التربية السلبيه الحلقه الاولى ( خليك راجل )

التربية السلبيه
الحلقه الاولى ( خليك راجل )

هنبدأ اليوم مع بعض موضوع جديد اعتقد اننا كلنا محتاجين ننتبه له .
موضوعنا الجديد هو
* التربيه السلبية *

والتربيه السلبيه بتكون عباره عن مواقف وتصرفات بتصدر مننا كأباء وأمهات امام اولادنا وبتترك اثر سلبي فى نفسية الاولاد حتى لو مكناش احنا قاصدين كده ممكن ننتبه للتصرفات دى ونعالجها
وممكن جدا وده اللى غالبا بيحصل اننا لا ننتبه للتصرفات دى !!
التصرف اللى هنناقشه مع بعض فى الحلقه الاولى هو .
انفراد الام باصدار القرارات فى البيت .

** الاولاد عملوا شقاوه وغلطوا فبتبدأ ماما تتعصب وتزعق وصوتها يعلى .
وطبعا بتخوف الاولاد وتهددهم بانها هتقول لبابا لما يرجع .
وأول ما بيرجع بابا بتبدأ ماما تشحنه وتحكيله على اللى الولاد عملوه
وطبعا اللى بيستقر فى ذهن الاولاد امرين .
1 - ان بابا مش بيعاقبنا غبر لما ماما بتقوله
2 - ان ماما فتانه !!!!!
** الاولاد عايزين ينزلوا يلعبوا .
بيروحوا لبابا ويطلبوا منه انهم ينزلوا يلعبوا لانهم خلصوا اللى وراهم .
طبعا بابا مش عارف هما فعلا ذاكروا وخلصوا اللى وراهم ولا لأ .
فبيقولهم بحسن نيه . قولوا لماما ولو وافقت انزلوا !!!!

وطبعا اللى بيستقر فى ذهن الاولاد امرين .
1 - ان النزول والرجوع بيكون بموافقة ماما .
2 - انه بابا حتى وان كان بيقولنا انزلوا فهو برضوا بيكون باذن ماما .
** وبعض العبارات الكتير اللى بتتردد على لسان الاب كل يوم .
الاولاد عاملين دوشه
الاب بسرعه يقول ( سكتى عيالك يا ست )
الاولاد مش عايزين يناموا
الاب بسرعه يقول ( نيمى عيالك يا هانم )
الاولاد لهم اى طلب
الاب بسرعه يقول ( لو ماما وافقت انا موافق )

طيب ايه الحل ؟؟
1 - خلى دايما فى اتفاق بينكم بعيد عن الاولاد يعنى يبقى فى اتصال من الاب قبل رجوعه للبيت يسأل فيه ماما الاولاد عملوا ايه وعلى اساسه يكون الثواب والعقاب
2 - خلى دايما اذن الخروج مرتبط ببابا لانه راجل البيت وطبعا الاب يعرف من الام بعيد عن الاولاد هل بالفعل هما اتموا اللى وراهم ولا لأ .
3 - دايما نحرص كأباء على سؤال الابناء عن مذاكرتهم وصلاتهم وباقى الامور اللى للأسف بنسيبها للامهات معظم الاوقات وبنوهم نفسنا ان الام هى بس اللى مسؤله عن التربيه
وده له عدة فوائد
... الاولاد هيعرفوا ان لهم اب بيسأل ويهتم ويتابع مش بس بياخد تقرير
... الام هتحس بان التربيه فعلا مشاركه فى كل شيئ مش بس مشاركه طرف برأس المال وطرف بالمجهود !!!!
... حضرتك كأب مش هتتفاجئ فى نهاية السنه بدرجات وحشه ولا هتتفاجئ بعد ما الاولاد كبروا انهم مش محافظين على الصلاه
وترجع تشتكى وتقول
اتفضلى شوفى عيالك يا ست !!
خليك راجل وشارك بجد فى تربية ولادك .