الخلاصة فى كتابة البحث من الصف الثالث الإبتدائى للثانى الإعدادى الأستاذ عاطف اليمانى

1- المدرس

- حضرتك وظيفتك فى البحث هو انك تضيف طلابك داخل المنصة اللى هيتم انشائها لمدرستك ( يعني مش انت اللى هتعملها مسئولي المدرسة هما اللى هيعملوها أو بالتحديد اخصائى التكنولوجيا أو الحاسب الالى  ) ومهمة حضرتك انك بتتأكد ان كل طلاب فصلك تم اضافتهم  وتوجيه الطلاب للابحاث اللي هتطلب منهم يعنى تشرحلهم المطلوب منهم او يبدأ منين وينهى ازاى طبعا لما نعرف شكل البحث يوم 9 ابريل

حضرتك دي مسئوليتك واحتمال تبقي من ضمنها انشاء اسئلة للبحث بدرجات محدده وانك تساعد الطالب فى الوصول للمعلومات الخاصة بالبحث عند طريق المذاكرة الرقمية الموقع اللي الوزرارة مقدمة عليه خدمة التعليم عن بعد

رابط الموقع https://study.ekb.eg

2- الطالب

- حضرتك مش هتعمل اي حاجة دالوقتي الا لما يتم تحديد الابحاث المطلوبه منك غير انك هتجيب رقمك الخاص بوزرارة التربية والتعليم اللي هو رقم كود الطالب وده  هيبقى زي كده رقمك علي مستوي الادارة اللى انت تبعها زي رقم الكشف في المدرسة  زى رقم الجلوس كود يخصك انت بس ويعرف المدرس ان البحث بحثك مش بحث غيرك  ...يعنى كده احتفظ بيه وتخليه معاك لحد ما يتم تحديد الابحاث

- مطلوب منك بعد ما تفتح المنصة المدرس هيضيفك هتشوف اصحابك وفصلك وانت حر تختار هتعملوا بحث فردي او جماعي وبعد ما تخلص البحث هتكتب اسمكم عليه  وكودك  اللى انت حصلت عليه من الموقع بتاع كود الطالب اللي الرابط بتاعه ده

لم تتضح الرؤية ان كان ينفع اكتر من طالب من فصول مختلفة يعملوا بحث ..لأن كل مدرس اظن مسئول عن فصله والمدرش مش هيدور على بحثك المشترك مع طلبة ف فصول مدرس تانى ... وكمان طلبة اللغات هيكتبوا البحث بأى لغة  ...نستنى ونشوف

البحث تكتبه على برنامج word او pdf او حتى تكتبه ورق وتصوره بالموبايل صور واضحة جدا وترفعه ع المنصة أو تسلمه للاخصائى وهو يرفعهولك

3- ولي الامر

- حضرتك مش مطلوب منك غير انك تأهل ابن حضرتك وانك تساعده في انه يخلص ابحاثه وفي الوقت الحالي مطلوب منك انك تخليه يراجع علي الاجزء اللي تم تدرسها واللي تم تحددها الفترة اللي فاتت

- انك تحاول تجيب الكود بتاع الطالب عن طريق شهادة الميلاد الخاصة بك لو مش عرفت اتصل بالمدرسة او بمسئول شئون الطلبة وهو هيديك البيانات اللى انت محتاجها علشان كود الطالب هو زي رقم جلوسه كده في البحث وده مهمته

تتيح لابنك وتوجهه للمواقع اللى ممكن يجيب منها معلومات البحث يعنى من غير كلام كتير ...شكلها كده انت اللى هتعمل البحث نيابة عن ابنك بس لازم تراعى ف الكلام اللى بتنقله انه يكون مناسب لسن ابنك فكلام طالب تالته ابتدائى ومعلوماته تختلف عن طالب تالته اعدادى ومعلوماته

** ملاحظات هامة

1- لا توجد حالياً اي فكرة عن البحث وكل ما هو متداول وهو مجرد اجتهادات شخصية وكله هيبان بعد يوم 9 بلاش تسرع وقدامك شهرين شوف كل المواقع التعليمية وتابع اشكال الابحاث اللى هترفعها الناس ع المواقع واختار احسنها لأبنك

اتمني لكم الخير جميعا و بالنجاح والتوفيق أ/ عاطف اليمانى

الموضوع سهل جدا وزي ماقلت أهم حاجة تتعلمو كتابة البحث عشان السنين اللي بعد كدة.
اولا: المقدمة او التمهيد وفيها بنتكلم عن البحث بوجه عام ركز على العنوان يكون في دماغك وانت بتكتب يعني ماتخرجشي بره الموضوع وحديثك يكون من العام للخاص. ودي اهم نقطة وهاوضح بامثله. ثم تكتب عناصر الموضوع أو بنسميها في البحث المحاور وبرده تكون من العام للخاص وحاول تنوع المحاور بحيث تقدم انت من خلالها مصادر وصور واحصائيات مختلفة وهاوضحلك ده في المثال. ثم تكتب خاتمة وفيها هاتلخص أفكارك وكيفية سير البحث. وبعدها هاتعرض المراجع وبرده هاعلمك ازاي تدخلها وتختارها. اهم حاجة من العام للخاص وأهم حاجة تنويع المصادر.
وكل ما كان البحث عن موضوع فرعي او دقيق كل ما كانت كتابته أسهل وده عكس اللي انتو فاكرينه. نيجي للمثال: مش من الوزارة او من ابحاثكو الله اعلم كلنا لسه مانعرفش ايه الأبحاث. مثلا لو البحث عنوانه... . مصر هبة النيل وهو نهر الخير والعطاء كيفية الحفاظ على ماء النيل... اولا نكتب مقدمة من العام للخاص. شوف قلت كام مرة!
مثلا النيل هو نهر الخير وهو أطول انهار أفريقيا وهو يمر بتسع دول تتشارك في الانتفاع بمياهه منها دول منبع ومنها دول مصب مثل مصر. ونهر النيل هو السبب الرئيسي في وجود الحضارة المصرية...... ويعيش المصريين على ضفافه يعملون بالزراعة و..... يجب أن نتعاون جميعا للحفاظ على ثروتنا المائية. دي المقدمة طبعا انت بتكتب تفاصيل اكتر وابتعد تماما عن الاراء الشخصيه والأحكام العامة يعني مثلا خالتي قالتلي ماترميش زبالة في النيل.
او مثلا الشعب المصري يموت اذا ثلوث النيل ده كلام ليس له دليل وكلام عام ابعد عنه. وبعدها بنقول.... ولتناول هذا الموضوع نعرض النقاط التالية.... . ممكن تغير الصيغة براحتك وتكتب المحاور من العام للخاص ونوع المجالات
مثلا
١. نهر النيل عبر التاريخ
٢. وصف جغرافية مصر باعتبارها دولة مصب
٣. أهمية نهر النيل بالنسبة للاقتصاد المصري.زراعة وصناعة وتجارة
٤. الثروات التي يمكن أن نستخرجها من النيل.
٥.مشكلة ثلوث مياه النيل
٦.كيفية الحفاظ على مياه النيل .
كل عنصر حط فيه صور وانت بتعرضه تكون واضحة عند الطباعة وحاول تضع فيه إحصائيات او تقارير. هتلاقي نفسك ممكن تكتب كتير زي ما انت عاوز. والمرة القادمة هاقولك ازاي تكون شاطر في اختيار المراجع وتجيب الاحصائيات منين. يا رب تكونو اطمنتو لما فهمتو البحث بيتكتب ازاي ودي الطريقة العلمية في كتابة البحث وربنا شاهد انا حاولت ابسطها على قد ما قدرت اهم حاجة حب البحث العلمي لانه ده الاتجاه اللي هاتمشي بيه الوزاره بعد كدة. تحياتي لكم جميعا.. .