درجتك فى الانجليزى فى الثانوية العامة والسنة اللى فاتت كان واخده أكتر من 47.5

وطبعا دى بتختلف من سنة لسنة كالعادة حسب متوسط الدرجات لكن مفيش شروط تانية أكتر من كدة.

أما بالنسبة للقسم اليونانى فهو يعتبر نفس الشروط لقسم آثار مصرية لكن درجة الانجليزى المطلوبة بتكون أقل بدرجة أو اتنين

القسم الأخير وهو قسم ترميم الآثار وفيه شوية تفاصيل كدة هنتكلم عنها

فاولا علشان تدخل القسم ده لازم تعمل اختبار قدرات

والاختبار ده بيتعمل في أول شهر في سنة أولى

وبتكون الأولوية للي بيتقبلوا فيه لعلمى علشان جواه هتلاقي دراسته محتاجه تكون درست كيميا ورياضة قبل كدة .

والقسم متقسم لتلت حاجات .. معماري وعضوي وغير عضوي وكل واحد ليه اختباراته

طيب معمارى ومفهومة شوية

بس ايه عضوى وغير عضوي دى ؟

عضوي ديه ماده انت بتدرس فيها ازاى تتعامل مع الآثار المصنوعة من مواد عضوية زى الخشب مثلا وايه اللى بيأثر عليها وايه اللى ممكن يخليها تبوظ وهكذا

غير عضوى نفس الكلام لكن الفرق ان الآثار دى بتكون مصنوعة من مواد غير عضوية زي الفخار والطين .

طيب بعمل ايه علشان أقدر أدخل اختبار القدرات ده ؟

علشان تعمل الإختبار بتروح تدفع رسوم لخزنة الكلية وبعدين تروح شئون الطلبة تسجل اسمك علشان الإختبار

طيب الإختبار ده عبارة عن إيه ؟ّ

فمبدأيا كده خلينا نتفق ان الي هنتكلم عنه ده الشكل العام للاختبار .. لكن فيه تفاصيل صغيرة بتختلف على حسب التخصص اللى هتدخله جوة ترميم .. وكمان على حسب الجامعة الي انت فيها

فالاختبار ببساطة بيتكون من 3 أجزء

أول جزء بيبقي اختبار رسم بالظل والنور وده بترسم فيه نموذج لأثر معين بالظل والنور

طيب علشان أعدى الاختبار لازم أكون برنس رسم وكدة ؟!

لا خالص ..

وكمان بيكون فيه كورسات في الكلية بتساعدك على انك تتعلم ده والفكرة كلها بس ان يكون عندك احساس بالأبعاد كويس بس مش أكتر.

تانى جزء بيكون امتحان نظرى في مادة مبادىء الترميم ودى من المواد اللى هتدرسها فى الترم الأول في سنة اولى.

تالت جزء فبيكون امتحان شفوي بيعملوا القسم ..حاجة شبه الانترفيو كدة.. الدكتور بيعرف منها انت ليه حابب تخش القسم ده وشغفك .. وبيسأل فيه كام سؤال نظرى من مادة الترميم اللى قولنا عليها فوق.

ومع ده كله بيعملك اختبار طبى بيسموه اختبار "عمى ألوان" علشان يشوف هتقدر تكمل في الدراسة ولا لا

بالنسبة لطبيعة الدراسة بقى في الكلية فهى مختلفة شوية عن الكليات التانية ..والدراسة لذيذة بشكل عام للى حابب المجال .. لكن محتاجة مذاكرة .. ففكرة ان الكلية مذاكرتها قليلة ورحلاتها كتيرة دى افتكاسة لازم تشيلها من دماغك .. ولازم تذاكر كويس .

مبدأيا أول سنة بتبقى عامة مفيهاش تخصص

تانى سنة بتبدأ تتخصص في قسم من ال4 اللى اتكلمنا عنهم فوق

وجنب المواد اللى بتاخدها .. بيكون عندك أكتر من رحلة علمية وميدانية ..

أيوووة الفسحة عندك مذاكرة

هى كلية الأثار كدة مذاكرتها كتيرة وفسحها كتير برده :smiley:

وبيبقى لازم عليك تحضرالرحلات دية وليها غياب وكدة

فى الترم الأول في سنة أولى

بتنزل 6 زيارات بتروح فيها آثار اسلامية وقبطية زى منطقة الصليبة ، ومنطقة الأزهر والسلطان حسن وهكذا

الترم التانى بتنزل المتحف المصرى والأهرامات و سقارة

وزى ما قولنا الزيارات دى لكل الطلبة بما ان سنة أولى مفيهاش تخصص

بعد كدة لو دخلت قسم آثار مصرية فانت بتنزل رحلات كتير برة القاهرة وبتكون مدعمة من الكلية الي حد كبير فى نفس الوقت يعتبر أصعب قسم فى الكلية وبتدرس فيه حضارة مصرية قديمة .

وبتروح خلال ال3 سنين المنيا ، دهشور، الأقصر وأسوان ، والواحات البحرية ، واسكندرية ، وميت رهينة

وبيبقى معاك في الرحلات ديه دكاترة من الكلية

الرحلات دى مش بتكون اجبارى انك تروحها.. وملهاش غياب.. عكس رحلات سنة أولى لكن حضورك ليها بيفيدك بشكل كبير في الدراسة.

بالنسبة لقسم الآثار الإسلامية فخلال ال3 سنين دراسة يعتبر أسهل قسم فى الكلية لكن فيه تفاصيل كتيرة وحفظ كتير نسبيا أما بالنسبة للرحلات فبتروح

اسكندرية ، ورشيد ، والأقصر وأسوان

ونفس الكلام مفيش غياب على الحضور

وزيهم قسم ترميم الأثار لكن الرحلات فيه بتختلف وبتروح اسكندرية ورشيد والأقصر وأسوان .

وبالنسبة للقسم الي مجباش سيرته كتير .. عشان لسه قسم جديد وفاتح من سنتين بس.. وهو قسم اليونانى .. وده انت بتدرس فيه لغات زى اللاتينى مثلا .. واطمن فيه رحلات بردو .. ومعظمها بيكون فى اسكندرية علشان الآثار الرومانية هناك

طيب بالنسبة للشغل ..بتاع أثار ده بيعمل ايه ؟!

انت كخريج كلية أثار من قسم آثار مصرية أو آثار اسلامية بيبقى ليك وظيفتين بشكل أساسي

أول حاجة انك بتشتغل مفتش آثار في المتاحف والمناطق الأثرية وكده

تانى حاجة انك بتعمل دبلومة إرشاد سياحى من كلية سياحة وفنادق ووقتها تقدر تبقى مرشد سياحى

أما الي بيتخرج من قسم ترميم الأثار

فبتشتغل أخصائي ترميم فى المتاحف أو فى المواقع الأثرية

أو بتشتغل فى شركات المقاولات المتخصصة فى ترميم الآثار وكده

عموما

كلية آثار من الكليات اللطيفة جدا واللى الناس للأسف مش بتهتم بيها بشكل كبير ومتسمعش عنها

ففكروا فيها لو حابين المجال

آخرحاجة

الكلية ممكن تتدخلها لو انت متخرج من مدرسة ترميم او لو كنت واخد دبلومة منها .. ودة بالنسبة لمدرسة الترميم الي في مدينة نصر بس

وكمان الي متخرجين من معهد ترميم الأثار وده بيكون فى الأقصر

كده تقريبا خلصنا كل حاجة ..

ايامكوا الي جايه كلها حلوة ان شاء الله

كلية_الحقوق

من زمان واحنا بنذاكر التاريخ لما كانت بتيجى سيرة أى شخصية من الناس العظيمة دى.. زى سعد زغلول ومصطفى كامل كانت أول جملة بنسمعها

وتخّرج من كلية الحقوق أو حصل على الليسانس فى الحقوق

كلية البشوات والوزراء زمان

احنا بقى انهاردة هندخل كلية الحقوق ونقولك هتتخرج منها ازاى وهتشتغل ايه :smiley:

كلية الحقوق من الكليات اللى بتقدر تدخلها من

علمى علوم

وعلمي رياضه

وأدبى

والكليه طبعا فيها انتظام وانتساب

طيب ..ايه الفرق بين انتظام وانتساب ؟

ببساطة كدة ، انتظام مجموعها أعلى ومصاريفها أقل ، لكن انتساب مجموعها أقل ومصاريفها أعلى

* قبل ما نكمل كلامنا عن الكلية ، لو مبتحبش القراية تقدر تسمع الحلقة اللى موجوده فى اول كومنت وموجود فيها نفس الكلام عن كلية حقوق ، أو ممكن تكمل قراية البوست العادى *

نتكلم بقى عن لغات الدراسة في الكلية وهي 3 لغات

حقوق عربى

وحقوق انجليزى

وحقوق فرنساوى

طيب ايه شروط كل شعبة من دول ؟

حقوق عربى ملهاش شروط خالص غير ان كلية الحقوق تكون جيالك فى التنسيق سواء كانت انتظام أو انتساب

اما حقوق انجليزى ف شروطها انك تكون جايب 80% من درجة الانجليزى

ويكون مجموعك يجيب حقوق انتظام ..يعني مينفعش انتساب ؟ لا مينفعش انتساب للاسف

وشعبة انجليزي بتكون بمصروفات

طيب ..بالنسبة لشعبة فرنساوى ؟

شعبة فرنساوى دى حكاية لوحدها

أولا شروطها فى بعض جامعات انك تكون خريج مدارس لغات فرنساوى

وتكون جايب مجموع حقوق انتظام ، وكمان تعدى من امتحان معين بيتعمل فى المركز الثقافى الفرنسى

طيب ليه كل الشروط دى ؟

لو هنتكلم عن حقوق القاهرة شعبة فرنساوي فانت بتتخرج منها معاك ليسانس حقوق من جامعة القاهرة وكمان من جامعة السوربون فى فرنسا

وطول سنين الدراسة بيكون ليك ID من جامعة القاهرة وID من جامعة السوربون ومتاح ليك

وانت بتدرس او بعد الدراسة انك تسافر تكمل دبلومة فى فرنسا .

أما بالنسبة للمصروفات الخاصة بالقسم فبتدفع جزء منها لجامعة القاهرة وجزء منها لجامعة الصوربون بردو .

نتكلم بقى عن اقسام الكلية ..

كلية حقوق بتتقسم لـ7 أقسام

قسم القانون المدنى

قسم القانون الخاص

قسم القانون العام

قسم القانون الدولى العام

قسم الشريعة

قسم القانون الجنائى

قسم القانون التجارى

وكل قسم له مواد معينة ، أكيد يعني D:

بس الجديد بقى انك بتاخد مواد من كل الأقسام دى ومبتتخصصش فيها

إلا لو حابب تعمل دبلومة فى حاجة معينة بعد التخرج فبتختار موضوع معين فى قسم معين تعمل فيه الدبلومة

نيجي بقى لنظام الدراسة ..

الدراسة فى حقوق دراسة نظرية بحتة

مفيش أعمال سنة ، مفيش غياب وحضور ، مفيش ميد ترم .

لكن فيه بعض الدكاترة بياخدو غياب و كل دكتور وليه أسلوبه .

كمان في بعض الجامعات بيكون فيه أعمال سنة على بحث أو حاجة شبه كدة بس بتكون درجات بسيطة جدا لكن النسبة الكبيرة بتبقى على امتحان الفاينال.

المادة عموما بتكون من 20 ولو فيه أعمال سنة بتكون 3 درجات تقريبا أو 4

والامتحانات بتكون نظرية ، مفيش امتحانات شفوية خالص خلال سنين الكلية .

طيب احنا بندرس ايه بقى فى الكلية ؟

بتدرسوا فى الكلية مواد قانونية وشريعة اسلامية

واقتصاد بتعمق غير انك بتدرس تاريخ القانون ، وفلسفة القانون واجرام وقانون دولي وغيرها .

وعلى طول سنه اولى بتبقى اسهل سنه ف اللي بيدور على تقدير يركز من سنه اولى ويهتم بالحضور

وبتقعد الـ 4 سنين تاخد مواد من كل قسم وبعدين تتخرج معاك ليسانس حقوق

طيب وتفرق ايه دراسة انجليزى عن عربى ؟

فرق حقوق عربى عن حقوق انجليزى مش كبير

لأن قسم عربى بياخد نفس مواد قسم انجليزى وبالمناسبة قسم انجليزى بياخد المواد بالعربى بردو

لكن الفرق الوحيد انه بيزيد مادتين متعلقين بالقانون الأمريكى ودول بس اللى بيدرسهم بالانجليزى .

أما بالنسبة لحقوق فرنساوى فهما بياخدو حوالى 6 مواد زيادة عن قسم عربى متعلقين بالنظام الدستورى الفرنسي .

طيب ايه أحسن ؟ أدخل حقوق عربى ولا حقوق انجليزى ؟

هو مفيش حاجة أحسن وحاجة أوحش .. كل قسم بيبقى ليه أولوية فى مكان معين

يعنى ايه ؟

بالنسبة للشغل فى البنوك والشركات متعددة الجنسيات فالأولوية بتكون لخريجين حقوق انجليزى ودى تعتبر ميزة أقسام اللغات عن العربى .

لكن فيه أماكن شغل تانية بتفضل خريجين حقوق عربي

فكل واحد بيشوف هو مناسب ليه ايه أكتر وطموحه فين وعلى الأساس ده يكمل ويدخل عربى أو انجليزى أو فرنساوى .

السؤال المهم بقى بالنسبه ليكم دلوقتي ..أنا أما أتخرج هشتغل ايه ؟ وفرص الشغل متاحة ولا لا ؟

اه فرص الشغل متاحة بشكل كبير ومختلفة

أكتر شغل بنسمع عنه لخريجين حقوق هو المحاماة ..لأنه الشغل الأشهر ليهم ومحدش غيرهم بيشتغله .

بس المحاماة موضوعها مش سهل كدة بردو ..يعنى مش هتتخرج تشتغل محامى على طول

ليه طيب ؟

لأن مؤخرا بقى شرط علشان تبقى محامى وتاخد تصريح مزاولة المهنة ..

استني كدة ... يعنى ايه مزاولة المهنة دى ؟

مزاولة المهنه يعنى تروح المحكمة وتترافع والناس توكلك تدافع عنهم ده اسمه مزاولة المهنة

نرجع لكلامنا ..علشان تقدر تزاول المهنة :smiley: لازم تاخد دبلومة سنة بعد الكلية و كمان تتدرب لمدة 3 سنين من تاريخ حلف اليمين

طيب ممكن أشتغل في ايه تانى غير المحاماة والمحاكم ؟

ممكن تشتغل فى الضرايب ، وفى الشركات و في البنوك

كل الأماكن دى بتحتاج خريجين حقوق

غير انك ممكن تشتغل فى الشئون القانونية فى القطاع الخاص

ووزارة الخارجية

وبالمناسبة منظمات دولية كتير بتقدم كل سنة طلب لخريجين حقوق علشان الشغل

ده طبعا غير النيابة ومجلس الدولة وهيئة قضايا الدولة

وهنا في ملحوظة مهمه للبنات وهي ان النيابة العامة مبتشغلش بنات .. لكن النيابة الادارية بتسمح ان البنات تشتغل فيها عادى

وبالنسبة لشغل النيابة لو حد مهتم بيه فلازم تكون جايب تقدير عام جيد فى الـ 4 سنين دراسة فذاكروا من الأول وكدة :slight_smile:

وكده يكون اتكلمنا خلاص عن كلية الحقوق بنتمنى لكم التوفيق يا باشوات

لو شايف ان البوست مفيد اعمل منشن وشير لصحابك اللى داخلين حقوق :wink::sunglasses:

ايامكوا الي جايه كلها حلوة ان شاء الله

كلية دار العلوم :cherry_blossom::purple_heart:

دار العلوم ليست مكاناً نتعلم فيه إنها كيان يعيش فينا :heartbeat:

طبعاً الكل فاهم إن دار العلوم دي زي علوم بندرس فيها كيمياء وفيزياء وأحياء :joy:

مهمتنا في البوست ده نفهم معظم الناس اللي متعرفش عن دار العلوم وعن مجالاتها واي اللي الطلبة بيدرسوه داخل الكلية دي ؟!

أول حاجة كلية دار العلوم بتاخد من علمي وأدبي ...

- كلية دار العلوم كانت من قبل تُسمى مدرسة دار العلوم يرجع تاريخ إنشائها إلى عام ١٨٧٢ وقد تطورت دار العلوم إلى أن أصبحت إحدى المدارس العالية وظلت كذلك إلى أن بُنيت جامعة القاهرة وأصبحت دار العلوم من ضمن كليات جامعة القاهرة :purple_heart:

طيب ! اي هيا أقسام الكلية دي ؟!

١- قسم النحو والصرف والعروض

٢- قسم الدراسات الأدبية

٣- قسم البلاغة والنقد الأدبي والأدب المقارن

٤- قسم علم اللغة والدراسات السامية والشرقية

٥- قسم الشريعة الإسلامية

٦- قسم الفلسفة (العقيدة ) الإسلامية

٧- قسم التاريخ الإسلامي والحضارة الإسلامية

طالب دار العلوم مش ببختار قسم واحد من الأقسام دي

لأ خالص ! طالب دار العلوم بيدرس كل الأقسام دي على مدار الأربع سنين :relieved::smiley:

طب اي هيا مجالات الشغل بقى ؟!:relieved:

١- صحافة وإذاعة

٢- تصحيح لغوي

٣- تصحيح وتحقيق كتب ومخططات

٤- التدريس

٥- الترجمة (عبري وفارسي ) هتدرسهم في الكلية

طب إي اللي يفرق طالب دار العلوم عن طالب كلية آداب أو تربية ؟!

طالب دار العلوم مش بيدرس قسم واحد ويتخصص فيه لأ دار العلوم يستطيع التخصص في مجال اللغة العربية والتاريخ والفلسفة والشريعة في الأزهر

طبعاً الكل بيقول الكلية صعبة وكله بيسقط فيها لأ محصلش خالص

الكلية مش سهلة الكلية محتاجة شخص يذاكر ويكون مثقف وبيقرأ كويس وهتلاقي نفسك ليك مكانة عظيمة جدا :relieved:

آخر حاجة هقولها :- بجد لما تدخلوا الكلية هتحسوا فيها بالامان جدا هتحس انها بيتك ومش هتبقى عاوز تخرج منها وهتبقى زعلان جدا لما تتخرج لأنك هتسيب الكلية والناس الحلوة الي عشت معاهم سنين في الكلية :relieved::purple_heart::purple_heart::purple_heart::purple_heart:

١٦ تعليقًا

كلية_رياض_أطفال

كلية النهاردة ليها علاقة بـأحباب الله :innocent::joy:

بس اختلفت مسميات الكلية دي وتخصصاتها من جامعة لجامعة :shrug:‍�

ما بين رياض أطفال وطفولة مبكرة وتربية طفولة.

:warning:طب إيه سبب الخلاف ؟

إن زمان كان في كلية رياض الأطفال لوحدها، وكان في كلية طفولة لوحدها، من حوالي 3 سنين بدأت بعض الجامعات تغير ف السيستم دا وجمعتهم ف كلية واحدة، ودا بقي الموجود ف معظم الجامعات دلوقتي، بقت كلية تربوية مستقلة واسمها كلية ... #تربية_طفولة_مبكرة ..

فيلا بيننا نعرف عنها أكتر :walking:‍�

أولا الكلية موجودة ف 11جامعة حكومية وهم: جامعة المنيا، جامعة الفيوم، جامعة الإسكندرية، جامعة الإسكندرية فرع مطروح، جامعة أسيوط، جامعة بني سويف، جامعة المنصورة، جامعة بورسعيد، جامعة دمنهور، جامعة الزقازيق ، جامعة السويس ، جامعة القاهرة.

:warning:بنات بس.

وإنتي بتقدمي للكلية بيكون في اختبار شخصية بسيط جدا، وبيكون في ورقة تملي فيها رغباتك للاقسام، ف أنتي بتتخصصي من أول سنة.

:round_pushpin:الكلية فيها 4 أقسام وهم:

:one: رياض أطفال:

-من سن 4 لـ 6 سنين ( من الkg للمدرسة).

-بتدرسي فيها معلومات عن الأطفال عامة (لكن التركيز كله ع السن دا).

:two: رياض أطفال English:

-هي رياض أطفال بس الدراسة English.

-شغلك أكتر في المدارس اللغات.

-تكوني درجتك ف الEnglish كويسة.

-بتكون بمصروفات زيادة.

:three: حضانة:

-السن الل قبل 4 سنين

-الدراسة عن كل حاجة تخص السن دا.

:four: تربية خاصة:

-الدراسة عن ذوي احتياجات والتربية الخاصة.

-السن مش مهم هنا لأن هتتعاملي مع إعاقة عقلية أو توحد (يعني ممكن الدراسة تكون ل15 سنة عادي الموضوع بيتقسم هنا ليفلز مش سن).

:round_pushpin:المواد:

:arrow_left: مواد سايكولوجي(نفسية): وبتدرسي فيها تخصصات ف علم النفس زي علم نفس النمو مثلا، وكمان نظريات علم النفس وملاحظة الطفل ونفسيته وتحركاته وكدا، وكمان بتتعلم طريقة تعديل جوانب السلوك للطفل، وطرق تنمية قدراته ومهاراته.

:arrow_left: مواد تربوية: بيكون فيها استراتيجيات تربوية، وأصول تربية الطفل، التربية ونظرياتها، التعليم والتكنولوجيا، إزاي المنهج بيتعمل ونعمل اختبارات لهم وهكذا.

:arrow_left: مواد عامة بتاخدي فيها أساسيات زي العلوم والعربي(بيكون خاص بحتة اللغات، وازاي نعلم او نتعلم لغة مثلا) والرياضة والانجلش(خاص أكتر بالترجمة)

:arrow_left: مواد تانية زي الفن والموسيقى و الرياضة وهيبقى عندك سيكشن جيم:runner_tone1:‍� وفيها عزف ع الاورج وغُنى

وتعملوا لعب ولوح ووسايل وكتب وقصص بأنواعها وبرامج ع اللاب وتصوير ومسرحيات والمسرح نفسه حتى :joy::broken_heart:

ومجسمات كبيرة أكبر منك أساسا :joy:

:round_pushpin:قسم التربية الخاصة:

ده بيبقى فيه مواد زيادة عن بقية الأقسام شوية

وبتدرس فيه الطفل العادي وطفل ذوي إحتياجات في نفس المادة ونفس الكتاب عادي.

بتعرفي فيه فئات ذوي احتياجات، تعليمهم، المشاكل الل بيقابلوها، تعملي مناهج واختبارات ليهم وهكذا.

وكمان تربية خاصة بيكون فيها تخصص تاني من سنة 3 كلية.

:warning:نقطة مهمة ف الكلية إنها بتحب المرمطة شويتين:speak_no_evil:، ف عادي جدا تبقي ماشية كل يوم الصبح بماكيتات ومجسمات ومشاريع وشغل اد كدا وتخلي بالك منها أكتر من نفسك ليتكسر :face_palm:‍�

:warning:كمان هي من الكليات المكلفة، والعملي بتاعها كتير. ف بتحتاج فلوس ف الخامات ال بتشتريها وطاقة ف تنفيذ المشاريع بتاعتها.

:warning:الامتحانات بتفرق من جامعة لجامعة، لكن غالبا بتبقى كويسة.

:round_pushpin:المذاكرة:

عادي جدا إنك تذاكري المادة قبل الامتحان باسبوع مثلا، وتفهمي الكلام وتحلي بفهمك، مش لازم تحفظي خالص.

لكن الكتب في كتير منها كويس جدا كثقافة ف التربية ليك أنتي، وهيفرق معاك لو استوعبتيه كويس.

:round_pushpin:التربية العملي:

-بتكون ف سنة 3و 4.

- عبارة عن يوم ف الأسبوع، بتنزلي فيه مدرسة بتكوني مسئولة عن اليوم ومعاك المديرة والمعيدة بتتابعك، وممكن الدكتور مرة أو اتنين، وبعدين بتتقيمي ف آخر السنة.

:warning:الكلية مش بتكون بنفس التفاصيل ف كل الجامعات، لانها بتفرق ع حسب قدرة وميزانية كل جامعة ف توفير المساحة والاقسام والدكاترة وهكذا، ف مهم جدا إنك تدخلي ع الويب سايت بتاع الجامعة وتشوفي الأقسام أو ظروف الدراسة ف الجامعة ال انتي تابعة ليها.

:warning:بردو المساحة ممكن متبقاش كويسة ف بعض الجامعات ف مش هيكون متوفر قاعات أو اماكن كتيير ليكم.

:round_pushpin: الشغل غالبا بيكون ف حضانات او مدارس (خاصة او حكومي)، وبيختلف المرتب من مكان لمكان، لكن الكلية بتعلمك مهارات كتييير جدا ممكن تفتح لك أبواب مختلفة كتيير تقدري تشتغلي فيها.

ف المهم تكوني حباها وحابة الفكرة وشغلها عشان تقدري تفتحي لنفسك فيها ابواب شغل، وكمان تستحملي مرمطتها :innocent::speak_no_evil:

:arrow_left: مجالات شغل (قسم تربية خاصة) بتكون مفتوحة شوية زيادة، مش مقتصرة ع الحضانة او المدرسة بس.

لكن ممكن ف مراكز ذوي الاحتياجات الخاصة، او الرعاية الخاصة ليهم وهكذا.

وبس كدا :grin:

دي كل المعلومات ال هتفيدكم عشان تقرروا إذا كانت الكلية مناسبة ليك ولميولك ولا لأ.

الكليات_العسكرية

الكليات العسكرية بيبقى ليها شروط صارمة في القبول فمن اهم شروط الالتحاق بيها هو ان الطالب يكون مصري ابا عن جدا عن عائلة مصرية بالكامل، و في نفس الوقت ميكونش هو او حد من عيلته مقدمين على جنسية بلد تانية و انه يكون طالب ثانوية عامة شهادته معداش عليها سنة او بالفعل ملتحق بكلية و لكن ناجح في السنة الدراسية اللي لسا طالع منها. و لكن الشروط مش بتقتصر على كدا و بس بالعكس شروط الالتحاق كتيرة جدا و مهمة جدا تقدر تقرى عنها اكتر.

و الميزة في الكليات العسكرية ان ليها تخصصات كتيرة جدا زي الحربية و البحرية و الجوية و الدفاع الجوي و الطب العسكري و الفنية العسكرية و غيرها كتير. دا غير ان معظم التخصصات دي بتقبل من الجنسين فبتدي الطالب حرية الاختيار ما بين اكثر من مجال.

بعد ما بيقدم الطالب عشان يلتحق بواحدة من الكليات العسكرية بيتعمله كذا اختبار زي الكشف الطبي و اختبار سمات الشخصية و كشف الهيئة و اختبار الثقة و السباحة و اللياقة البدنية.

و لازم ينجح في جميع الاختبارات دي مش ينجح في واحد و التاني لا او حتى لو نجح فيهم كلهم و مثلا طوله مش مناسب بردو مش هيدخل. حاجة تغيظ صح؟ :smiley:

و لكن على اد ما الطالب العسكري بيتعب في الكلية الا انه بيتمتع بمزايا عديدة منها التكفل بجميع مصاريفه من اقامة و ملبس وغذاء دا غير الرعاية الاجتماعية و المميزات العسكرية اللي بيتمتع بيها بعد التخرج و اثناء العمل و حتى بعض الطلوع على المعاش.

و على اختلاف الكليات العسكرية الا ان كل واحدة فيهم ليها شروط خاصة بيها للالتحاق.

فمثلا الحربية لازم عمره ما يزيدش عن 21 سنة و بيدرس 4 سنين و بامكانه ان يكمل ماجيستيرو دكتوراة و بتعتبر المعقولة في التنسيق من ضمن المجموعة العسكرية كلها و دا لانها بتاخد من 70% بس و من الشعبتين الادبي و العلمي وكمان الأزهر والشهادات المعادلة

اما الجوية فلازم و لابد انه يكون مصري الجنسية و مصري الابوين و الاجداد و غير متزوج او حتى بيفكر في الزواج (بيأمنوه بدري بدري xD) و انه يتمتع بحسن السير و السلوك و حاصل على شهادة الثانوية العامة من شعبتيها الادبي و العلمي والأزهر والشهادات المعادلة

نروح للفنية العسكرية

ديه لعلمى رياضة بس وللأزهر والشهادات المعادلة قسم العلمى وإنه يكون جايب فى الرياضة والفيزياء من 70% فأكثر وبتاخد من حوالى 92 % وفيها أقسام زى ميكانيكا وكهربا وعمارة ومدنى وكيميا وممكن يكمل عادى دراسات عليا فى كليات الهندسة

الدفاع الجوى بقى

لازم اللى يدخلها يكون علمى رياضة أو علمى فى الأزهر والشهادات المعادلة وجايب 85% و 70% من درجات الرياضة و 70% من درجات الفيزياء

اما عن الطب العسكري فلازم يكون الطالب من شعبة علمي علوم بمجموع 95 % فاكتر. و بيحصل الطالب على درجة البكالريوس في الطب و الجراحة دا غير ان مسموحله يكمل الماجيستير و الدكتوراة في الجامعات المصرية.

المعهد الفنى للقوات المسلحة

لازم الطالب يكون ثانوية عامة أو أزهرية علمى, ومعاها شهادة الثانوية الصناعية نظام 5 أو 3 سنوات, أو التعليم المزدوج التابع لوزاة الانتاج الحربى, أو معهد الدون بسكو بس يكون تخصص كهرباء وميكانيكا بس

والمجموع يكون 65% للثانوية العامة و 75 % للثانوية الصناعية ومدة الدراسة حوالى سنتين

كلية البحرية

لازم الطالب يكون ثانوية عامة علمى وبيقبل كمان الثانوية الأزهرية والشهادات المعادلة من القسم العلمى وشرط مهم يكون بيجيد السباحة كويس جدا

مدة الدراسة 4 سنين

المعهد الفنى للتمريض

بيقبل من علمى بشرط دراسة الأحياء والفيزياء والكيمياء والمعهد سنتين

فرصة التقديم في الكليات العسكرية فرصة هايلة و ممكن تحسن حياتك و دراستك للاحسن

اخيرا نحب نقولكم ان اخر معاد للتقديم فى الكليات الحربية هو منتصف شهر 8 اللى جاى

كلية_سياحه_وفنادق

عارفين انتو الناس بتوع الاتيكيت الي بنشوفهم في الفنادق وشركات الطيران والسياحه .. او الناس الي بيقوا طالعين معانا في الرحلات وبنقول عليهم مرشدين سياحين

ايوووه هما دول كلهم الي بيطلعوا من كلية سياحة وفنادق

اولا كده كلية سياحة وفنادق الدراسة فيها 4 سنين وموجودة في مصر في 8 جامعات زي:

1. جامعة المنصورة.

2. و إسكندرية.

3. وحلوان.

4. والمنيا.

5. و الفيوم.

6. وجامعة قناة السويس فرع الإسماعيلية.

7. وجامعة المنوفية (في مدينة السادات).

8. وجامعة جنوب الوادى فرع الأقصر.

والكليه ممكن تدخلها من علمي او ادبي .. وتنسيقها بيبقي في حدود مثلا 76% ل 61 % .. والوضع ده اكيد بيتغير من سنة لتانيه حسب التنسيق والمجموع عموما بس ممكن نقول ان ده المتوسط

وعلشان تدخل كلية سياحة وفنادق لازم غير انك تكون جايب مجموعها فلازم كمان تكون جايب 70% كحد أدني في مادة انجليزي في ثانوية عامة .. يعني تكون جايب في حدود من 35 ل 50

بعد كدا بتسحب ورق التقديم وبتروح تقدم في الكلية

وبعد ما تقدم ورقك خلاص في الكلية وكل الحاجات ديه .. بيتعمل ليك انترفيو مع دكتور من دكاترة الكلية .. والإنترفيو دا غالباً بيتقسم لـ3 حاجات بتتقيم على اساسهم وهما:

1. Introduce Yourself :

وهنا هيكون مطلوب منك تقدم نفسك بالانجليزي، يعني اسمك وسنك وساكن فين واتولدت امتي وفين.. وايه هواياتك واهتماماتك وكدا يعني، مترغيش كتير فيها يعني :smiley:

2. General question :

اسئلة عامة زي مثلاً دولة كذا في قارة ايه او عاصمة دولة كذا ايه واسئلة تانية كتير بتكون سهلة بردو.

3. Your Appearance :

مظهرك وشكلك : يعني خلي شكلك حلو لبسك يكوون نضيف مش لازم تكوون بدلة وجو الرسميات ده، بس أهم حاجة مظهرك يليق بطالب كلية.

تاني حاجة هنتكلم عليها هي "أقسام الكلية"

مبدأيا كده انت بتختار القسم من اول سنة او تاني سنة .. يعني حسب الجامعة اللي انت فيها .. يعني عندك مثلاً جامعة اسكندرية التخصص فيها بيكون من سنة تانية… انما الجامعات التانية بيكون التخصص من سنة اولى علي طول.

نيجي لااقسام ذات نفسها فالكلية فيها 3 أقسام:

1) اول قسم الي هو قسم الارشاد ( ومقسوم لانجليزي او فرنساوي أو ألماني .. يعني بتدرس مواد القسم ده بلغة من التلاته ) :

والقسم دا بيأهلك تكون مرشد سياحي .. عشان بتدرس فيه تاريخ مصر وآثار مصر والمعالم السياحية المشهورة والحضارات المصرية وكده.

ولو انت خريج القسم دا ممكن تشتغل كام حاجة زي مثلا :

انك تشتغل في شركات السياحة كمرشد سياحي ودي بتبقي محتاجه دبلومة ارشاد سياحي مدتها سنتين وكمان بياخدوا رخصة ارشاد سياحي اول ما يتخرجوا من الكلية

وبالنسبة لمرتباتهم فبتبقي على حسب اللغات اللى معاك وكل ما يبقى معاك لغة نادرة بتاخد فلوس اكتر

وعلى العموم مرتب المرشد السياحى بيتراوح ما بين (3000 الى 6000 جنية او اكتر ) وممكن تقل عن كدة لو معاكش لغة نادرة،

ده غير انك ممكن تشتغل في مجال الضيافة في المطارات

او العلاقات العامة

او في مجال التسويق والمبيعات

وخدمة العملاء

او مدرسين لاي لغة.

2) تاني قسم وهو قسم الدراسات السياحية ( ومقسوم لعربى أو أنجليزي ) :

والقسم دا بقا بيأهلك تشتغل في كل اقسام الشركات السياحية وشركات الطيران والمطارات

وكمان وظايف عامة زي التسويق وخدمة العملاء والعلاقات العامة

وفي فترة دراستك بيبقي في تدريب صيفي كل سنة من سنين الدراسة في شركة سياحة او طيران.

والقسم دا أكتر قسم مطلوب في مجال الشغل في مصر والوطن العربي عموما

٣) تالت قسم وهو قسم الفنادق و الادراة الفندقية ( ومقسوم لعربى أو أنجليزي ) :

والقسم دا بيأهلك انك تشتغل في أي شغل ليه علاقة بالفنادق السياحية وبيكون في بردو تدريب صيفي كل سنة في فندق.

والمواد عموما الي بتدرسها في الكلية بتبقى زي

تاريخ - واثار- وهيروغليفي - وقانون - وارشاد تطبيقي - تسويق فندقي - والتجهيزات الفندقيه - وصناعية الضيافة - وانجليزي ولغة تانية وشوية مواد فرعية زي حقوق انسان مثلا

بس كده خلصنا :smiley:

وان شاء الله ربنا يوفقكم في دراستكم وتتخرجوا مرشدين سياحيين قد الدنيا

٤

كلية التخطيط العمراني

============

ركزوا في البوست دا

كلية التخطيط الإقليمي والعمراني ⁦:warning:⁩

من إحدى الكليات في مصر، لذلك يتسائل الكثير من طلاب الثانوية العامة عنها وعن أقسامها والدراسة بها ومجالات العمل بها بعد التخرج، وذلك لقلة الأعداد التي تلتحق بها سنويًا ولوجودها في جامعة القاهرة فقط، كما يوجد لها قسم داخل كلية الهندسة بجامعة الأزهر.

اماكن كلية التخطيط الاقليمي والعمراني ⁦:warning:⁩

تعتبر كلية التخطيط الإقليمي والعمراني بجامعه القاهرة؛ هى الكلية المتكاملة والوحيدة في مصر والشرق الأوسط، حيث لا يوجد سوى ثلاث كليات للتخطيط العمراني بالشرق الأوسط؛ وهم بالقاهرة، والدمام، وتل أبيب.

شروط الالتحاق بكلية التخطيط والعمراني ⁦:warning:⁩

لا تقبل الكلية سوى خريجي الثانوية العامة أي لا تقبل بأي من طلاب التعليم الفني، ولا يوجد لها امتحانات قدرات قبل الالتحاق بها، وتقبل طلاب الشعبة العملية من قسم الرياضيات.

نظام الدراسة بالكلية ⁦:warning:⁩

الدراسة في كلية التخطيط العمراني والإقليمي بنظام الساعات المعتمدة، حيث يتم تقسيم فصول سنوات الدراسة إلى 10 فصول دراسية، كما يتم تقسيم الفصول الدراسية إلى ثلاثة مجموعات على النحو التالي:

المستوى التمهيدي يتكون من أربعة فصول دراسية، وتكون عدد المواد الإجبارية به 20 مادة، والاختيارية خمس من أصل تسع مواد، وتتم الدارسة به بنظام الساعات المعتمدة بحد أدنى 72 ساعة.

المستوى الأساسي يتكون من 3 فصول دراسية، وتكون عدد المواد الإجبارية 13 مادة، والاختيارية ثلاث من أصل ست مواد، وتتم الدارسة به بنظام الساعات المعتمدة بحد أدنى 54 ساعة.

المستوى التخصصي ويتم فيه بدء التخصص بأحد أقسام الكلية الأربعة حيث يتكون المستوى التخصصي من 3 فصول دراسية، وأربع أقسام تكون عدد الساعات المعتمدة به 51 ساعة كحد أدنى.

الأقسام بكلية التخطيط العمراني ⁦:warning:⁩

قسم التنمية الإقليمية

يدرس الطالب به التعريف بمفاهيم التنمية الإقليمية، ودور التخطيط الإقليمي في أحدات التنمية على المستويات التخطيطية المختلفة للمناطق الحضرية والريفية والصحراوية.

وفهم القضايا التخطيطية على مستويات إقليم المدينة والقطاع والإقليم التخطيطي، وتكوين قاعدة معرفية لدى الطالب حول القضايا الأساسية في جغرافيا العمران والسكان وانعكاساتها التخطيطية.

قسم التخطيط العمراني

يهدف القسم إلى تعريف الطالب بمجالات التخطيط العمراني، وفهم المتغيرات المختلفة الموثرة على العمران، وتنمية الوعي بالتطور الفكري، ومعرفة المفاهيم الأساسية المستخدمة في التشريع والإدارة.

واكتساب مهارات التوصيف الاجتماعي الحضري والريفي، مع فهم العمران كظاهرة متعددة الأبعاد، واكتساب المعرفة النظرية الأساسية لمنهجية تخطيط المناطق الحضرية والريفية والجديدة، وتنمية قدرات الطالب على إعداد المخططات التفصيلية لها.

قسم التصميم العمراني

يساعد الطالب على تحليل وتصميم المواقع، وتصميم مشروعات عمرانية للمناطق السياحية والصحراوية والمحميات، وتصميم وتنسيق المناطق المفتوحة مثل الحدائق والمنتزهات والمناطق المفتوحة، ودراسة ومعالجة البيئة العمرانية المتدهورة، والدراسات البصرية والتنسيق الحضاري للبيئة العمرانية.

قسم التخطيط البيئي والبنية الأساسية

يتعلم الطالب بالقسم أهم أسس تخطيط شبكات النقل والطرق والمرور، وأسس تخطيط التغذية بالمياه والصرف الصحي، والنظم المختلفة لتخطيط شبكة الكهرباء والاتصالات، وكافة أعمال البنية الأساسية

الدرجات العلمية التي تمنحها الكلية ⁦:warning:⁩

تمنح الكلية درجة البكالوريوس في التخطيط الإقليمي والعمراني، ودرجة الدبلوم في التخصصات مثل التنمية المحلية، والتخطيط الإقليمي والعمراني، ودرجة الماجستير في التخطيط الإقليمي والعمراني في تخصصات التنمية الإقليمية، والتخطيط العمراني، بجانب التصميم العمراني، ودرجة الدكتواره في التخطيط الإقليمي

تنسيق العام الجامعي 2018/ 2019 ⁦:warning:⁩

جاء الحد الأدنى للقبول بكلية التخطيط العمراني بجامعة القاهرة من مجموع درجات 380 درجة، أي بنسبة مئوية 92.68%.

تنسيق الأعوام السابقة للكلية ⁦:warning:⁩

عام 2015 كان الحد الأدنى لتنسيق الكلية 93.9%، وعام 2014 كان 92.4%، وعام 2013 كان التنسيق 94.1%، وعام 2012 كان 89.7%، وعام 2011 كان التنسيق 93.9%، كما تم قبول مائة طالب فقط العام الماضي بناءً على طلب إدارة الكلية.

مجالات العمل للخريجين ⁦:warning:⁩

يعمل خريجي كلية التخطيط العمراني على تخطيط القرى السياحية والمدن والقرى، ووضع خطط على المستوى القومي مثل مدينتي والرحاب، والمدن الجديدة مثل التجمع الخامس و6 أكتوبر والعاشر من رمضان، تتم تخطيطها من قبل الكلية وليس فقط بل تخطيط قرى سياحية أيضًا

أماكن عمل الخريجين ⁦:warning:⁩

يتسع مجال العمل بالنسبة للخريجين ليشمل الوزارات المختلفة؛ مثل وزارة التنمية المحلية، ووزارة الإسكان والمرافق والمجتمعات العمرانية والإدارات التابعه لها، ووزارة التخطيط والمتابعة والإصلاح الإداري، والمكاتب الاستشارية والمحافظات، بالإضافة إلى الهيئات العامة والخاصة المحلية والعالمية في مجال التصميم والتخطيط العمراني والإقليمي.

بالتوفيق للجميع

المعهد_الفني_الصحي ⁦

المعهد ده بياخد طلبة علمى علوم و رياضة

بيعتبر من افضل المعاهد و الكليات العلمية و ليه مجال شغل كويس

مدة الدراسة ف المعهد ده سنتين بس

مميزات المعهد اية بقا ؟الدراسه فية بتكون سهلة جدا و بتتخرج تشتغل فنى تحاليل طبية او فنى اشاعة او مراقب اغذية تبع وزارة الصحة

من اهم مميزاتوا انك بتشتغل على طول حتى لو فتحت معمل ف عيادة دكتور و المجال دة مطلوب اوى و لية شغل جامد

نقسم الدراسة بالمعاهد الفنية الصحية الى الشعب الاتية

1 - شعبة فنيى المعاونين الصحيين

2 - شعبة فنيى وفنيات المعامل

3 - شعبة فنيى وفنيات الأشعة

4 - شعبة فنيى وفنيات صناعة الأسنان

5 - شعبة فنيى وفنيات التسجيل الطبي والإحصا

6 - شعبة فنيى وفنيات التمريض

7 - شعبة فنيى وفنيات صيانة الأجهزة الطبية

8 - شعبة فنيى الرعاية الطبية العاجلة

9 - شعبة فنيات التوليد وصحة المجتمع

10- شعبة فنيى وفنيات التمريض النفسى والصحة النفسية

11- شعبة فنيى وفنيات الطوارئ والحالات الحرجة

12- شعبة فنيى وفنيات تمريض الاورام

واليكم معلومات تفصيليه عن المعهد الفني الصحي

المعهد دراسه انجلش بس اربع سنين منفصلين ... سنتين في الاول وبعد كدا تستلم التكليف ال هو الشغل الحكومي ف المستشفيات وبعد كدا لو جبت جيد جدا مرتفع او امتياز ليك حق تكمل في *كليه العلوم الصحية التطبيقية*

ودي مؤشراتها السنه دي 96.9 لجامعه المنوفيه و96.8 لجامعة بني سويف يعني يعتبر بعد صيدله وعلاج طبيعي

المعهد بيعتبر من الدايره الطبيه في القمه حيث تنسيق 2015/**2016 في المنصوره حد ادني اقل قسم 93.6 و 94 %

اقسام المعهد ومميزاتها.

قسم اشعه وبيتراوح تنسيقه الداخلي 96% ل 90%

بتكلف بعد الدراسه في مستشفيات التابعه لوزارة الصحه و وزارة العدل و وزارة التعليم العالي وغيرهم من القطاعات الطبيه الخدميه.

وبتقدر خريج المعهد لانه حاصل علي ترخيص مزاولة مهنه علي عكس طالب علوم طبيه (اتلغت) وعلوم.

يشتغل خاص بمرتبات عاليه. وبيقدر يشتغل في 80% من انواع الاشعه. ويقدر مع الوقت يفتح مركز اشعه بترخيص طبيب.

ويقدر يستكمل دراسه في كلية العلوم الصحيةه لانها امتداد للمعهد او يستكمل سنتين التخصص في نفس المعهد وبردو هياخد بكالريوس

قسم تحاليل وبيتراوح تنسيقه الداخلي علي حسب 2015/2016 لي 95% ل 90%

بتكلف في وزارة الصحه وجميع الوزارات اللي ليها خدمات طبيه مجتمعه. ذي المسشفيات العسكري والطب الشرعي وغيرهم.

الخريج يقدر يشتغل خاص بمرتبات مجزية في المعامل التحاليل و معامل شركات الكيماويات و قسم تحاليل من الأقسام المهمه في التشخيص وله سوق كبير في العمل الخاص و40% من أصحاب المعامل خريجي المعهد الفني الصحي.

قسم اسنان

وده من الاقسام اللي بتعتمد علي الموهبه في فن النحت وبيقوم المعهد بعمل اختبار في بداية الدخول لقياس موهبه النحت .

الخريج بيتعين في المستشفيات الحكوميه او يشتغل في عيات الاسنان الكبيرة ومعامل الاسنان ....

ويقدر يفتح معمل لتركيبات الأسنان وبيكون مسئول عن تركيبات وتجهيزها وقياسها.

تسجيل طبي.

من الأقسام المريحه والمناسبه للبنات ويتكلف في مستشفيات المركزي ووحدات الصحه.

وبيكون مسئول عن تنظيم العمليه الصحه إداريا.

معاونين صحين.

بيتكلف في الإدارات الصحيه وبيشرف علي المطاعم والشركات المياه ومصانع المنتجات الغذائية وبيكون له سلطه في المنطقه اللي بيتعين فيها بالاضافه للضبطيه القضائية .

اما بالنسبه لأقسام علمي رياضه.

قسم اجهزه طبيه وده من الأقسام المهمه في مجال الهندسه الطبيه ويتعين في جميع المستشفيات والوحدات و مستشفيات التعليم العالي.

وبيقدر يمضي عقود مع شركات خاصه ويشتفل في الصيانه او المبيعات ومرتبات مجزيه.

او ممكن يشتغل في التصنيع ويطور من مشروع تخرجه لو كان جهاز طبي.

وتقدر تكمل في هندسه او علوم طبيه. الامتداد الطبيعي للقسم.

باختصار لو مجموعك من 90لي 96 وزعلان متزعلش! المعهد من احسن الاختيارات اللي ممكن تختارها في حياتك وهتحس ده لو حبيته و ركزت ف تخصصك.

بالتوفيق :blue_heart:

كليه الذكاء الاصطناعي

_جامعة القاهرة..جامعة سوهاج.. جامعة كفر الشيخ :point_down:

-ايه هي كلية الذكاء الاصطناعي جامعة كفر الشيخ؟ ⁦:warning:⁩

= هي كلية تهتم بدراسة علوم الذكاء الاصطناعي وتعتبر الاولي في الشرق الاوسط لدراسة الذكاء الاصطناعي

تم انشائها بناء علي قرار السيد رئيس مجلس الوزراء قرار 871 لعام 2019

مدة الدراسة فالكلية اربع سنوات بنظام الساعات المعتمدة ثم يحصل الطالب علي درجة البكالوريوس في علوم الذكاء الاصطناعي

- هدرس اية فالكلية واية الاقسام الفيها ؟ ⁦:warning:⁩

=هتدرس فالكلية جميع المجالات و التكنيكات الخاصة بالذكاء الاصطناعي ذي ال machine learning , deep learning , computer vision , NLP , Robotics

والاقسام الموجودة فالكلية هي ⁦:warning:⁩

1. برمجة الالة واسترجاع المعلومات learning Machine and information retrieval

2. الروبوتات والالات الذكية and Robotics The Intelligent Machines

3. تكنولوجيا انظمة الشبكات المدمجة Network Embedded Systems Technology

4. علوم البيانات Science Data

-فرصة العمل بعد التخرج من الكلية ؟ ⁦:warning:⁩

= اولا ودا شئ لازم يذكر ان الارزاق بيد الله وحده ومش الكلية هي الهتحدد عملك بشكل مباشر ومش هي الهتوديك للشركة الهتوظفك خاصة ان العالم بقي بيتجه لتوظيف المبدعين في مجال معين بغض النظر عن الشهادة الجامعية

تب نتكلم بالارقام شوية بقي :thinking:

العاملين في مجالات تخص الذكاء الاصطناعي هم الاعلي طلبا فالعالم

وفقا لموقع CIO فان الذكاء الاصطناعي هم الاكثر طلبا علي مستوي العالم لعام 2020 بمتوسط راتب بلغ 150 الف دولار فالسنه

متستألش بالرقم عزيزي القارئ انت بتتكلم ف200 الف جنية فالشهر 🥳:sweat_smile:

المصدر https://www.cio.com/…/hiring-the-most-in-demand-tech-jobs-f…

طبعا هتقولي دا برا احنا عوزين فمصر هقولك اقراء عن حجتين :wink:

الاولي خطة مصر للتحول الرقمي ودي كانت من اسباب انشاء الكلية فالاساس

الثانية ادخل علي موقع LinkedIn وابحث عن الوظائف الخاصة بالاقسام المكتوبة فوق وصدقني هتتفاجئ من كمية الطلبات علي الموظفين في الشركات الانترناشونال .

- تنسيق الكلية كام ؟ ⁦:warning:⁩

=تنسيق اول سنة كان 92.3 علمي رياضة لكن بما ان دي كانت اول سنه متوقع ذياة كبيره في التنسيق ومتنساش ان التنسيق البيحددة مكتب التنسيق والكلية ملهاش دخل فيه مثل باقي الكليات :rolling_eyes:

-الكلية بتقبل من شعبة ايه ؟ ⁦:warning:⁩

=الكلية بتقبل شعبة علمي رياضة لكن المفاجئة ان في قسم جديد ولأول مرة السنادي لعلمي علوم قسم Bio Artificial Intelligence program او برنامج الذكاء الاصطناعي الحيوي 🥳🥳:heart: القسم هيبقي بمصاريف لم يتم الاعلان عنها بعد لأن القسم ماذال في مرحلة الموافقة

-الكلية فيها كام طالب ؟

= عدد طلاب الفرقة الاولي 211 طالب , والسنة الجديدة مش هتزيد عن كدا

فالحق عزيزي القارئ واحجز مقعدك فالكلية :sweat_smile::wink:

-اية الفرق بين كلية الذكاء الاصطناعي وبين كليات الحاسبات والذكاء الاصطناعي ؟ ⁦:warning:⁩

= في كلية الحاسبات بتبداء تدرس علوم الذكاء الاصطناعي في الفرقة الثالثه ومش بتتخصص فيها جدا غير في مرحلة الدراسات العليا اما كلية الذكاء الاصطناعي بتتيح لك دراسة العلم من السنة الاولي لك فالكلية ودا طبعا شئ نادر جدا بالاضافه انها من الكليات النادرة البتعطي لخريجيها بكالوريوس في علوم الذكاء الاصطناعي بخلاف باقي الكليات لان الدرجة العلمية دي نادرة علي المستوي العالمي ومفيش جامعات كتير بتعطيها . ودي ميزة تجعل ليك الأولوية فالقبول لدراسة الماجستير الخاص باحد مجالات العلم عن خريخ حاسبات او هندسة

وكمان المواد مختلفة تماما عن حاسبات بخلاف المواد الاساسية ال طالب حاسبات او هندسة بيدرسها

- ايه الفرق بين كلية الذكاء الاصطناعي وقسم ميكاترونكس ؟ :thinking:

=الميكاترونكس مجال يجمع ما بين الهندسة الالكترونية والمكانيكية يعني ما بين تصميم الدوائر الالكترونية وتصميم الهيكل المكانيكي.

الذكاء الصناعي هو مجموعة برامج تمكن الآلة أو الروبوت من عمل مهمة بطريقة دقيقة

يمكن ان تجتمع الميكاترونكس والذكاء الصناعي في تطبيقات عملية مثل عمل روبوت طبي او روبوت زراعي او هندسي. فإنه سيتكون من 3 اشياء : تصميم دوائر الكترونية، تصميم هيكل ميكانيكي وتصميم برنامج يمكنه من فهم البيئة من حوله.

فلو اعتبرنا أن المثال إنسان فالميكاترونكس هي العضلات والمخ هو الذكاء الاصطناعي

والمشترك عندنا هو القسم الخاص بالروبوتات 🦾🦿

-لية اسيب هندسة واخش كلية الذكاء الاصطناعي ؟:thinking::thinking:

= لان المجال يجمع فية علوم كثيره بين هندسة وبرمجه ورياضيات ...... , وهو اكثر مجال مطلوب عالميا و كمان المسمي بتاعك علي حسب التخصص النهائي الحضرتك هتختارة مثلا لو اختارت مجال الmachine learning "احد مجالات علوم الذكاء الاصطناعي " فالمسمي الوظيفي بتاعك هو machine learning engineering تب اخترت مجال الdata science فالمسمي الوظيفي هو data scientist

بالاضافة الي انك مش هتضيع سنة من عمرك فاعدادي

وافضل الاسباب هو انك لو بتحب العلم وانت فهندسة للاسف مش هتعرف تتعلمو غير بعد التخرج معظم الدكاترة داخل الكلية خريجي هندسة متخصصوش فالمجال غير بعد التخرج في مراحل الدراسات العليا

فخدها من قصرها ولو بتحب العلم توكل علي الله مش انت لوحدك الجبت 99.5 ودخل كلية الذكاء الاصطناعي بدل هندسة وهندسة بترول لا عندنا منك كتير :wink:

كليه اللغات والترجمه

ناس كتير كلمتني عايزه تفاصيل عن الكليه دي

السن راحت منك :broken_heart:عاوز حاجة فيها نفس الأقسام وتخليك تسافر وتلف العالم بردو :relieved:

جامعة الأزهر بتعوضك ياعم بكلية تنفع للكل

مبدأيًا كدة الكلية لعام وأزهر

..

الكلية عندي تنقسم إلى ثلاث شعب ⁦:warning:⁩

- الشعبة الأولى تسمى بالشعبة العامة أو شعبة الأدب

طب وايه اللغات اللي فيها ⁦:warning:⁩

صلِّ على النبي وانا اقولك:blue_heart:

اللغة الإنجليزية وتسبقها سنة تمهيدي

اللغة الفرنسية، اللغة الألمانية، اللغة الفارسية، اللغة العبرية، اللغة الصينية، اللغة الأسبانية، بجانب اللغة التركية، اللغة الأردية، اللغات الأوروبية القديمة كالإيطالي واليوناني واللاتيني، واللغات الإفريقية

ودي بقى مدة الدراسة 4 سنين

-عندنا كمان شعبة الدراسات الإسلامية

طب وايه لغاتها دي كمان:thinking:

مش هتصلِّ على النبي ولا إيه:rolling_eyes:

بص يا سيدي عندنا :point_down_tone1:

الإنجليزية، الفرنسية، الألمانية، والصينية، وتتركز الدراسة في هذه الأقسام على المواد الإسلامية بهذه اللغات مثل الحديث، التفسير، الفقة، السيرة، وترجمة معاني القرآن

والدراسة فيها أربع سنوات تسبقها سنة تمهيدية

- تالت شعبة الترجمة الفورية

وهي خاصة باللغة الإنجليزية فقط

ومدة الدراسة فيها أربع سنوات تسبقها سنة تمهيدية

-طب بتعلم فيها ايه :thinking:

=فنون أصول الترجمة بأقسامها كالترجمة التتبعية والمنظورة وتدرس اللغة الفرنسية كلغة ثانية .

*أقسام الكلية ومجالات العمل المتاحة*

قسم اللغة الإنجليزية:sunflower:

مبدأيًا ده القسم الوحيد االي فيه ثلاث شعب

-شعبة الأدب التي تهدف لتخريج جيل يلم بالأدب الإنجليزي تمهيدًا لعمله في مجال التدريس

- شعبة الترجمة الفورية التي تهدف إلى تخريج من يمتلك مهارات الترجمة الكتابية والشفوية للعمل في المؤسسات المعنية بالترجمة الفورية

- شعبة الدراسات الإسلامية باللغة الإنجليزية تهدف إلى تخريج دعاة مؤهلين للعمل في مجال الدعوة سواء داخل أو خارج الدول الإسلامية في مختلف البلاد.

:blossom::blossom::blossom:

قسم اللغة الفرنسية:sunflower:

يعتمد قسم اللغة الفرنسية على تدريس المواد التخصصية بجميع كليات جامعة الأزهر، فضلًا عن اللغة الفرنسية كلغة غير تخصصية، وتشمل مواد الدراسة بقسم اللغة الفرنسية إلى جانب المواد الإسلامية

مواد الأدب، الحضارة، اللغة، والنقد بمختلف الفروع، كما تدرس به اللغتان الاتينية والإنجليزية كلغتين إضافيتين

:point_left_tone1: ويهدف القسم إلى إعداد دعاة للدين الإسلامي باللغة الفرنسية وإبتعاثهم للخارج.

:blossom::blossom::blossom:

قسم اللغة الألمانية:sunflower:

تعتبر اللغة الألمانية هي اللغة الأجنبية الأولى في دول أوروبا الشرقية ومعظم دول أوروبا الغربية

:point_left_tone1:ويعمل هذا القسم على تخريج مترجمين ومختصصين في مجال اللغة الألمانية نظرًا لأهميتها على المستوى الدولي، كما يرتبط القسم باتفاقيات تعاون مع بعض الجامعات الألمانية، يقوم على إثرها بالتبادل الطلبي، وكذلك التبادل بين أعضاء هيئة التدريس ومعاونيهم، كما هو الحال مع جامعة فيشتا الألمانية.

مجال العمل القسم:see_no_evil:

ينتشر خريجو القسم في قطاعات كثيرة؛ فمنهم من يعمل بالتدريس في مدارس وزارة التربية والتعليم وبعض الجامعات الخاصة؛ كالجامعة الألمانية بالقاهرة، وكثير منهم يعمل في السياحة، ومنهم من يعمل بمجالات الترجمة، وقد وجد بعضهم فرصة للعمل في الصحافة والإذاعة والتليفزيون والهيئة العامة للاستعلامات ومصر للطيران وغيرها.

:blossom::blossom::blossom:

قسم اللغة الإسبانية:sunflower:

:point_left_tone1:يهدف القسم إلى تخريج أعضاء هيئة التدريس، وتخريج مجموعة من الدعاة الإسلاميين بجانب تخريج عدد كبير من المترجمين الذين يعملون في مختلف وزارات الدولة، و المرشدين السياحيين.

:blossom::blossom::blossom:

قسم اللغة العبرية:sunflower:

:point_left_tone1:يتأهل الخريج للعمل في وزارة السياحة، مكاتب الترجمة، الإذاعة والتلفزيون، التربية والتعليم، ووزارة الدفاع، كما قام القسم بترجمة عدد من الكتب والدراسات الهامة التي تخدم المجتمع المصري وتخدم الإسلام.

:blossom::blossom::blossom:

قسم اللغة الفارسية

يدرس الطالب في هذا القسم مجموعة من المواد التي تعرف الطالب بتاريخ إيران وحضارتها وعصورها الأدبية المختلفة قديمًا وحديثًا، كما يتم التركيز على الدراسات اللغوية والمحادثة والترجمة من الفارسية إلى العربية والعكس

فيتخرج الطالب وقد أحاط بكل ما يخص هذه اللغة وأهلها، ويكون قادرًا على الإسهام في كتابة البحوث والدراسات الخاصة بهذه اللغة وموطنها، وكذلك القيام بعملية الترجمة التحريرية والشفوية.

:blossom::blossom::blossom:

قسم اللغة التركية:sunflower:

يقوم القسم بتدريس اللغة التركية وآدابها وتاريخ الأتراك والوثائق والمخطوطات المحررة باللغة التركية.

:blossom::blossom::blossom:

قسم اللغات الأفريقية

بدأت الدراسة فيه بلغتين هما؛ اللغة السواحيلية، ولغة الزولو، ثم أضيفت اللغة الفولانية، وأخيرًا أضيفت اللغة الأمهرية،

:point_left_tone1:ويهدف القسم إلى خدمة الإسلام من خلال توصيل الثقافة العربية الإسلامية إلى شعوب القارة عن طريق تدريس اللغات الإفريقية الأكثر انتشارًا في القارة.

:blossom::blossom::blossom::blossom:

قسم اللغة الأردية:sunflower:

يحرص القسم على تدريب الطلاب على التحدث باللغة الأردية والكتابة بها والترجمة منها وإليها،

:point_left_tone1:ويستطيع الخريج المُلم باللغة الأردية العمل بالجامعات المذكورة، والدعوة الإسلامية، فضلاً عن الإذاعة المصرية خاصة البرامج الموجهة إلى جنوب شرق آسيا والتدريس في المعاهد الأزهرية.

:blossom::blossom::blossom:

قسم اللغة الصينية:sunflower:

ويهتم هذا القسم في شعبة الأدب بتدريس اللغة الصينية وآدابها، وحضارة هذه البلاد وتاريخها، ولمزيد من التقارب بين شعبين يمثلان أقدم حضارتين عرفتهما البشرية.

:blossom::blossom::blossom:

قسم الدراسات الإسلامية باللغات الأجنبية:sunflower:

يتألف قسم الدراسات الإسلامية باللغات الأجنبية من خمس شعب؛ هي الإنجليزية، الفرنسية، الألمانية، الصينية، واللغات الأفريقية، حيث قررت جامعة الأزهر أن تفتتح شعبًا للدراسات الإسلامية باللغات الأجنبية

:point_left_tone1: يؤهل فيها الدارس ليكون متحدثًا باسم الأزهر بما يعتنقه من وسطية الإسلام، واعتدال الفكر الإسلامي، بعيدًا عن دعاوى التعصب، التطرف، والعنف، كما يوجد أيضًا قسم اللغات الأوربية القديمة.

بالتوفيق للجميع

كلية علوم الملاحة و تكنولوجيا الفضاء

جامعة بني سويف ...الكلية الوحيدة فمصر و الشرق الأوسط المتخصصة في مجال الفضاء ..

.يعني مجال دراستك كله فضاء و ملاحة...

اتعملت امتي ديه اول مرة اسمع عنها ؟؟ اتعملت سنة ٢٠١٦ و كانت أول دفعة فيها دفعة ٢٠١٨ :muscle: يعني انت بالنسبالهم تاني دفعة :heart:

تنسيقها كان كام و بتاخد من انهي فرع .؟؟؟ ..تنسيقها كان حوالي ٩٢% و بتاخد من علمي رياضة و ٩٥%علوم ...عدد الناس اللي ف الدفعة موصلش ١٠٠ واحد لانها لازم تاخد عدد قليل جدا:heart:

أقسامها: خمسة أقسام يمكن للطالب الالتحاق والدراسة بهم؛ وهم قسم علوم الفضاء، وقسم تكنولوجيا الفضاء، وقسم اتصالات الفضاء، وقسم الملاحة الفضائية، وقسم استراتيجية إدارة الفضاء الدولية.

طيب احنا مش لاقيين ناكل هنروح الفضاء يا عم سيبك أنا هشتغل ايه برضه لما اهري فنفسي كل السنين ديه و بعدين هي كام سنة أصلا :joy::joy::joy::joy:هجاوبك بص يا سيدي

مجالات عمل الطلاب بعد التخرج

يتمكن الطلاب بعد الدراسة بأقسام الكلية المختلفة العمل في مجالات؛ الهيئة العامة للارصاد الجوية، وهيئة الاستشعار عن بُعد وعلوم الفضاء، ووزارات الاتصالات والكهرباء والطاقة والبحث العلمي، والملاحة البحرية والجوية، وهيئة الطيران المدني، والجامعات ومراكز البحث العلمي، ووزارة الدفاع، والمطارات، ووزارة الإنتاج الحربي.

كما يعمل الخريج في برنامج الفضاء المصري الجديد، ووكالة الفضاء المصرية، والمركز القومي للبحوث، وشركات البترول، ومصانع الإنتاج الحربي، ومصانع بنها للإلكترونيات، والطيران المدني والمطارات، والمحطات الأرضية للأقمار الصناعية، وجميع شركات المحمول، ووزارات؛ الاتصالات والبترول والتعليم العالي.

امتيازات يحصل عليها الطالب بالتحاقه بالكلية

تمنح جامعة بني سويف درجة البكالوريوس في علوم الملاحة وتكنولوجيا الفضاء، في تخصص الملاحة الفضائية، وتُعد الكلية الوحيدة في مصر والشرق الأوسط التي تمنح درجة البكالوريوس المتخصصة في علوم الملاحة وتكنولوجيا اتصالات وتطبيقات الفضاء.

يُدرس بالكلية نخبة من الأساتذة المتخصصين في مجال علوم الملاحة الفضائية واتصالات وديناميكا الفضاء، بالإضافة إلى انتداب عدد من الأساتذة المتخصصين في مجال الفضاء، من روسيا وأوكرانيا وألمانيا ووكالة الفضاء الدولية "ناسا"، بواقع اثنين من الأساتذة الدوليين المنتدبين بكل فصل دراسي.

يقوم الطلاب بعمل مشروع تخرج عبارة عن قمر صناعي متكامل، تحت إشراف أساتذة الكلية المتخصصين والمنتدبين وبالتعاون مع الجهات المختصة، وتوفر جامعة بني سويف إقامة بدار الضيافة للطلاب الوافدين والباحثين، داخل الحرم الجامعي على بعد أمتار من كلية علوم الملاحة وتكنولوجيا الفضاء.

《كلية علوم ذوي الإحتياجات الخاصة 》
:black_medium_small_square:الكلية من الكليات الجديدة في مصر ، موجوده في جامعتين بس هما الزقازيق وبني سويف
:black_medium_small_square:أول سنة دراسية بدءت فيها الكلية ونزلت في التنسيق كانت سنة 2017 / 2016
:black_medium_small_square:الكلية لطلاب الثانوية العامة بمختلف الشُعب يعني علمي علوم ورياضة وأدبي :nerd:
:black_medium_small_square:في جامعة الزقازيق الكلية اسمها 《علوم الإعاقة والتأهيل》 أما في بني سويف فهي اسمها 《علوم ذوي الإحتياجات الخاصة 》:wheelchair:
:black_medium_small_square:هل في فرق بين الإتنين؟ :eyes:
- آه في فرق مش كبير بس هنعرفه لما نكمل:ok_hand:
:black_medium_small_square:الكلية فيها برنامجين أو قسمين
- البرنامج 1 《التربوي 》 : ده بقى البرنامج الأكاديمي و من خلاله بتقدر تكون مدرس وبتتخصص بقى إما مدرس أساسي 《ابتدائي》أو مدرس عام 《إعدادي وثانوي》
- بتختار المادة ال هتتخصص فيها بعد اختيارك الأساسي او العام وطبعا مواد التخصص بتختلف
:triangular_flag_on_post: يعني مثلاً : لو اتخصصت عام المواد ال هتبقى متاحة ليك هي 《عربي ، انجليزي ، رياضة ، علوم ، دراسات ، حاسب آلي 》
:triangular_flag_on_post: أما بقى لو اتخصصت عام فالمواد المتاحة هي 《عربي ، انجليزي ، رياضة ، علوم ، تاريخ ، جغرافيا ، فيزيا ، كيميا ، ييولوجي ، حاسب 》
:warning: ملاحظة مهمة :
- لو انت كنت علمي علوم أو رياضة فأنت متاح ليك كل المواد أما لو كنت أدبي فهيبقى متاح ليك المواد الأدبية بس يجانب العربي والانجليزي :woman:‍:school::man:‍:school:
- التخصص بيبدء من سنة 1
:black_circle: سؤال مهم
- لما اتخرج هشتغل إيه ؟!
- تخصص تربوي بيأهلك تشتغل مدرس في الأساس في المدارس الخاصة بذوي الاحتياجات الخاصة او مدرس في المدارس العادية لأنك بتكون مؤهل للتعامل مع كل الفئات:ok_hand:
:black_medium_small_square:البرنامج 2 《الإختصاصي》:
- ده بقى قسم الإعاقة وبيحتوي على 5 شُعب هي :
- الإعاقة البصرية
- الإعاقة السمعية
- التوحد
- اضطرابات اللغة والتخاطب
- صعوبات التعلم
:black_medium_small_square:بالنسبة لمجالات الشغل ؟
- لما بتتخرج من الكلية بتقدر تبقى مترجم بلغة الإشارة
- أخصائي توحد في مراكز التوحد والتخاطب
- بتقدر تشتغل في مراكز التأهيل النفسي والمستشفيات النفسية المهتمة بذوي الإحتياجات الخاصة
- طبعا مجال التدريس في الجامعة 《ذاكر بقى》
- المراكز خارج مصر بقى وخصوصا دول الخليج وبعض الدول الأوروبية والآسيوية المهتمة بذوي الإحتياجات الخاصة :fingers_crossed:
:black_medium_small_square:دلوقتي بقى إيه الفرق بين الكلية في بني سويف والزقازيق ؟
- الفرق إنه من بني سويف بتتخرج أخصائي تربوي يعني بتجمع بين البرنامجين أما الزقازيق فبتبقى تخصص إما تربوي أو أخصائي
- علفكرة ممكن تعمل دبلومة لمدة سنة لو إنت اخصائي بس وتبقى تربوي كمان:heavy_check_mark:
:black_medium_small_square:مدة الدراسة في الكلية 4 سنين وشغالة بنظام الساعات المعتمدة
- لما بتقدم في الكلية بيتعملك إختبار كده عشان يعرفوا قدرة تحملك على الكلية وكمان يحددوا قدراتك الجسدية والذهنية بس متخافش بيبقى بسيط ونادر جداً إن حد يترفض بجانب طبعا إنك بتتسأل في معلومات عامة عن المجال ال أنت داخل فيه
:black_medium_small_square:لازم تتأكد مليون مره من نفسك قبل ما تدخل الكلية دي لأنها محتاجة صبر ومجهود وحب كمان عشان تقدر تكمل فيها
- في الآخر بنشكرك جداً على مجهودك الرائع ال هتبذله إذا قررت تدخل الكلية دي وبنشجعك
بالتوفيق:wave:

#كلية_التكنولوجبا_الحيوية biotechnology 》
:black_medium_small_square:كلية ومجال مختلف ومميز :eyes:
- كانت قسم في علوم وزراعة وحاسبات *ولسه موجوده كقسم* ولأهميتها تم فصلها واعتبارها كلية لوحدها:pray:
《كلية التكنولوجبا الحيوية / biotechnology 》
:black_medium_small_square: هي كلية بتدرس فيها الهندسة الوراثية وعلم الوراثة والجينات وبتدرس مجالات مختلفة زي :
《1》- Pharmaceutical biotechnology
المجال الطبي الدوائي:pill:
《2》- Agriculture biotechnology
المجال الزراعي :palm_tree:
《3》- Marine biotechnology
فيما يخص علوم البحار :fish:
《4》- Industrial biotechnology
المجال الصناعي :nut_and_bolt:
《5》- Bioinformatics
مجال المعلوماتية الحيوية :computer:
:black_medium_small_square:إيه الأماكن ال موجودة فيها ككلية وإيه كقسم عشان منتوهش ؟
- موجوده ككلية في جامعتي MUST و MSA و BUC و النيل
- في بينهم فرق واحد بس هو إن في MUST مفيش تخصص وبتدرس كل المجالات وتشتغل في كل المجالات فيما بعد :fingers_crossed:
:black_medium_small_square:أما بقى بايوتيكنولوجي كأقسام موجوده في :
- كقسم في كلية زراعة في جامعة القاهرة
- قسم في كلية العلوم
- قسم في صيدلة الجامعة الألمانية GUC
:black_medium_small_square:بالنسبة للأقسام دي كلها فإيه مجالاتها ومختلفين عن بعض إزاي ؟:thinking:
《1》- Industrial biotechnology
《المجال الصناعي》
- خريج الكلية بيشتغل ف مصانع الكيماويات
- بيشتغل في مصانع ادوات التجميل وال makeup
- بيشتغل في مصانع الادوات المنزلية زي مثلا مساحيق الغسيل وانزيماتها
- بيشتغل ف مصانع الغذاء اي مصنع اغذية زي شيبسي او بيبسي بتشتغل مراقب جودة بتشوف المنتج ده مطابق للمواصفات ولا لا وبالتالي الانتاج كله بيتوقف عليك
- بيتشغل ف ال Biomaterials و ال nanotechnology
بتشتغل ف صناعات الوقود الحفري
《2》- pharmaceutical biotechnology
《المجال الطبي الدوائي》
- بتشتغل ف شركات الادوية وصناعة الادوية زي المضادات الحيوية :pill:
- بتشتغل في معامل ومراكز البحوث لاكتشاف ادوية للقضاء على الامراض
- بتدرس العلاج بالجينات
- بتدرس الخلايا الجذعية وبتشتغل ف مراكز الابحاث او مراكز ومستشفيات العلاج بالخلايا الجذعية ف مصر والخارج
- بتشتغل ف الحقن المجهري واطفال الانابيب
- بتشتغل ف معامل DNA
- بتفتح معامل تحاليل طبية وتشتغل في معامل التحاليل
- بتشتغل ف الطب الشرعي والبحث الجنائي
《3》- Marine biotechnology
《علوم البحار》
بتدرس المجال ده ف الكلية بحيث تكون مؤهل لاستكشاف البحار واستخراج المواد الفعالة للمجال الطبي الدوائي :ok_hand:
《4》- Agriculture biotechnology
《المجال الزراعي》
- بتدرس كل ما يخص الهندسة الوراثية الزراعية والجينات
بنشتغل في تحسين المحاصيل الزراعية كجعلها مضادة للفيروسات او مياه البحار عشان تتسقي بمياه البحار
- كمان بتدرس المدة المتاحة ال ممكن تسيب فيها مثلا المحاصيل الزراعية في الشمس منغير ما يحصلها حاجة
- بتشتغل ف مراكز البحوث الزراعية :bookmark_tabs::palm_tree:
:black_medium_small_square:كده إحنا شرحنا مجالات وتخصصات كل فرع من فروع البايوتيكنولوجي :heavy_check_mark:
:black_medium_small_square:بتتخرج من جامعة MSA و MUST و BUC و النيل حاصل على بكالريوس تكنولوجيا حيوية
:black_medium_small_square:قسم بايوتك كلية زراعة عين شمس حاصل على بكاليريوس زراعة
:black_medium_small_square:قسم بايوتك علوم حاصل على بكالريوس علوم
:black_medium_small_square:قسم بايوتيكنولوجي صيدلة حاصل على بكاليريوس صيدلة
:black_medium_small_square:بالنسبة للتنسيق فهو لسه لحد دلوقتي مفيش حاجة واضحة عنه بالنسبة للجامعات الحكومية أما بالنسبة للجامعات الخاصة فهو بيتحدد على حسب كل جامعة وحسب نسبة إقبال الطلبة وإستيعاب الجامعة:classical_building:
- بالنسبة للمصروفات فهي بتختلف من سنة لسنة ومن جامعة لجامعة بس نقدر نقول إن المتوسط من 40 ألف ل 60 ألف
:triangular_flag_on_post:جامعة MSA هي أعلى واحده يعني المتوسط بردو ما بين 90 ألف ل 100 ألف
:warning:خريجين الكلية دي تابعين لنقابة العلميين وكان في أخبار إن في نقابة للبايوتيكنولوجيست قريب بس منعرفش إذا كان الخبر ده حقيقي أو لا :nerd:
:black_medium_small_square:الكلية مش صعبة ومش سهلة بس بتحتاج مذاكرة لأن تخصصاتها كتير وعلمية بحتة لذلك لازم تذاكر وتجتهد عشان توصل لكل أحلامك:ok_hand:
《أخيراً وليس آخراً إن شاء الله مزهقتوش مننا وبالتوفيق ليكم 》

تمريض عسكري
أن لا يقل مجموع الطالب من الحاصلين على الثانوية العامة(علمى علوم) أو الأزهرية (علمى) عن نسبة نجاج 60% , وألا تقل درجة اللغة الإنجليزية عن نسبة 70%، وألا يقل السن عن 17 عام ولا يزيد عن 21 عام فى1/10/2020 , وأن يكون مصرى الجنسية ومن أبوين مصريينيتمتعان بهذه الجنسية وليس عن طريق التجنس، وأن يكون غير متزوج أوسبق له الزواج ولا يسمح بالزواج إلا بعد التخرج بنجاح وحصوله على ترخيص مزاولة المهنة , وأن يكون حسن
السير والسلوك، وألا يكون قد سبق له الإلتحاق بالقوات المسلحة وتم إنهاء خدمتة بالرفت منها، وأن يجتاز الاختبارات المحددة للقبول ( طبية- نفسية – لغة إنجليزية - لياقة بدنية - كشف هيئة - التحاليل الطبية...) ، كما يشترط موافقة والد / ولى الأمر الطالب على الإلتحاق بالقوات المسلحة , ويحق للمعهد إستبعاد من يتقرر عدم لياقته طبياً من المقبولين فور إعلان نتيجة المناظرة الطبية النهائية ، ولا يحق للفرد المتقدم الإلتحاق بالكليات والمعاهد التابعة لوزارة التعليم العالى التى تمنح درجة بكالوريوس التمريض.
وأن تكون مدة الدراسة بالمعهد سنتان دراسيتان للحصول على الدبلوم الصحى , ويحصل الخريج على درجة رقيب متطوع بالقوات المسلحة يتدرج بعدها فى الترقى إلى الدرجات والرتب المختلفة طبقا للتعليمات الصادرة فى هذا الشأن ، وتعتبر مناهج الدراسة بالمعهد الصحى للقوات المسلحة هى نفس مناهج الدراسة المقررة بالمعاهد المناظرة لها بوزارة التعليم العالى، كما يحصل المتطوع على كافة الامتيازات والخدمات التى تقدمها القوات المسلحة طبقاً للقوانين والتعليمات المنظمة لذلك.
أماكن سحب وتقديم الملفات
وسيتم سحب الملفات من المعهد الصحى للقوات المسلحة ذكور بحوش عيسى، المدرسة الثانوية العسكرية للتمريض ذكور بكوبرى القبة، المعهد الصحى للقوات المسلحة إناث بأحمد جلال، المدرسة الثانوية العسكرية للتمريض إناث بالطب العالمى، المدرسة الثانوية العسكرية للتمريض إناث بالاسكندرية، المدرسة الثانوية العسكرية للتمريض إناث بسوهاج وذلك إعتبارا من 8/8/2020م إلى 15/9/2020م.
على أن يتم تقديم الملفات بالنسبة للذكور بالمدرسة الثانوية العسكرية للتمريض بكوبرى القبة والإناث بالمعهد الصحى للقوات المسلحة بأحمد جلال ، ويكون أخر موعد لتقديم الملفات يوم

الأكاديمية الدولية للهندسة وعلوم الإعلام بـ6 أكتوبر

المعهد العالى للهندسة والتكنولوجيا بكفر الشيخ

معهد الاسكندرية العالى للهندسة والتكنولوجيا بسموحة- الإسكندرية

المعهد العالى للهندسة والتكنولوجيا بالعبور

المعهد العالى للهندسة ببلبيس

أكاديمية أخبار اليوم بـ6 أكتوبر

المعهد التكنولوجى العالى بالعاشر من رمضان

المعهد التكنولوجى العالى فرع السادس من أكتوبر

المعهد العالى للهندسة والتكنولوجيا بالمنيا الجديدة

معهد الأهرامات العالى للهندسة والتكنولوجيا بـ6 أكتوبر

معهد مصر العالى للهندسة والتكنولوجيا بالمنصورة

معهد القاهرة العالى للهندسة وعلوم الحاسب والإدارة بالتجمع الخامس- القاهرة الجديدة

معهد الوادى العالى للهندسة والتكنولوجيا بالقليوبية

المعهد العالى للهندسة والتكنولوجيا بدمياط الجديدة

المعهد العالى للهندسة بمدينة الشروق

المعهد العالى للهندسة بمدينة 15 مايو

المعهد العالى للفنون التطبيقية ب6 أكتوبر

المعهد العالى للفنون التطبيقية بالتجمع الخامس

المعهد العالى للهندسة والتكنولوجيا بالزقازيق

المعهد العالى للهندسة والتكنولوجيا بالأقصر

معهد النيل العالى للهندسة والتكنولوجيا بالمنصورة

معهد المنصورة العالى للهندسة والتكنولوجيا بالمنصورة

المعهد العالى للهندسة والتكنولوجيا الحديثة بالمرج

المعهد العالى للهندسة والتكنولوجيا بكينج مريوط- الإسكندرية

المعهد الكندى العالى للهندسة ب6 أكتوبر

معهد القناة العالى للهندسة والتكنولوجيا بالسويس

المعهد العالى للهندسة والتكنولوجيا بطنطا

المعهد العالى للهندسة والتكنولوجيا بالمحلة الكبرى

المعهد العالى لتكنولوجيا البصريات بمصر الجديدة

المعهد العالى للهندسة والتكنولوجيا ببرج العرب

معهد المستقبل العالى للهندسة والتكنولوجيا بالفيوم

الأكاديمية المصرية للهندسة والتكنولوجيا المتقدمة التابعة لوزارة الإنتاج الحربى

المعهد العالى للهندسة الإلكترونية ببلبيس

معهد المستقبل العالى للهندسة والتكنولوجيا بالمنصورة

المعهد العالى للهندسة والتكنولوجيا بالمنوفية

المعهد العالى للهندسة والتكنولوجيا بسوهاج

المعهد العالى للهندسة والتكنولوجيا بالمنزلة

المعهد العالى للهندسة وتكنولوجيا السيارات بمدينة هليوبوليس الجديدة

المعاهد الخاصة العالية الشعب التجارية وعلوم الحاسب ونظم المعلومات

معهد المستقبل العالى للدراسات التكنولوجية المتخصصة

الأكاديمية الحديثة لعلوم الكمبيوتر وتكنولوجيا الإدارة بالمعادي

المعهد العالى لعلوم الحاسب ونظم المعلومات بـ6 أكتوبر

المعهد العالى للحاسب الآلى بكينج مريوط – الإسكندرية

المعهد العالى للكمبيوتر وتكنولوجيا الإدارة بسوهاج

معهد العبور العالى للإدارة والحاسبات ونظم المعلومات

المعهد العالى للحاسب الآلى وإدارة الأعمال بالزرقا - دمياط

معهد طيبة العالى للحاسب والعلوم الإدارية بالقاهرة

معهد الدلتا العالى للحاسبات بالمنصورة

المعهد العالى للحاسب الآلى ونظم المعلومات بأبى قير بالإسكندرية

معهد الجزيرة العالى للحاسب الآلى ونظم المعلومات الإدارية بالمقطم

معهد الفراعنة العالى للحاسب الآلى ونظم المعلومات والإدارة بالمريوطية – الهرم

المعهد العالى للحاسبات وتكنولوجيا المعلومات بمدينة الشروق

المعهد العالى لعلوم الحاسب ونظم المعلومات التجمع الخامس- القاهرة الجديدة

المعهد العالى للإدارة والحاسب الآلى برأس البر

المعهد العالى للحاسبات والمعلومات وتكنولوجيا الإدارة بطنطا

المعهد العالى للإدارة وتكنولوجيا المعلومات بكفر الشيخ

المعهد العالى للحاسبات ونظم المعلومات الإدارية بالتجمع الأول

المعهد العالى للحاسبات ونظم المعلومات الإدارية وعلوم الإدارة بشبرا الخيمة

معهد القاهرة العالى للهندسة وعلوم الحاسب والإدارة بالتجمع الخامس- القاهرة الجديدة

المعهد الكندى العالى لتكنولوجيا الهندسة والإدارة بالتجمع الخامس- القاهرة الجديدة

الأكاديمية الدولية للهندسة وعلوم الإعلام بـ6 أكتوبر

أكاديمية أخبار اليوم بـ6 أكتوبر

المعهد التكنولوجى العالى بالعاشر من رمضان

المعهد التكنولوجى العالى فرع مرسى مطروح

معهد القاهرة العالى للغات والترجمة الفورية والعلوم الإدارية بالمقطم

معهد الألسن العالى للسياحة والفنادق بمدينة نصر

المعهد العالى للسياحة والفنادق والحاسب الآلى بالسيوف- الإسكندرية

المعهد العالى للدراسات النوعية بمصر الجديدة

المعهد العالى للدراسات النوعية بالجيزة

معهد سيناء العالى للدراسات النوعية بالعريش

المعهد العالى للدراسات التعاونية والإدارية بالمنيرة

معهد القاهرة الجديدة العالى للعلوم الإدارية والحاسب الآلى بالتجمع الأول- القاهرة الجديدة

المعهد العالى للعلوم التجارية والحاسب الآلى بالعريش

معهد النيل العالى للعلوم التجارية وتكنولوجيا الحاسب بالمنصورة

معهد مصر العالى للتجارة والحاسبات بالمنصورة

المعهد العالى للعلوم الإدارية المتقدمة والحاسبات بأبى المطامير – محافظة البحيرة

معهد الوادى العالى للإدارة والمالية ونظم المعلومات بالقليوبية

المعهد العالى للعلوم الإدارية بـ6 أكتوبر

معهد طيبة العالى لتكنولوجيا الإدارة والمعلومات بطريق سقارة – الجيزة

المعهد المصرى لأكاديمية الإسكندرية للإدارة والمحاسبة

معهد المدينة العالى للإدارة والتكنولوجيا بشبرا منت

المعهد العالى للعلوم الإدارية بالقطامية

المعهد العالى للعلوم الإدارية والتجارة الخارجية بالقاهرة الجديدة

المعهد العالى للدراسات المتطورة بالهرم

المعهد العالى للدراسات المتطورة بالقطامية

معهد العباسية للحاسبات الآلية والعلوم التجارية

معهد السويس لنظم المعلومات الإدارية

المعهد الكندى العالى للإدارة بـ6 أكتوبر

المعهد العالى لتكنولوجيا الإدارة والمعلومات بالمنيا

معهد الإدارة والسكرتارية والحاسب الآلى بكلية البنات القبطية بالعباسية

معهد الإدارة والسكرتارية بمصر القديمة

معهد الإدارة والسكرتارية كلية رمسيس للبنات

المعهد العالى للعلوم الإدارية بجناكليس - البحيرة

المعهد العالى للعلوم الإدارية بالعباسة طريق بلبيس – شرقية

معهد الجيزة العالى للعلوم الإدارية بطموه - الجيزة

المعهد العالى للعلوم الإدارية بأوسيم

المعهد العالى للعلوم الإدارية ببلقاس

المعهد العالى للعلوم التجارية بالمحلة الكبرى

معهد العجمى العالى للعلوم الإدارية بالإسكندرية

المعهد العالى للعلوم الإدارية بالمنزلة- الدقهلية

المعهد العالى للعلوم الإدارية بسوهاج

المعهد العالى للعلوم الإدارية ببنى سويف

معهد رأس البر العالى للدراسات النوعية والحاسب الآلى برأس البر- محافظة دمياط

معهد راية العالى للإدارة والتجارة الخارجية بدمياط الجديدة

المعهد العالى للتسويق والتجارة ونظم المعلومات

المعهد العالى لتكنولوجيا المعلومات بمدينة بدر

المعهد الدولى للغات والترجمة الفورية - القاهرة الجديدة

معهد أكتوبر للهندسة والإدارة بـ6 أكتوبر

المعهد العالى لتكنولوجيا البصريات بمصر الجديدة

المعهد العالى للإدارة والمحاسبة بسوهاج

معهد أكتوبر العالى للاقتصاد

المعاهد الخاصة العالية للغات والإعلام المعتمدة رسميا في مصر

المعهد العالى للغات بمصر الجديدة

المعهد العالى للغات بـ6 أكتوبر

معهد المعارف العالى للغات والترجمة بالزيتون

معهد القاهرة العالى للغات والترجمة الفورية والعلوم الإدارية بالمقطم

معهد المدينة العالى للغات الدولية – بشبرا منت

المعهد الدولى للغات والترجمة الفورية - القاهرة الجديدة

المعهد العالى للغات بالمنصورة

معهد المنيا العالى للغات

المعهد العالى للغات والترجمة الفورية بأسوان

المعهد العالى للإعلام وفنون الاتصال بـ6 أكتوبر

المعهد الكندى العالى لتكنولوجيا الإعلام الحديث بالتجمع الخامس

المعهد الدولى العالى للإعلام بمدينة الشروق

معهد الجزيرة للإعلام وعلوم الاتصال بالمقطم

معهد الإسكندرية العالى للإعلام بسموحة

الأكاديمية الدولية للهندسة وعلوم الإعلام بـ6 أكتوبر

المعهد العالى للدراسات الأدبية بكينج مريوط – الإسكندرية

المعهد العالى للدراسات النوعية بالجيزة

معهد سيناء العالى للدراسات النوعية بالعريش

أكاديمية أخبار اليوم بـ6 أكتوبر

المعهد التكنولوجى العالى للإعلام بالمنيا

المعاهد الخاصة العالية للسياحة والفنادق المعتمدة رسميا في مصر

المعهد العالى للسياحة والفنادق بـ6 أكتوبر

معهد الألسن العالى للسياحة والفنادق بمدينة نصر

المعهد المصرى العالى للسياحة والفنادق بمصر الجديدة

معهد سيناء العالى للسياحة والفنادق برأس سدر - جنوب سيناء

المعهد العالى للسياحة والفنادق والحاسب الآلى بالسيوف- الإسكندرية

المعهد القاهرة العالى للسياحة والفنادق بالمقطم

المعهد العالى للسياحة والفنادق بكينج مريوط- الإسكندرية

المعهد العالى للسياحة والفنادق بالإسكندرية ( إيجوث )

المعهد العالى للسياحة والفنادق بالأقصر

المعهد العالى للسياحة والفنادق بالغردقة

معهد الفراعنة العالى للسياحة والفنادق بالمريوطية - الهرم

المعهد العالى للسياحة والفنادق وترميم الآثار بأبى قير بالإسكندرية

المعهد العالى للسياحة والفنادق بالإسماعيلية ( إيجوث )

المعهد العالى للدراسات الفندقية والسياحية بدمياط الجديدة

المعهد العالى للدراسات النوعية بمصر الجديدة

المعهد العالى للدراسات النوعية بالجيزة

معهد سيناء العالى للدراسات النوعية بالعريش

المعهد العالى للسياحة والفنادق بمدينة بدر

المعاهد الخاصة العالية للخدمة الاجتماعية المعتمدة رسميا في مصر

المعهد العالى للخدمة الاجتماعية بالقاهرة

المعهد العالى للخدمة الاجتماعية بالإسكندرية

المعهد العالى للخدمة الاجتماعية بكفر الشيخ

المعهد العالى للخدمة الاجتماعية بدمنهور

المعهد العالى للخدمة الاجتماعية بأسوان

المعهد العالى للخدمة الاجتماعية ببنها

المعهد العالى للخدمة الاجتماعية بالمنصورة

المعهد العالى للخدمة الاجتماعية بـ6 أكتوبر

المعهد العالى للخدمة الاجتماعية بأسوان – فرع قنا

المعهد العالى للخدمة الاجتماعية ببورسعيد

المعهد العالى للخدمة الاجتماعية بسوهاج

المعهد العالى للخدمة الاجتماعية بكفر صقر - الشرقية

المعهد المتوسط للخدمة الاجتماعية بجاردن سيتي

المعهد المتوسط للخدمة الاجتماعية بالإسكندرية

المعهد المتوسط للخدمة الاجتماعية بكفر الشيخ

المعهد المتوسط للخدمة الاجتماعية بأسوان

المعهد المتوسط للخدمة الاجتماعية بسوهاج

المعاهد الخاصة العالية التكنولوجية للعلوم الصحية التطبيقية والتمريض

المعهد الفنى للتمريض بالجونة- محافظة البحر الأحمر

المعهد الفنى للتمريض بالدقهلية

المعهد العالى للعلوم الصحية التطبيقية بمدينة بدر

المعهد العالى للعلوم الصحية التطبيقية بسوهاج

المعهد العالى للعلوم الصحية التطبيقية بالمنيا

المعاهد الخاصة العالية الزراعية المعتمدة رسميا في مصر

المعهد العالى للتعاون الزراعى بشبرا الخيمة

المعهد العالى للتعاون والإرشاد الزراعى بأسيوط

المعهد العالي للدراسات الإسلامية المعتمدة رسميا في مصر

المعهد العالى للدراسات الإسلامية.

المعاهد الفنية المتوسطة المعتمدة رسميا في مصر

المعهد الفنى الصناعى بالمطرية

المعهد الفنى الصناعى للبصريات

المعهد الفنى للفنادق بالمطرية

المعهد الفنى التجارى بالمطرية

المعهد الفنى الصناعى بشبرا

المعهد الفنى التجارى بشبرا

المعهد الفنى الصناعى بشارع بالصحافة

المعهد الفنى التجارى بالروضة

المعهد الفنى الصناعى لمواد البناء بحلوان

المعهد الفنى للرى والصرف والمساحة بالمطرية

المعهد الفنى الصناعى ببنها

المعهد الفنى التجارى ببنها

المعهد الفنى الصناعى بقويسنا

المعهد الفنى التجارى بقويسنا

المعهد الفنى التجارى بطنطا

المعهد الفنى الصناعى بالزقازيق

المعهد الفنى التجارى بالزقازيق

المعهد الفنى الصناعى بالمحلة الكبرى

المعهد الفنى التجارى بالمحلة الكبرى

المعهد الفنى التجارى بدمياط

المعهد الفنى التجارى بالمنصورة

المعهد الفنى التجارى بدمنهور

المعهد الفنى الصناعى بالإسكندرية

المعهد الفنى التجارى بالإسكندرية

المعهد الفنى للفنادق بالإسكندرية

المعهد الفنى الصناعى للمنشات البحرية ببورسعيد

المعهد الفنى الصناعى ببورسعيد

المعهد الفنى التجارى ببورسعيد

المعهد الفنى للسياحة و الفنادق ببورسعيد

المعهد الفنى الصناعى ببئر العبد

المعهد الفنى التجارى بالعريش

المعهد الفنى الصناعى للرى و الصرف و المساحة بأسيوط

المعهد الفنى التجارى بأسيوط

المعهد الفنى الصناعى بسوهاج

المعهد الفنى التجارى بسوهاج

المعهد الفنى الصناعى للالومنيوم بنجع حمادي

المعهد الفنى الصناعى بقنا

المعهد الفنى الصناعى للرى و الصرف و المساحة بقنا

المعهد الفنى التجارى بقنا

المعهد الفنى للسياحة و الفنادق بقنا

المعهد المتوسط للخدمة الاجتماعية بقنا

المعهد الفنى الصناعى لترميم الآثار بالأقصر

المعهد الفنى الصناعى بأسوان

المعهد الفنى التجارى بأسوان

المعهد الفنى فوق المتوسط لتكنولوجيا السكك الحديدية

المعهد الفنى للتمريض بمستشفى وادى النيل

تابع سلسلة تعرف الكليات و أقسامها المميزة و العادية